Zungzal a kan Dawtu cu Bawipa a si

August (5) ni Bupi nih a kan thim piakmi hna chungin thazaang i lak hna usih. (Jer. 31:1-7; Mtt 15:21-28) hna chungin a si. 

Voikhat bible kan relnak ah Jeremiah nih harsatnak a rak tongmi, hlawt a rak tongmi, cun fahnak phun zakip sifah harnak a rak tongmi Israel mi hna sinah khan nanmah an dawtu nan Pathian cu nannih kha a zungzal a dongh tiang an dawt ko hna, tiah thazaang peknak bia a rak chimnak kha kan hmuh. 

Kan ngaihchiat tik, kan lung a rawh tik caan ah a kan dawtu pakhat khat nih thazaang a kan pek, a kan hnemh tikah hin zeitluk in dah kan thazaang a um timi kha pakhat cio nih kan theihmi a si. Hi Israel mi hna zong nih Bawipa an rak hlawt, an rak kaltak. Sihmanhsehlaw Bawipa nih a chimhhrin hna, Profet a thlah hna, cawnpiaktu, hruaitu a thlahpiak peng hna. Cuticun a hramthawk in a dongh tiang an dawt ko hna, tiah Jeremiah nih cun a timi cu a si. 

August (04) ni ah kha Mithiang John Mary Vianney puai kan tuah. John Mary Vianney cu Diocese Siangbawi te hna i Petron Saint tiah, a hupphengtu tiah Bupi nih a ti. Zeiruang ah mah mipa hi mifim taktak, cathiam taktak zong a si lo. Mah lioah lenglei hmuhmi “anih cu cathiam taktak a si e, anih cu a fim taktak e” tiah thangṭhatmi phun kha rak si loin a chunglei in Pathian a dawtnak le a chunglei in Pathian aa bochannak thawngin thlarau tampi hna caah thluachuah tampi a phurtu a si. Lenglei in a lutmi thil nih mi kha a hnawmhter si loin a chungin a chuakmi thil nih mi kha a hnawmhter e, tiah a ti. 

Lenglei in kan cawnmi nih minung kha thianhlimnak leiah si loin kan chung kan lungthin in Pathian bia, Pathian kan dawtnak nih khan midang thlarau hawikom khamhnak ding ca tu ah khan thil a si ter deuh. Cucaah Dawtmi Khrihfa hna zong kan chim lengmang bantuk tawn in nanmah sin i an umpi tu nan siangbawi hna kha daw thiam hna uh. An um caan te ah khan daw thiam hna uh. Zeicahtiah chikkhat khual a rak tlawng i a rak phanmi hna kha dawt lawng kha si loin nan harsat caan, nan si ṭhat caan, nan si a fah caan ah siseh, ngaihchiat caan siseh thla an cam piaktu hna, thlarau lei in thazaang an petu hna, cun thluachuah an halpiaktu hna, thluachuah an petu hna nan siangbawi te kha philh hlah uh. An ca zongah khan thlacam piak uh. 

Isreal mi hna sinah Pathian dawtnak kong kha Jeremiah nih a chim tikah atu Khrihfa kanmah hna ca zongah hin thazaang a um, “A kan daw zungzal tu Pathian a um e” tiah a ti. Pakhat khat sinin kan thlau lo nakhnga ding ah khan Bawipa nih amah hrimhrim nih a kan timhpiak. 

Thawngṭhabia chungah Jentel minu nih Bawipa sinah va kal in a fa caah thla a cam tikah Bawipa nih zeitindah a ti, “ngakchia rawl cu i lak riangmang i uico pek cu a hmaan lo” tiah a ti. Sihmanhsehlaw minu nih a lehmi cu, “sihmanhsehlaw, Bawipa cabuai cungin a tlami rawl tiltawt cu uico nih an ei ve tawn ko hen pei” tiah a leh. Pathian dawtnak, cun Pathian nih mi kha ahohmanh cungah thleidannak a um lo timi kha a zumh caah, “Pathian nih a ka khamh hrimhrim ko lai, a ka bawmh hrimhrim ko lai, ka thlacamnak a ka theihthiam piak ko lai” timi kha a zumh caah tangdornak lungthin he Jesuh Khrih kha a leh tikah Bawipa nih a thlacamnak a tlinhpiak. 

Dawtmi u le nau hna nihin ni ah vawlei thilti khawhnak in kan ṭhawng men lai lo, vawlei thil zohnak in thazaang dermi kan si ko men lai. Sihmanhsehlaw a kan thimtu, a kan thlahtu, a kan umpi tu Pathian nih kannih hna cu amah thawngin thazaang a ngeimi kan si, a ṭhawngmi kan si timi kha thei hna usih. Sihmanhsehlaw mah zawnte ah khan a kan dawtu Pathian sin kan kalnak ah khan minu nih a ngeihmi lungput “Kaa tlak lo, sihmanhsehlaw Bawipa sinah ka hal ahcun, zumhnak taktak he amah ka panh a si ahcun ka herhmi kha Bawipa nih a ka pek ko lai” timi bochannak lungthin le zumhnak lungthin kha kan ngeih a herh.

Thazang petu /- Fr. Fidelis Maung Sein