Thlarau le a rianṭuannak
Nihin ni caah Bupi nih a kan thimpiak mi cathiang hna cu (Lamkaltu 14:5-18, Jn 14:21-26) hna hi an si.
Thlarau timi kong he pehtlai in kan nu Bupi nih zeitin dah a kan cawnpiak timi kha phun 2 in ka vun langhter lai. Pakhatnak ah “Thlarau cu Pathian a kan hmuhsak tu – a kan hngalhter tu a si.” Cun zumhnak i phuannak, lamkaltu hna zumhnak an phuannak ah hitin kan hmuh: “Pa le Fapa sin in a chuak mi a si” a ti. Pa le Fapa he sinak an i khat a ti. Cucaah Thlarau cu ṭhawnnak sawhsawh lawng siloin minung zong a si timi kha bupi nih a kan cawnpiak mi cu a si.
Jn 16:13 chungah “Biatak phuangtu” a ti. Jn 7:37-38 zongah “Thlarau cu ti” he a tahchunh. Cun Luke 12:49 chungah cun “Mei” he a tahchunh. Maṭhai 3:16 chungah “Ṭhuro” he a tahchunh. Nihin kan relmi Johan 14:26 chungah cun “Bawmtu a si” a ti. “Sihmanhsehlaw ka Pa nih ka min in a run thlah laimi Bawmtu, Thiang Thlarau nih cun zeizong vialte kha an cawnpiak hna lai i kan chimhmi vialte hna kha nan lung an pemter hna lai” a ti. Bawmtu Thiang Thlarau tiah a ti kha kan hmuh.
Cucaah Thiang Thlarau cu nifatin kan rianṭuannak, kan cawlcanghnak vialte cungah lam a kan hruaitu le a kan umpi tu a si timi kha kan hmuh khawh. Khrihfa kan sinak ah a biapi ngaimi pakhat cu ‘Khrihfa pakhat nih zumhnak lei ah nikhat hnu nikhat kar kan hlaan chinchin i puitling mi Khrihfa kan si khawhnak hnga ding caah kan herhmi cu Thiang Thlarau lam hruaimi le Thiang Thlarau nih a um pi mi kan si a herh.’ Mithiang Paul nih Rom Khrihfa hna sin ca a kuat hna tikah, “Khrihfa Thlarau a ngei lomi cu Khrih ta an si lo” Rom 8:9 ah a ti. Kannih vialte hna zong Khrih Thlarau a ngeitu kan si hna maw? Khrih Thlarau a ngei lomi kan si sual ahcun Pathian ta kan si hnga lo.
Dawtmi zumtu u le nau hna, Thlarau sawm in Thiang Thlarau nih lam a hruaimi, a um pi mi Khrihfa kan si khawhnak hnga ding caah i zuam hna u sih tiin thazang pek kan duh hna.
Efesa 5:18 chung “Zu ri hlah u, zu cu nanmah hrawktu lawnglawng a si ko, Thlarau tu khan khat deuh u” a ti.
Nifatin kan nunnak ah Thiang Thlarau he a khat mi, Thiang Thlarau nih a hruaimi Khrihfa ṭha kan si khawhnak hnga ding caah nihin kan relmi thawngṭhabia nih a kan forh mi cu a si. Khrihfa mi hna nih kan i ralrin awk a simi cu 1Theselon 5:19 chungah “Thiang Thlarau kha a ngaihchiat ter hlah u” a ti. Nihin zumtu tampi nih cun Thiang Thlarau kha a ngaih kan chiaṭer i Thlarau kan doh caah kan nun lam ah Thiang Thlarau rianṭuannak a um lo i, Thiang Thlarau kha a lawm lo i Thiang Thlarau a ngaih kan chiaṭer caah Thlarau lei ah kar a hlang kho lomi zumtu tampi zong kan um.
Thiang Thlarau kha a ngeihchiaṭer tu si loin a lawmhter kho tu, Thiang Thlarau nih a umpi mi, lam a hruaimi zumtu ṭha, Khrihfa ṭha kan si khawhnak hnga ding caah Bawipa nih thluachuahnak kan pe hrma ko seh. Amen