Sum khawhnak nun cu Khrihfa hna nunzia a si
Bawi Khrih ah zumtu nu le pa hna nan dam ṭha cio hna maw? 2026 June 24, RVA Hakha Chin service in nan kut kan in tlaih hna. Bawipa nih damnak, lawmhnak, hngangamnak, daihnak in pe cio ko hna seh.
Nihin cu Tipil Petu Johan chuahni sunglawi ngai in Bupi nih a kan tuah piak mi ni zong a si. Tipil petu Johan hi kan Bawipa Jesuh Khrih chuahnak ding caah Pathian nih lam sialtu ding, tlangau tu dingah a rak thimmi, a rak thlah mi a si.
Tuzing kan nu Bupi nih cathiang a kan tarpiak mi chungin Isaih 49:1-6, lamkaltu 13:22-26; Lk 1:57-66,80 tiang kha a si. Hi chungah kan hmuh mi cu, kan Bawipa Jesuh Khrih caah lam sialtu ding caah Pathian nih a thimmi tipil petu Johan chuahnak ding le chuahnak kong kha tuzing kan cathiang ah kan hmuh mi a si.
Vawlei cung biaknak hna i pathian hna hi kan zoh tikah minung sinak, i zuam, tuah ṭuannak in pathian a cangmi kha tampi an um i kan Bawipa Jesuh Khrih cu minung tuah ṭuannak in Pathian a cang mi siloin Pathian sinak in minung sinak, cannak tu kha aa lak mi a si ti kha kan cathiang ah fiang tein kan hmuh mi a si. Messiah chuahnak dingah hin a hlaan kan pi in profet hna nih bia an rak phuan, bia an rak chim i cuticun a chuah i khamhnak ding caah rian a ṭuan nak ca zongah hin tlangau piak tu ding, lam a sialpiak chung ca tu dingah hin tipil petu Johan kha a rak thlah chung mi kha kan hmuh mi kha a si.
Tipil petu Johan chuah ni sunglawi tein tuah mi ni a si bantukin kan Bawipa Jesuh Khrih zong nih hin, nu hrin mi vialte lak zong ah hin tipil petu Johan nak in a ngan deuhmi an um lo tiah a ti. Kan nu bupi zong nih hi nun hi cawn ve dingah a kan duh piak mi cu a si. Tipil petu Johan nun cawn dingin tlang a kan tar piak mi ni a si bantukin Khrihfa hna kan timi hi keneh zulh, keneh dawi a si i kan Bawipa Jesuh Khrih keneh kan zulh bantukin kan Bawipa Jesuh Khrih kenneh a langhter tu tipil petu Johan i a nun ning, a ke neh zong kha tuzing caah ah a kan duh piak mi a si.
Tipil petu Johan hi nu hrinmi vialte lak ah a nganbik mi asi, tiah kan Bawipa Jesuh Khrih nih a ti tik ah hin tipil petu Johan hi mirum zong a si lo. Siangpahrang zong a si lo. Asinain zeiruangah dah amah nak in a ngan deuhmi an um lo tiah kan Bawipa Jesuh Khrih nih a ti kan ti a si ahcun a nun ning in “Sum-nun”, a taksa sining hi ai sum i Pathian nih a fial mi tu kha tlam a tlinhnak hnga ding caah Pathian a zoh i taksa sining tu kha ai sum di hmi a si ti kha cathiang ah kan hmuh mi kha a si. A ei-din zong ai sum, khuaihli ti le khaubok kha a ei i, hruk-aih zongah hin saphaw te kha aa aih i, ram hring, hram hno ah siloin thetse rawn ah khan Pathian caah lam kha a rak sial i sual ngaihchihnak ding le Messiah don khawhnak-co khawhnak ding tu kha tlang kha a rak au chungmi kha kan hmuh.
Johan nunzia, sum-nun a ngeih mi te kha kan nih cio zong nih kan i cawn ve ding kha a herh ngaingai. Khrihfa a si mi nih sum-nun ngeih loin, duhpoh in chimrel ve, ei-din ve, duhpoh in cawlcangh ve kha zumtu a si lomi hna he zei hmanh kan i dannak kha zeihmanh a um loh. Kan biachim zongah, bia hrang tibantuk, asilomi mi kong chia ceih tibantuk, kan hmurka in a chuak mi hi i sum kan hau i kan kut ke tuah ṭuannak ah siseh, ei-din kongkau zongah siseh, kan cawlcangh zongah hin kan taksa duhnak kha i sum kha a hau ngaingai mi kha a si. Hawi ei poh ei ve, zu din poh ah din ve, ti sawhsawh in nun kha kan Bawipa Jesuh Khrih hnu kan zulhnak ah hin a si kho lomi, zumhnak karhlaan nak zongah hin tha a kan der ter tu a si ti kha a lang mi kha a si.
Tipil petu Johan cu Pathian nih a fial mi rian kha tlamtling tein a ṭuan khawhnak hnga ding caah a biachim in siseh, a cawlcangh in siseh, hruk-aih in siseh, sum-nun te kha a ngei i, cuticun Pathian nih a fial mi rian a ṭuan kha kan hmuh mi cu a si.
Cucaah dawtmi u le nau hna, kan biakmi kan Pathian, Messiah hi minung sinak in Pathian a cang mi siloin Pathian hrimhrim kha Pathian sinak in minung sinak a cang mi a si bantukin, sual hram ngei loin hrin mi a si bantukin a rianṭuannak, a khamhnak ding caah Pathian nih a fialmi tipil petu Johan zong hi sualnak ngei loin hrin ve mi le, Pathian nih special in ai thimmi minung a si ti kha cathiang ah kan hmuh mi kha a si.
Tuzing caah ah tipil petu Johan i a nun ning, a si ning kan hmuh, kan theih, cathiang ah kan rel bantukin kannih hna zong nih tipil petu Johan a nun ning te kha i cawn in ‘Sum-nun’, kan taksa duhnak sumhnak ngei bu tein Pathian hnu hi a zul mi kan si ahcun tipil petu Johan bantukin Pathian a hmu mi, Pathian cungah zumhnak a fekmi nun kan ngei ko lai ti kha nihin zing caah ah cathiang nih a kan cawnpiak mi a si. Bawipa nih thluachuahnak kan pek piak ko seh. Amen
Thazang petu /- Saya John Chan Uk