Bawipa mi hna cu ahodah an si?

Nihin kan nu Bupi nih a kan thim piakmi (Mt. 7:21-27) tiang a si. “‘Bawipa, Bawipa’ tiah a ka timi paoh in Vancung Pennak chungah an lut dih lai, tinak a si lo, sihmanhsehlaw vancung i a ummi ka Pa nih tuah hna seh ti a duhmi a tuahmi lawnglawng kha an lut lai. Cu Ni cu a phak tikah, mi tampi nih keimah cu, “Bawipa, Bawipa! Na min in Pathian bia kha kan chi mi na min in khuachia kha tampi kan ṭhawl hna i khuaruaharnak tampi kan tuah,” an ti lai. Khi tikah annih cu ka thawh hna lai i, ‘Nannih cu aho nan si kha kan hngal bal hna lo. Kal ko u, ṭhat lonak a tuahtu hna,’ tiah ka ti hna lai. Cucaah hi ka bia a the ii a zulmi cu lung cungah a inn a sami mifimpa bantuk a si. Ruah a sur, ti a lian, thlitu nih fak piin a hranh. Sihmanhsehlaw lung cung i sakmi a si caah khan a pur lo. Sihmanhsehlaw hi ka bia a the ii a zul lomi cu thetse cungah a inn a sami mihrutpa bantuk a si. Ruah a sur, ti a lian, thlitu nih fak piin a hranh i a pur; rawk cikcek in a tlu,” tiah a ti. 

Nihin Matthai thawngṭhabia chungah kan zoh tikah kan Bawipa Jesuh Khrih i ralrin peknak a si i Khrihfa a simi paohpaoh nih kan i relrin awk zong a si.  Zeicahtiah cun hmurka in ‘Bawipa, Bawipa’ tiah ti lawngin Vancung Pennak ah kan lut kho lai lo ti hi kan Bawipa Jesuh nih fiang tein a kan chimhmi a si. Hi bia nih hin kan zumhnak hi kan kaa le ka lei lawngah maw a um asiloah kan lungthin le tuahsernak ah a um taktak maw? timi kha zohfel dingin a kan forhnak a si. 

Pakhatnak ah Pathian nih kaa aw nakin thinlung aw kha a ngai deuh ti hi zoh ṭi hna usih. Micheukhat nih Pathian biaknak puai ah Pathian an thangṭhat tuk, thla a cam tikah Pathian cu ‘Bawipa,Bawipa’ tiah bia dawhdawh in an au ve. Asinain hi vialte hi cu a lenglei ziaza lawng a si. Pathian cu a lenglei zia lawng a zohtu Pathian a si lo, thinlung dirhmun a zohtu Pathian a si i bia nih khamhtu tiah kan au ko nain kan nunnak cu kanmah duh ningin a kalmi lawng a si ahcun cu aunak cu pakpalawng a si ti hi kan hngalh ding a si i kan kaa, kan bia lawng le kan hmurka lawng nih ‘Bawipa,Bawipa’ tiah kan ti kan nunnak kan lungthin chungah kan i nunpi lo a si ahcun cu vialte kan aukhuannak vialte cu pakpalawng a si ti hi kan hmuh khawhmi a si. Mipakhat khat nih, ngakchia pakhat khat nih a nu/pa kha “ka nu le ka pa kan dawt tuk han” tiah a ti i asinain a nu/pa nih an fialmi rian kha a ṭuan bal lo a si ahcun an bia a ngai lo maw, cun a nu/pa kha an ngaih a chiatter zungzal ahcun cun ngakchia kan dawt timi nih cun “kan dawt a timi” cu sullam a ngei maw? Lungthin in a chuakmi dawtnak taktak a si maw? timi hi ruah a phu ngaingai mi a si. Nihin ah dawtmi u le nau hna nang le kei zong cuve bantukin Pathian cu zeitluk in ‘Bawipa, Bawipa’ kan ti i a kan fialmi dawtnak, ngaihthiamnak le dinnak hna kha kan tuah zongah kan zumhnak cu nunnak a ngei lomi zumhnak a si ko lai. 

Pahnihnak ah a duhnak tuah cu zeidah a si? Nihin ah, ‘Bawipa, Bawipa’ a ka timi paoh Vancung Pennak chungah an lut dih lai tinak a si lo. Sihmanhsehlaw Vancung a ummi ka Pa nih tuah hna seh ti a duhmi a tuahmi lawnglawng kha an lut lai, a ti tikah Vancung khua i a ummi ka Pa a duhnak cu zeidah a si. Cucu kan zoh tikah Vancung khua i a ummi ka Pa a duhnak cu a thlahmi Jesuh Khrih zumh kha a si ti zong kha (Jn. 6:29) chungah kan hmuh khawhmi a si. A thlahmi kan Bawipa Jesuh Khrih zumh, cu a thlahmi kan zumhnak cu zeitindah tuahsernak aa tel lomi zumhnak cu a thimi zumhnak a si a ti. “kan Bawipa” a si tiah kan cohlan, kan pom i kan zumh a si ahcun kan Bawipa Jeush nih tuah uh a kan timi vialte zong kha kan tuah ding a si. Cu kan tuah tikah Vancung khua i a ummi a Pa duhnak a tuahmi kan si ve tikah Vancung khua kan i ruahchan bantuk in a lut ding kan si lai. Khrihfa a simi paoh nih nihin ah Vancung kai ding, Vancung luh ding kan i timh ciomi , kan i ruahchan ciomi a si. Asinain kan kaa lawngin kan chim a si ahcun kan tuahsernak kan zumhmi nih a kan chimh bantukin a kan fial bantuk tein, kan zumh ning tein kan nun ah kan i nunpi lo i a bia lawng kha kan theih i kan bia le kan hmurkaa lawngin ‘Bawipa, Bawipa’ kan ti a si ahcun cu Vancung khua cu kan lut kho lai lo ti a si. Cu Ni cu a phak tikah, mi tampi nih keimah cu, “Bawipa, Bawipa! Na min in Pathian bia kha kan chi mi na min in khuachia kha tampi kan ṭhawl hna i khuaruaharnak tampi kan tuah,” an ti lai. Khi tikah annih cu ka thawh hna lai i, ‘Nannih cu aho nan si kha kan hngal bal hna lo. Kal ko u, ṭhat lonak a tuahtu hna,’ tiah ka ti hna lai” tiah a ti. Nihin ah cu chungah kan i tel sual a si ahcun kan nunnak le Khrihfa kan cannak hi zeihmanh a ṭhahnem lai lo. 

Dawtmi u le nau hna, nihin ah online chung kan zoh tikah khuaruahharnak a phunphun tampi, khuachia hna ṭhawl in, mizaw hna damter in an um cio, a ṭha tuk. Kha vialte hi khoika in dah a rami a si ti zong hi Bible zong ṭha tein hlathlai in kha vialte a tuah khotu zong kha Bawipa sinin a rami zong a si kho, Satan sinin a rami zong a si kho, nain kha vialte kha ni hmanungbik ni ah a bia bangin kan i nunpi a si ahcun vanṭha tuk a si lai i kha vialte hna kha kan Bawipa Jesuh a kan chimhmi kan i nunpi lo i Farasi mi bantuk in kan cang sual a si ahcun vanchia tu kan si lai. Cucaah Pathian duhnak tuah kan timi zong Pathian kha kan lungthin dihlak le kan nunnak, kan ruahnak in kan dawt ding le nawlngainak, ngaihthiamnak phunphun vialte zong kha kan nunnak ah kan i nunpi awk a si timi zong kha nihin ah ruah ṭi kan duh hna. Cu bantukin innsatu pahnih bantukin a kan tahchunh. Nifa kan nunnak ah, Khrihfa kan nunnak ah hin Pathian bia kha a thei i a zulmi cu lung cungah inn a samipa bantuk an si e, tiah a ti. Asinain Pathian bia kha a thei ko i a nunpi lomi cu thetse cungah inn a samipa bantukin a kan tahchunh.

Nihin ah dawtmi nu le pa, u le nau hna nihin kan theihmi Pathian bia hi kan i nunpi ko i kan nunnak ah kan zulh a si ahcun lung cungah inn a samipa bantuk kan si lai i thli nih a hranh tikah, ti a lian i thlitu nih a den tikah tluk kho loin fek tein pur loin a um tikah cu mi hna cu nihin thahrip ah kan cannak hi amiak a um lai. Asinain Pathian bia kan theihmi kha kan i nunpi lo a si ahcun ruah a vun sur, thlitu nih a vun hranh tikah a rak cikcek lai i a tlu colh lai i kan nunnak kha zeihmanh san a tlai lai lo ti hi nihin thawngṭhabia chungin kan hmuh khawhmi a si. Asi ahcun nihin ah dawtmi u le nau hna kan nunnak ah hin kan kaa lawngin nifatin kan nunnak hi Pathian duhnak he aa tlak maw tlak lo, ka bia le ka tuahsernak nih hin Pathian sunparnak a langhter maw/langhter lo ti hi nihin thawkin kan nunnak ah ṭha tein i zohfel hna usih. Kan hmurka lawngin ‘Bawipa,Bawipa’ a timi hna siloin Pathian duhnak tuah in Vancung thluachuah a hmumi fanu/pa ṭha kan si khawhnak ding ah hin i zuam cio usih.  

Thazang petu /- Saya William