St. Vincent Ferrer, Priest (1350-1419)

Audio (aw) zongin ngai khawh a si. 👇👇

St. Dominic Zateik bu in phungchim leiah minthang bik a simi St. Vincent Ferrer cu 1350 kum ah Spain ram, Valencia khua ah a chuak. A nu le a pa nih misifak hna dawt thiamnak, cacawn nithum ni le zarhteni ah rawl-ulhnak le Jesuh le Nu Mary upat thiamnak kha an rak cawnpiak. 1374 kum ah St. Dominic Zateik bu ah a lut i a min a thang i mitampi nih theihmi phungchimtu pakhat ah aa chuah. A phungchimnak cu hmunkip ah a hleikhun in teinak a hmu. A hawi Siangbawi hna kha ‘Phung nan chim tikah a fiang i theih a fawimi biafang kha nan hman lai, mi tamdeuh nih theihmi holh kha nan hman lai i tahchunhnak hna nan telh lai, phung ngaitu hna lungthin ah keimah pakhat lawng hi a ka chimh tiin an ruah khawh tiang nan tuah hna lai. A har i aa tuaitam mi phungchimnak cu mizaran nih ṭha tein an thei kho lai lo’ tiah a chimh hna.

St. Vincent cu Europe ram vialte a vaak i sualnak kong, thihnak kong, Hell kong, zungzal nunnuamhnak Vancungram kong le minung hi duhsah tein hmanungbik hiaceihnak ni lei ah kaarhlang mi kan sinak kong hna kha a bikin a rak chim. A phungchimnak a rak ngai balmi, mi tamdeuh cu an sualnak an i ngaichih i an sualnak an cohlan khawh tiang a phungchim a ṭhatuk mi Mithiang pakhat a rak si. Siangbawi tampi nih an rak zulh i a rian kha an rak bawmh. Amah a bawmtu, khualtlawng ṭimi Siangbawi hna kha ‘Sualthlah nan ngaihpiak hna tikah dawtnak hmai nan sakter lai, zaang dermi hna kha nunnem tein tha nan pek hna tikah siseh, a lung a khongmi kha Pathian ṭihzah awk nan cawnpiak hna ah siseh lungthin thiangin dawtnak a kan forh timi an theih khawh tiang nan chimh hna lai’ tiah lam a hmuhsak hna. St. Vincent Ferror cu 1419 kum ah France ram, Venus khua ah a hnubik phung a chim liopi ah a thi.