Jesuh cu innkil lung a si

Nihin ah ruah ding pahnih tein vun langhter ka duh. Psalm 90 chungah hitin a ti “A kan huppheng tu cu Pathian a si” a ti. Himnak hmuh duh ah cung nung bik Pathian a fuh mi le lianngahbik huhphenh nak cungah aa dor mi nih cun ‘Bawipa nangmah cu a ka hupheng tu le a ka chanh tu na si. Nangmah cu ka Pathian na si, nangmah cu kan bochan an ti lai’ a ti. 

“Hmuh lomi thil ṭih nung vialte le thihnak zawtnak chungin him tein an huphenh lai i a thla in an hupphenh lai i him tein na um lai. Zumh awk tlak a si nak nih an hupphenh lai i zaan i a chuak mi ṭih nung kha na ṭih lai lo i mui lak i a ummi rai zong kha na ṭih lai lo” a ti. 

Nihin vawlei ah kan nun tikah vawlei nih a chuahpi mi harnak, ngeihchiatnak, ral ruangah, vawlei kokek harnak ruangah himnak hmuh duh ah chuk le cho ah kan zam hna i cutikah lung rethei vansang in a um mi tampi kan um. Cu vialte chungin himnak taktak kan hmuh nak cu Pathian pakhat lawng hi a si ti kha nihin ah thazang pek kan duh hna. 

Bible thiang nih a kan cawnpiak mi cu “Cung nung bik kha naa bochan i, cungnung bik huhphenhnak chungah naa dor ah cun, na pawngah mi thongkhat an si ko lai. Na velchum zongah mi thonghra an si ko lai. Sihmanhsehlaw, nang cu zeihmanh nih an tawng kho lai lo” a ti. Bawipa i bochan hi zeitluk in dah a ṭhat i Bawipa chungah i dor hi zeitluk in dah a ṭhat ti kha hi Bible ca cang nih hin fiang tein a kan cawnpiak. 

Dawtmi u le nau hna, Bawipa chungah hin i dor hna u sih law Bawipa zohkhenhnak chungah hin kan nunnak, kan zeizong vialte hi i ap hna u sih. Cucu kan himnak a si lai i kan i lawmhnak zong a si lai timi kha nihin kan rel mi Psalm chungin vun chim ka duh. 

Pahnihnak ah vawlei mi nih hawi le kom kan kawl tikah hin  mirum, mifim, mithiam, misang hna hi kan kawl tawn hna. Cun tlangval hna nih ngaknu an kawl tikah aa dawhmi, pumrua a ṭha mi, ca tang sang, mifim thiam, mirum pawl hi an kawl ṭheo tawn hna. Company zong nih rainṭuantu hna an kawl hna tikah mifim, mithiam, catang sang, thil ti kho, min thang pawl hi an kawl tawn hna. 

Sihmanhsehlaw, nang le kei kan biakmi kan Pathian nih cun misual a kan kawl i misual tu kha a kan auh. Misual tu hi hawikom ah a kan ser i misual hna tu hi a kan dawt. Cuasicaah, nang le ke Pathian dawtnak cun Pathian hawikom kan si i, Pathian dawtnak chungah khuasa mi kan si i cuticun Bawipa chungah aa dormi kan si i Jesuh cungah fek tein sak mi inn bantukin a fekmi zumtu ṭha kan si khawhnak ding ca zongah hin hi ka hmun ah thazang pek kan duh hna. 

Cun, a caan ah cun vawlei kan nun lio ah hin hawi le kom nih a kan dawt caan tampi a um ko lai. Nihin kan relmi Gospel (Mark 12:1-12) chungah “Innsa tu hna nih santlai lo tiah an hlawt mi lung cu santlai bik ah a cang. Cu thil a tuah tu cu Bawipa a si i khuaruahhar a si kha kan hmuh tiah aa ṭial mi kha nan rel bal lo maw” tiah a ti. 

Jesuh Kha Judah mi hna nih an kom lo i an hlawt. Jesuh hi zeiruangah dah Judah mi hna nih an rak cohlaan khawh lo i an rak hlawt timi kan zoh tikah Jesuh hi a niam tuk mi dirhmun in, phungdang in kan chim ah cun caw rawl einak kuang chungah a chuak. Toidor le niam tein a umnak raungah hin Judah mi hna nih an rak cohlaan khawh lonak a si. 

A caan ah cun kan hawikom nih an kan hlawt caan tampi a um ko lai. A kan dawtu tiah kan timi hna nih hin an kan kal tak i an kan hlawt caan zong tampi a um ko lai. Kan hawikom ṭhabik tiah kan ti mi hna zong nih an kan hlawt caan tampi a um ko lai. Mi nih zei an kan rel lo i hlawt mi zong kan si ko lai. Sihmahsehlaw, Pathian nih cu zeitik hmanh ah a kan hlaw lo i, zeitik hmanh ah a kan kal tak bal lo i; Pathian cu Emmanuel Pathian a si i kan sinah a kan umpi zungzal, kan mah he a um zungzal timi kan theih ko a si ahcun zeitik hmanh ah kan lung a dong kho lai lo i vawlei nih hin a kan tei kho lai lo i sualnak nih hin a kan tei kho lai lo. 

Jesuh cu kan ‘Inn kil lung’ a si i Jesuh cu a kan huppheng tu a si i, Jesuh cu kan teinak a si. Jesuh cu kan i lawmhnak a si i, Jesuh cu kan hnangamnak a si. Daihnak zong Jesuh sin in hmuh khawh a si timi kha nihin ni caah thazang pek kan duh mi hna cu a si.