Kan um pi zungzal hna lai
Nihin ni ah kan i hrawm hnga dingmi cu thawngṭhabia cu (Mt. 8:23-27) tiang a si lai. Hi chungah hin a biapi bik kan hmuhmi cu Bawipa Jesuh Khrih hi khual tlawn awkah lawng chungah a lut i cun lamkaltu hna zong nih an zulh ve. Cu an kal, an i thawh tlawmpal ah khan ruahlo piin thlichia nih a den ciammam hna i kha tikah khan annih thlichia a den hna lioah cun Bawipa Jesuh Khrih cu hngangam tein khan lawng ih a lulei ah khan a rak i hngilh. Sihmanhsehlaw, lamkaltu pawl cu an thin a phangtuk i an thi ko cang lai hi ta tiah an ruah i fakpi in an ai an hram i Bawipa Jesuh Khrih kha kan thih dih cang lai hih tiah khan an va hlauh timi kha kan hmuh. Hi tikah kan Bawipa Jesuh Khrih nih , nan zumhnak a va hme hringhran dah, tiah khan a ti hna i thlichia zong kha a hrau i cucun zeizong vialte kha a dai dih, timi kha kan hmuh. Hika ah hin kannih vialte nih thlarau thazaang kan i lak lai timi hi ruahter le sawm kan duhmi hna a si.
Nihin ah kan Bawipa Jesuh Khrih nih a Bupi chungah hin kan umpi zungzal hna tiah fek tein bia a kam bantukin khan hi rili cungah khualtlawn in khan tinbaw in an i thawh a ti tikah khan hi tinbaw hi lamkaltu hna le Jesuh Khrih nih an i citmi tilawngpi hi kan Nu Bupi a aiawhmi a si. Catholic Bupi zong a si, Jesuh Khrih pumpi zong a si. Cucun Jesuh Khrih kan umpi zungzal hna lai, tiah a biakamnak bantuk in khan a kan umpi taktak i, sihmanhsehlaw Jesuh Khrih Bupi chungah a um ruangah hin tukforhnak hi tong loin kan um maw, tukforhnak in kan luat maw kan ti tikah khan kan luat kho lo. Zeicah kan ti a si ahcun, minung timi hi harnak rilipi nih a kulhmi tinak kha a si. Cucaah minung timi hi khua zei ram kan phanh paoh ah khan kan pawng kan kam ah hin harnak le tukforhnak lawngte kha a si. Aho minung hmanh hi harnak in a luat lo, ngaihchiatnak in a luat, cucun ngaihchiatnak a tong bal lo, harnak a tong bal lo timi hi minung timi hi a um kho lo.
Cucaah minung timi hi harnak tongmi lawngte, tukfornak a tongmi lawngte kha kan si caah hin hika ah lamkaltu hna zong cu minung an si ve bantuk in khan khika ah Bawipa Jesuh Khrih he Bawipa an um ti ko nain tukforhnak thlichia le harnak thlicia in an luat maw kan ti tikah an luat lo. Sihmanhsehlaw hika kan Bawipa Jesuh Khrih nih a duhmi cu zeidah a si tiah cun hi amah umpinak thawngin khan amah kha harnak an ton caan ah anmah lawng si loin khan harnak an ton caan ah amah kha bomhnak hal awkah anmah bawmhnak i ready tein um awkah a si zungzal timi kha a si. Cucaah hika ah hin kannih vialte zong nih hi harnak rilipi, tukforhnak rilipi cungah khual kan tlawn tikah hin a bikin kan zumhnak he khual kan tlawn tikah hin tukforhnak hin kan luat maw kan ti tikah kan luat kho lo. Sihmanhsehlaw kan luat kho lo nain Bawipa Jesuh Khrih kha kan pawng ah a um timi kha kan hngalh ahcun kan hna a ngam zungzal lai.
Sihmanhsehlaw lamkaltu hna hi minung an si ve bantuk in khan hi tukforhnak an ton tikah kan pawngah Jesuh Khrih pei a um cu timi bochannak kha an ngeih lo tikah an ai an hram, “ziah Bawipa zeihmanh na kan rel lo maw? Hi tluk harnak kan tonmi hi zeihmanh na rel lo maw?” tiah an rak ti. Cu bantuk in khan ngan le kei zong kan khualtlawnnak ah hin Bawipa Jesuh Khrih nih a kan umpi timi hi kan hngalh lo le kan zumh lo a si ahcun a caan caan cu Pathian tu kha mawhchiat le vawlei cung harnak pawl kha sual a puhtu bantuk ah khan kan cang ṭheo.
Cucaah kannih vialte nih hi vawlei cungah zumhnak in khual kan tlawnnak ah siseh, kan pawcawmnak caah siseh, kan lam kan kalnak ah hin tukforhnak cu kan luat lai lo. Sihmanhsehlaw hi tukforhnak vialte hi kan tei khawhnak hnga caah hi tukforhnak vialte hi a teitu bawi a simi Jesuh Khrih khan a kan umpi zungzal caah Bawipa Jesuh Khrih kha kan i bochan zungzal lai i Bawip Jesuh Khrih kan i bochannak le amah sin kan halnak thawngin khan hi tukforhnak thlichia vialte hi kannih kan tei lai i kanmah kan i tinhmi hmun le hma ah khan lungdai hnangam tein khan kan kal kho lai timi kha ruah in khan khua zei kan kal paoh ah Bawipa Jesuh kha aa bochanmi, a komi si i zuam zungzal hna usih.
Thazang petu /- Fr. Abraham Hrang Hit