PATHIAN VEEL LE MINUNG ZUMHNAK
Pathian miphun hna tiah kan theih mi Israel mi hna nunnak kha kan zoh ṭhan tikah annih cu Pathian kha khamhtu sinak in sertu a si, tiah duhsah tein an rak hngalh. (God as savior to God as creator.)
Zungzal Pathian zong nih ‘Keimah cu Van le vawlei sertu Pathian, zeizong tuah kho Pathian ka si’ tiah Israel mi hna sinah a rak langhter bal lo. Sihmanhsehlaw, Keimah cu khamhtu Pathian ka si; keimah kha nan ka biak ahcun Izipt mi hna saltannak in kan luatter hna lai, tiah minung le Pathian karlak biakamnak (biahren) a tuah i khamhtu a sinak kha a mah le mah theihternak a rak tuah. Cucaah Isreal mi hna i Pathian cung an zumhnak cu Izipt ram salcannak in an luat in aa thawk. Cuti saltannak in an luatnak thawngin annih cu Pathian kut chungah a nganmi huham ṭhawnnak aana a um ti kha an rak hngalh. Ramcar i an vahvaih lio an hmuh tonmi harnak hna karlak in Pathian nih a rak khamhnak hna, kamhmi Canan ram an phak tikah eiawk rawl a rum i, a nganmi le rumra ngei mi khuapi kha an hmuh tikah Pathian cu zeizong vialte a tuah khotu, Van le vawlei sertu Pathian a si ti kha an rak hngalh. Pathian cu sertu a si ti kha an hngalh i an rak zumh.
Bible Cathar chan a hun phak tikah, Bawipa Jesuh Khrih thawngin Pa Pathian cu ahodah a si, ti kha miphun dihlak sinah a rak hmuhsak. Vawlei kha a sertu Pathian, minung a dawtu Pathain, dawtnak Pathian a si kha a rak langhter. Bawipa Jesuh zong nih minung he hmunkhat ah a umnak in Pa Pathian kong kha a rak chim, a rak bawmh, mizaw kha a rak thloppiak hna. Pathian Nawlbia hna kha a rak cawnpiak hna. Pa Pathian cu, zeibantuk mi dah a si ti kha a mah i a chimrel ning, a umtu ziaza, a ṭhutdir ning, a um kalning in a rak langhter. Pathian kong a phuan i a hmuhsak nak cu Bawipa Jesuh ah a dihlak in tlin cikcek nak ah a rak phan. (Christ is the fullness of Revelation.) Zeicahtiahcun Khrih hrimhrim cu Pathian Fapa a si caah a si. Thiang Thlarau Pathian thawngin pawi a simi Pathain i Bia a si caah a si. Hi konglam hna tu cu Jesuh Khrih i mithmuh tehte (Eye Witnesses) hna asimi Zultu ngan hna, (Sacred tradition) Lam kaltu hna in a rami cawnpiaknak hna, Bupi cawnpiaknak hna, (magisterium of the churh), Bible Cathiang (Sacred Scripture) tiah thil hna thawngin kannih nih kan hngalh khawh, kan cohlan i kan zumh.
“Khamhnak timi tu cu Pathian Veel le minung i Pathian cung kan chiah mi zumhnak a pahnih fonh i a rak chuakmi thil a si. Pathian nih veel thluahchuah a kan pek zungzal. Kannih leikap in zumhnak ah lung awṭawm, lunghrinhnak kan ngeih ahcun khamhnak cu kan co kho lai lo.” A hleice in hneksaknak hna kan in tikah Pathian cung kan ngeih mi zumhnak hna a zor ṭheo tawn. Sipuazi (ṭhachonak) kan chamhbau tikah, kan rianṭuan mi tlam a tlin lo tikah kan nunnak ah Pathian hmunhma a tlau thiam tawn. Hi konglam hna he pehtlai in Pope Francis nih a mah i Christus Visit timi cathluan ah hitin a cawnpiak. (N-117)
“Kannih cu harnak hna kan tong kan ingtuar, nunnak i zuamcawh nak hna he kan i hmaitonhnak timi hna cu, Pathian cu kan nunnak chungah a mah caah hmunhma pakhat an ka pe hnga maw? timi ruahchannak a ngeih caah a si. Kha hmun ah kannih cu Pathian he bia kan i ruah lai.” Kan intuarnak kha kan phuan lai. Zeicahdah keimah nu/pa cung thengah hi bantuk thil hi a can hnga tiin biahalnak kan tuah hmanhah Pathian nihcun lungrawk loin a kan ngeihpiak ko lai. Kannih leikap nih Pathian kha hmuhma pek lo, biaruah loin kan um ca tu ah a si. Kha hmunhma te ahkhan Pathian cu, fapa pakhat kha lam kalning a cawnpiak mi pa pakhat bantukin kan ṭhawnnak ding, kan ke cungah dir i lam kan kal khawhnak ding, kan tluk kan rilh lio caan ah bawmtu kut sinakin umpi a kan duh caah a si. Cucaah kan nih sinin a mah caah hmunhma pakhat te a kan halnak cu a si.
Genesis 32:25-31 ah Jacob cu Pathian he an i paihnak kong kha kan rel. Isaiah 1:18 ah Pathian nih, “Ra u, bia kan i el hna lai” tiah a kan sawm kha kan hmuh. Cucaah Pathian hmaiah kannih intuarnak hna kha hlangfang tein kan chimh khawh lai; Lungretheihnak kan ṭhumh khawh lai. Zeicahdah keimah cung thengah hi bantuk thil a can hnga timi biahalnak hna he biahal nak le lehnak kan tuah khawh lai i bia i el khawh a si lai. A dikmi Dawtnak he a kan dawtu Bawipa Pathian cu kannih kha bia ruah ding a kan sawm peng ko. Ṭhawnnak thazaang veel thluahchauah hna pek dingah zeitindah na lawmh lai timi ningcang hna pek dingah a kan hngah peng ko.
Cucaah Pathian nih a kan pek dingmi ningcang hna kha hman buin sifah harnak, zawtfahnak, hneksaknak hna kan in tikah kan nunnak chungin Pathin tlauter lo ding kha kan i zuam awk a si. Pathian ah kan zumhnak a fehnak ding caah kan i zuam awk a si. Zumhnak aa tel lawnglawng ah khamh kan si lai. Pathian veel thluachuah le minung zumhnak aa fonh lawnglawng ah khamhnak timi a theipar kha kan co, kan hmuh ding a si.
“A dongh tiangin a fek mi cu khamh an si lai” (Matthai 24:13) …