Pathian cu Ṭhentu asilo, Fonhtu a si
Pathian bia in thazang a la tu nan dihlak cungah lunglawmhnak tampi ka ngei. Nihin voikatnak kan relmi (Ezekiel 37:21-28), Sam (Jeremiah 31:10-12), Thawngṭha bia (John 11:45-56) chungin tlangtar ka duhmi “Pathian cu aa ṭhentu asilo aa fawnhtu asi” timi in thazang i lak hna u sih. “Ral cu ṭihding asilo ṭih nungbik mi ral cu kan mah le kan mah kan i rem lo mi hi asi” tiah ralbawi Bah Htoo nih a rak ti.
Nihin a voikhat nak kan relmi (Ezekiel 37:21-28) chungah Bawipa nih hi bangin a ti. “Israel mi cu ṭhek an sinak miphun chungin ka lak hna lai i hmunkhat ah ka pumh hna lai. Pennak pahinh ah an i cheu hrimhrim lai lo. Siangpahrang pakhat nih a hruai hna lai i a uk hna lai.” a ti. Ṭhennak, cheunak a duhmi asilo timi hi a voikhat nak kan relmi Pathian bia chungah kan hmuh. Ṭhennak, cheunak nih teinak a chuahpi lo.
Ka theih bel mi cu Malaysia hi miphun phunthum in khua sak nak a rak si. (Tuluk miphun, India miphun, Malaysia miphun) Miphun phun thum in khuasa mi an rak si. Cucaah an kar lak ah lungrual nak a um kho lo, remlonak tampi a chuah caah 1957-58-59 chung President rian a rak ṭuan mipa nih “Malay ram cu miphun phunthum in khuasaknak a rak si bantuk in miphun phunthum in khua sa mi kan rak si. Sihmanhsehlaw, kan dihlak hi miphun pakhat kan si. Zeicah tiah Malay ram chungah a um mi lawngte kan si. Cucaah Tuluk, India, Malaysia timi hi a um ti lai lo. Kan dihlak hi (1) Malaysia kan si cang.” timi bia ka khat ruangah lungrualnak an rak ngei i teinak an rak hmuh.
Nihin Sam chungah relmi (Jeremiah 31:10) chungah “Israel cu a ṭhek tu nih khan a pumh ṭhan hna lai i tuukhal nih a tuurun a zohkhenh bangin a zohkhenh hna lai” a ti. Thawngṭha bia kan relmi (John 11:52) chungah “Jesuh cu Judah mi hna cah lawng siloin Pathian fale aa ṭhek mi hna kha hmunkhat i pumhdih awk ah a thi lai” timi kha kan hmuh. Kan Bawipa Jesuh cu vailam cungah a thihnak chan cu aa ṭhen i aa ṭhek mi vialte hmunkhat ah fawnhṭhan ding timi kha nihin Thawngṭha bia kan relmi chungah kan hmuh. (Efesa 2:14-15) chungah “Judah le Gantle mi hna kha miphun pakhat ah a ser hna. Hi miphun pahnih chungah hin a mah he aa pehtlai mi miphun pakhat sih a duh caah asi. Vailamcung a thihnak thawngin kan nih Khrih nih an i ralnak kha a hrawh. Vailamtahnak cu an i ralmi miphun pahnih cu pakhat ah a fawnh tu asi timi kha kan hmuh. (Genesis 1:26) ah minung cu Pathian muikeng in sermi kan si caah zumtu siseh, zumlo tu siseh, misual siseh, miding siseh Pathian fa lawngte kan si dih.
Cucaah nihin voikhatnak Bible kan relmi in siseh, Psalm chung kan relmi in siseh, thawngṭha bia kan relmi chungin siseh “Pathian cu aa ṭhek mi vialte a fonhtu asi” timi kha nihin thawngṭha bia nih a kan chimh. A ngai tu nan dihlak cungah Bawipa nih thluachuah in pe ko hna seh. Kaa lawm.