Khrihfa hna cu Gospel uk 5 nak kan si

RVA a ngaitu zumtu nan dihlak cungah Bawipa nih thluachuahnak in pe ko hna seh. Tutan Pathian bia in thazang lak ṭi dingah chim ka duhmi cu ‘Pathian nih a kan pekmi kan nunnak in siseh, kan hmurka in siseh, midang kan hawi cungah soiselnak siloin Pathian thangṭhatnak le midang thangṭhatnak caah a hmang ko mi si hna usih’ timi kha chim ka duh mi cu a si. 

Vawlei cungah hmuh khawh a har ngaimi thil pakhat cu zeidah a si tiah cun miding hi hmuh khawh an har ngai. Vawlei cungah miding hi kawl hna u sih law ahohmanh kan hmu hna lai lo. Mah nih a langhter mi cu ‘minung hi ahohmanh a ding dih mi kan um lo’ timi kha a si. Sihmahsehlaw, mah le sual nak aa hmu kho mi hi vawlei cungah kan um ve lo. Mah sualnak, tlamtlin lonak i hmuh khawh timi hi a har ngai mi zong a si ve. Sihmahsehlaw, thlarau lei mit in kan zoh ahcun mah le sualnak aa hmu kho mi hna hi thlarau lei in nu tling pa tling an si timi kha kan hmuh khawh. 

Kan Bawipa Jesuh Khrih nih bia a kan cah tami chungin thazang lak ṭi dingin chim ka duh mi cu “Nan minung hawi kha va soi hlah u” a ti. “Midang cung i na hmanmi tahnak fung kha na cungah Pathian nih a hman ve lai” a ti. A caan ah cun kan mah tlamtlin lonak le kan mah sual nak i hmuh hi a har ngai i midang sualnak hmuh hi a fawi tuk. Midang tlamtlin lonak hmuh hi a fawi tuk. Hihi thlarau lei in kan ṭhan khawh lonak a raung pakhat ah aa tel ve mi cu a si. Thlarau lei in nutling patling a simi hna nih zeidah an chim tawn tiah cun “Nikhat chungah a tlawmbik midang pa 5 hna ṭhatnak kha na chim lai” ti a si. Cutin nan tuah ah cun sualnak tuahnak kha a tlawm i thlarau lei ah ṭhancho nak a si an ti. 

A caan ahcun kan minung hawi ṭhatnak chim hi kan i harh tuk tawn i kan minung hawi an tlin lonak le an chanbaunak chim hi fawi tuk tawn i thlarau lei ah kan khul a nuar tuk tawnnak hi a si. Cu lawng siloin thawngṭha chim kan timi zongah hin phun 2 a um. Pakhat nak cu ‘Kaa’ in thawngṭha chim a si. Pathian nih a kan khamhnak a kan dawtnak kha kan hmurka in kan chim i mi vialte sinah tehte kan khaan. Cucu hmurka in thawngṭha chimnak ti cu a si. 

Pahnihnak cu “Nun” in thawngṭha chim hi a si. Mithiang pawl nih an chim ṭheo tawnmi cu “Kannih zumtu hna hi Gospel a panga(5)nak kan si” an ti ṭheo tawn. 

Dawtmi u le nau hna, nang le kei hi Gospel a 5 nak kan si ti kha i philh hlah u sih. Kaa in thawngṭha chimnak in nun in thawngṭha chim hi midang hna nunnak ah rian a ṭuan deuh tawn i thuk pi in a pil ti kha kan hmuh khawh. Khrihfa kan nunnak ah kanmah le kanmah i thlen hmasat loin zeitik hmanh ah midang nun thlen timi hi a um kho lo. Kanmah le kanmah kan i thlen hnu lawngah midang nun kha va thlen khawh a si. 

Cucaah cun kanmah le kanmah kha i thleng hmasa hna u sih law, kanmah sualnak kha i hmu u sih law, thlarau lei ah nu-tling pa-tling sinak lei ah kar a hlang mi kan si lai i kan nunnak in Pathian kha tehte a khang kho tu fanu fapa, zumtu ṭha kan si lai timi kha nihin caan ah thazang pek kan duh hna. midang soiselnak ah kan nun, kan hmurka hna kha a hmangtu siloin Pathian thangṭhatnak le midang thangṭhatnak ah a hmang kho tu zumtu khan si khawhnak hnga caah Bawipa nih thluachuah kan pe hram ko seh. Amen

Thazang petu /- Saya Simon Hram Ling