Khrihfa hna phuhlam ning

Nihin ni caan zongah a biathiang in thazang i lak ṭi dingin caanṭha caan sunglawi a kan zangfah tu kan biak kan Pathian a min thiang ka thangṭhat. RVA a ngaitu zumtu nan dihlak cungah Bawipa nih a thar in thluachuahnak in pe ko hna seh. (Matt 5: 38-39) “Mit caah mi ve, ha caah ha ve tiin an rak ti tawn kha nan theih. Sihmahsehlaw, kei cu nan cung i ṭhat lonak a tuah tu hna kha lehrul hna hlah u kan ti hna. Nan orhlei biang ah an in bengh hna ah cun khat te lei zong kha chit piak hna u.”

Nihin kan relmi thawngṭha chungin thazang i lak ṭi dingah ka duh bikmi cu Khrihfa pakhat kan si i, phuhlam nak kong he pehtlai in zeitindah Bible thiang nih a kan cawnpiak timi kha zoh ṭi hna u sih. 

Biakam hlun kan zoh tikah phuhlamnak kong, teirul chamnak kong hi tampi kan hmuh khawh hna. Sihmahsehlaw, Biakam thar ahcun Jesuh Khrih nih teirul cham hlah u. Teirul cham cu keimah rian a si tiah a kan cawnpiak. Cun Paul zong nih Rom khuami ca a kuat tik hna zongah khan cuticun a cawnpiak ve hna. Hlan kan pupa hna chan zongah Laimi hna hi teirul chamnak, phuhlamnak hi an rak tuah ngai timi zong kha kan rak theih bal. 

Bible cathiang zoh ṭi dingah ka duhmi cu (Rom 12:18) chungah “Mi vialte he i khawh ding kha a si khawh chungin i zuam u. Phuhlam hmang hlah u. Ka nau le hna Pathian thin hunnak tu nih khan cucu tuah deuh ko seh. Zeicah tiah Cathiang nih pei phulam cu keimah rian a si. Keimah nih ka lehrul hna lai tiah Bawipa nih a ti a ti kha. Cucaah cathiang nih ‘na ral cu a rawl a ṭam ahcun rawl va pe. A ti a hal ahcun ti va pe. Cutin nan tuah ahcun a lu cungah meiṭil na chuah a si lai i ṭhat lonak meiṭil na chuah a si lai’ a ti bang khan va tuah u. Ṭhat lo nak khan i teiter hlah u. Ṭhatnak tu in ṭhat lonak kha tei khawh i zuam u” tiah Paul zong nih Khrihfa bu kha ca a kuat hna. 

Chim ka duh mi cu kan Bawipa Jesuh Khrih vawlei cung a rak rat tikah hin ‘Moses nawlbia hrawh duh ah ka ra lo’ a ti. ‘Tlinter tu dingah ka ra’ a ti. Moses nawlbia kha 600 leng a um i cu vialte cu Jesuh nih a tlang 2 tein a komh. ‘Pathian cu na nunnak dihlak in na dawt lai’ a ti. ‘Na innpa cu nangmah le nangmah naa dawt bantukin na dawt lai’ a ti. A tawinak in kan chim a si ahcun dawtnak in a komh kan ti khawh. 

Cucaah Khrihfa aa timi paoh nih ‘teirul cham cu kan mah rian a si lo. Pathian rian a si. Kanmah nih kan tuah dingmi rian a si lo’ timi kha fiang tein nihin Bible kan rel mi nih hin a kan cawnpiak. ‘Na ral cu a rawl a ṭam ahcun rawl va pe’ a ti. Cun ‘an hua tu hna caah khan thla va campiak hna u’ tiah a kan cawnpiak fawn. 

Mithiang Francis thlacamnak te kha thazang lak ṭi dingah vun chim ṭhan ka duh. Zeitindah thla a cam tiah cun ‘ṭhat lonak kha ṭhatnak in ka lehrul khawh nak caah siseh’ a ti. ‘Huatnak kha dawtnak in ka lehrul khawhnak caah le muihnak kha ceunak in ka lehrul khawhnak caah le zaangennak(Buaibainak) kha daihnak in ka lehrul khawhnak caah le din lonak kha dinnak in ka lehrul khawhnak caah thazang ka pe law’ a ti. 

Hi bantuk lungput hi Khrihfa vialte nih kan ngeih i cu thlacamnak cu kan cam ve a si ahcun vawlei cungah hin rem lonak a lo lai i kan nunnak ah daihnak a um lai i, vawlei hi a nuam tuk lai i kan innchungkhar hi a nuam tuk lai i, kan Khrihfa bu hi aa nuam tuk lai. 

Cucaah ṭhat lonak kha ṭhatnak in a lehrul kho tu le buaibainak kha daihnak in a lehrul kho tu fanu fapa ṭha kan si khawhnak ding caah thlacam nak in pekchan hna u sih. Kan dihlak in Bawipa nih thluacauhnak kan pe hram ko seh. Amen

Thazang petu /- Saya Simon Hram Ling