Kan i tlak taktak maw?

Nihin thawngṭhabia chungin tlangtar ka duhmi, “kaa tlak lo” timi in thlarau thazaang la ṭi hna usih. Pathian fale cu tangdor nun an ngei. Tangdormi hna sinah Bawipa a um, Bawipa a umnak ah tangdor nun an ngei. (Ex. 3:11, 4:10-13) chung, Bawipa nih Moses cu a thawh i, Izipt ram Faro sinin ka mi hna cu chuahpi hna law, tiah a ti. Moses nih Bawipa cu, kaa tlak lo ka ngaithiam ko biachim ka thiam lo, a ti. (Jn. 1:19-27) chungah, Judah upa hna le tlangbawi hna cu Johan sin an ra i Messiah na si maw, Profet na si maw, Elijah na si maw, tiah an hal. 

Johan nih, ka si lo, kei hoi hna cu a kedeng hri phoihtu hmanh ah kaa tlak lo, a ti hna. (Lk. 1:41-43) chung, Thiangthlarau in a khatmi Elizabeth nih Nu Mary cu, zeicahdah ka Bawipa Nu nih hin keite hna hi na hun ka tlawn, tiah a ti. (Lk. 1:48) chungah, Nu Mary nih, a salnu hi tluk minauta ka si nain a ka philh lo, tiah a ti. (IKor. 15:9) ah, St. Paul nih Pathian Khrihfabu kha a hremtu le a hrawktu ka si i Lamkaltu vialte hna lakah nauta bik ka si. 

A ngaingai ti ahcun Lamkaltu ti awk hman kaa tlak lo, tiah a ti. Pathian fale hna cu toidor nun a ngeimi an si, timi hi nihin Pathian bia nih a kan chimh. Pathian nih a duh cemmi cu “kaa tlak lo” timi lungput hi a si. Zumtu Khrihfa hna nih Bawipa thisa kan ei hlanah kan thlacammi cu nihin thawngṭhabia kan relmi chungin a si. Rome ralbawipa aa tangdornak le a thlacamnak kha a si. “Bawipa, ka innchung ah na lut nakhnga ka tlak lo, sihmanhsehlaw bia kaa khat lawng chim law ka Thlarau cu a dam cang lai” tiah thla kan cammi cu Rome ralbawipa a thlacamnak kha a si i Rome ralbawipa nih a sining aa hmuh fiang, Pathian hmaiah zeihmanh ka si lo misual cem ka si, timi a sining aa fiang. 

Cucaah Bawipa, nang ka inn rat ding kei cu kaa tlak lo, a ti. Cu bia cu Jesuh nih a theih tikah a khuaruah a har i hi pa bantuk zumhnak a ngeimi Israel mi hna lakah ka hmuh rih lo, tiah a ti. Ralbawipa cu a thawh i, na zumhnak cu tuahpiak na si lai, tiah a ti. Ralbawipa a sal cu cucaan hrimhrim ah a rak dam. Rome ralbawipa nih teidor tein Jesuh sin a halmi bia cu a theih tikah a khuaruah a har ngaingai. Rome ralbawipa cu amah caah a hal lo, a innchungkhar caah a hal lo, a salpa caah Pathian sinah toidor tein a halpiak. Rome ralbawi a salpa a damnak cu amah a salpa i a zumhnak a si lo, a bawipa i a zumhnak a si. 

Taksa, Thlarau dam lomi hna damnak cah le hremnak a ingmi hna le thongtlami hna nih luatnak an hmuhnak hnga le miphun damnak caah, ram damnak caah damnak a pe khotu le luatnak a pe khotu kan biakmi kan Pathian sinah Rome ralbawipa bantuk in zumtu hna nih toidor nun ngeih bu tein bawmhnak hal zungzal usih. Damnak, luatnak Bawipa nih a kan pek hrimhrim ko lai. Bawipa nih nanmah sinin a duh cemmi cu “Kaa tlak lo” timi lungput hi a si. Kaa tlak lo timi lungput cu taksak, thlarau damnak a si. 

Thazang petu /- Saya Francis Khua Pheng