Bawipa Thisa cu kan Nunnak a si

Nihin cu kan nu Bupi nih a thiang nili ni (Holy Thursday) nipi a kan tuahpiak i cu ni ah kan Bawipa Jesuh Khrih nih a Thi le Sa taktak a sernak, Tlangbawi cannak nawl a pek nak ni a si. Tlangbawi hna hi kan Bawipa Jesuh Khrih a Thi taktak a Sa taktak a ser kho tu an si. Kan Bawipa Jesuh Khrih nih nawl a pek bangin Amah Thi le Sa a canter kho tu hna hi Tlangbawi hna lawng hi an si. Siangbawi hna lawng hi an si. 

Tlangbawi hna hmangin, kan Bawipa Jesuh Khrih nih a Thi le Sa , changreu le mitsur hang hmangin an ser tik ah hin Bawipa Thisa taktak sinak kha zumh hrim ding mi a si. Kan Bawipa Jesuh Khrih a Thi le Sa a um lo a si ahcun Khrihfa kan nunnak hi tlam a tling kho lomi, kan nunnak a rocar ding mi, nunnak a ngei lomi a si. Zeicah tiah cun, Jn 6:51 “Vancung in a rungṭummi nunnak changreu cu Keimah hi ka si. Hi changreu a ei mi paoh cu zungzal in an nung lai. Ka pek dingmi hna changreu cu ka sa hi a si. Cucu zeidah ka pek hna tiah cun vawlei hi a nunnak caah a si” tiah a ti. (Jn 6:53-56) chungah a vun peh rih mi cu “ Biatak kan chimh hna. Mi Fapa ka sa hi nan ei lo i ka thi hi nan din lo ahcun nan chungah nunnak nan ngei kho lai lo. Ka sa a ei i ka thi a dingmi paoh nih zungzal nunnak an ngei i hmanungbik ni ah nunnak ah ka thawhter hna lai. Zeicah tiah rawl taktak cu ka sa hi a si i din awk taktak cu ka thi hi a si. Ka sa a ei i ka thi a dingmi paoh cu ka chungah an nung i kei zong an chungah ka nung ve” tiah a ti. 

Bawipa a Thi le Sa hi din awk taktak, ei awk taktak a si i, amah thi le sa kan ei tikah amah he pumkhat kan si i a chungah kan um i kan chung zongah kan Bawipa Jesuh Khrih pumpak in a um ve timi hi kan hmuh khawh mi a si. Cu Bawipa Bia cu kan zumh lo a si ahcun zumtu taktak kan si lo. Mitsur hang aa lak i, changreu aa lak i, hihi ka Thi le ka Sa taktak a timi hi nang le kei nih philh lo nak menmen in kan hman ding a si lo. Kan zumh ding hrimhrim a si. Tlangbawi hna hmangin an ser tikah hin kan Bawipa Jesuh Khrih ‘Thi le Sa’ taktak ah a cang ti hi zumtu Khrihfa hna nih kan zumh ding a si. Cucaah, kan Bawipa Jesuh Khrih a Thi le Sa hi kan ei dingmi a si, kan din dingmi a si. Cu ken ei, kan dinnak thawngin zungzal nunnak timi hi, kan chungah Thlarau nunnak kan ngei lai timi a Bia thiangah kan hmuh khawhmi cu a si. 

Ramcar chungah Israel mi hna kum 40 chung Pathian nih Manna changreu in a cawm hna. Cun an ti a hal tikah Moses hmang in lungpi chungin ti zong a chuahter i an dang carnak vialte zong an di a riamhter hna. Cu nih zeidah a langher tiah cun, Manna a simi le ti a si mi cu, kan Bawipa Jesuh Khrih a Thi le Sa hi hmelchunhnak ah a rak langhter mi a si. Kan Bawipa Jesuh Khrih a Thi le Sa a can dingah hin Biakam hlun chungah Pathian nih a rak timhcia mi a si. 

Cucaah kan nu Bupi nih: (CCC1324, 1327) chungah “Bawipa Thi Sa Sacrament cu Khrihfa hna kan nunnak ah a hrampi le a sangbik mi a si” a ti. Cun a peh rihmi cu “Bawipa Thisa Sacrament cu zumtu hna kan zumhnak funtomtua si” tiah Bupi a kan cawnpiak. 

Kan Bawipa Jesuh Khrih Thi le Sa hi a um lo sual a si ahcun kan nu Bupi hi nihin ni tiang fek tein a dir kho lai lo. Cucaah, kan Bawipa Jesuh Khrih hi kan ei, kan din dingmi a si i, kan nu Bupi i a hrampi zong a si. Kan nu Bupi a thinlung zong a si. Cucaah, Bawipa Thisa kan ei, kan dinnak thawngin nang le kei zong zungzal nunnak a ngei dingmi kan si. 

Mirang nih hitin an ti: “na ei mi bangin na si” an ti. Bawipa Thisa kan ei hna ah Amah Jesuh he kan i lo hna timi kha kan zumh ding a si. 

A donghnak ah chim ka duh mi cu “Changreu tang te ah a ummi Jesuh Khrih kha nifatin kan nunnak ah zumhnak he, lungawṭawmnak zeihmanh ngei loin kan ei, kan din a si ahcun amah he pumkhat kan si lai i, cu kan ei kan dinnak thawngin nang le kei zong, a Bia bangin zungzal nunnak a ngei mi kan si lai.