Thil ṭha tuahnak ah Pathian muisam a lang

Nihin kan relmi cathiang hna cu Jer 20:10-13, Jn 10:31-42 an si. “Ka pa nih a ka fialmi thil ṭha tampi nan hmai ah ka tuah hna. Hi thil hna ruangah hin a zei ruangah hin dah lung in cheh nan ka duhnak cu a si’ tiah a ti hna. Judah mi nih cun, ‘lung in cheh kan in duhnak cu thil ṭha ruangah a si lo. Pathian nan sersat ruangah khan a si deuh. Nang cu minung menmen na si ko nain Pathian ah ser naa tim’ an ti. Pathian nih a bia a pek mi minung hna kha pathian ti an si ahcun, cathiang cu a palh ti khawh a si lo va si kaw, Pa nih a thim i vawlei ah a run thlah i keimah nih Pathian Fapa ka si ka ti ruangah Pathian nan sersat tiah zeitin dah nan ka ti khawh. Ka Pa rian ka ṭuan lo a si ah cun ka zum hlah u! Sihmanhsehlaw ka ṭuan a si ah cun keimah nan ka zumh lo hmanh ah ka tuah mi thil tel hi nan zumh awk a si.”

Dawtmi u le nau hna, Jn 10: 24 ah Judah mi nih khan an fuh i zei can dah lungaw ṭawm in nan kan chiah lai. Biafiang kan chim, Messiah cu na si maw? tiah Jesuh kha bia an hal. Jesuh Khrih cu an zoh tikah Thlarau sinak in hmu kho loin vawlei taksa sinak in a rat lawng kha an hngalh i ‘hi pa hi cu Joseph le Mary fapa si’ ti men lawng in an hmuh, an hngalh. Pathian nih Khamhtu dirhmun in a thlah mi Fapa a si tikha an hmu kho lo. Jesuh Khrih cu Khamhtu a si nak kha a rianṭuannak in Pathian muisam a leng ko nain vawlei sinak, a chuahkehnak lawng kha an zoh caah Khamhtu sinak in an cohlang kho lo. 

Mat 11: 2-6 ah, tipil pe tu Johan kha thong an thlak lio ah Khrih nih a rianṭuannak kong kha Johan nih a theih tikah a lam kal tlawmpal kha a va thlah hna i ‘a ra dingmi cu nangmah hi na si maw, a siloah midang kan hngah rih lai tiah va hal u’ tiah a fial hna. Jesuh nih nan hmuh mi le nan theih mi hi Johan cu va chim ko u. Mitcaw nih khua an hmuh nak le ke bei an kal khawhnak le mi thinghmui an thiannak le hna chet nih khua an theihnak le mithi thawhṭhan an si nak le mi sifak mi hna sinah Thawngṭha chim a si nak hi va chim ko u. Keimah kongah lungawṭawmnak zeihmanh a ngei lo mi cu an caah lunglawmh awk a va si dah’ tiah Jesuh nih tipil petu Johan hnu zultu pawl cu bia a funh hna. 

Jesuh thil tuahnak vialte hna cu khuaruahhar an si. Minung taksa sinak in tuahkhawh a silo mi vialte Jesuh nih a tuah khawh dih hna i thil ṭha hna tampi cu mi hna caah a tuah. Cucu, Tipil petu Johan hnu zul pawl nih an zumh tikah Jesuh Khrih kha an zumh i a hnu in an zulh. Phungthluk ah a ummi cu “Kaa in fakpi in phuan mi nak in, nun in chimmi hi a aw a thang deuh” ti a si. Nitin te kan nunnak ah Khrihfa nunzia in Khrihfa i kan ngeihmi thinlung put in kan biachim, kan holhrel kan tuah ṭuannak, mi cung i zangfahnak kan ngeihmi vialte hna hi Pathian muisam a kengmi thil an si hna i mi zawn ruahnak, nu hmei pa hmei hna kilven zohkhenh hna hi Pathian muisam ken cu a si. 

Vawlei cungpi nih theih mi Mother Teresa cu a ram ramrum a si ko nain vawlei cung harsa hna tambiknak ram, ngakṭah tambiknak ram, India ram ah mission rianṭuan dingah aa thim. India ram Kalkata ah cawmtu ngei lo, nu le pa ngei lo, hlawtmi fa pawl cu Mother Teresa nih a lak hna i a cawm hna. A ka in Pathian bia, Thawngṭhabia tampi a chim mi a si lo nain a nun in Thawngṭha a phuan i a tuahmi, a phuan mi Thawngṭha vialte cu Vawlei cung vialte a hnihdih ti a si. Khrifa a hua ngai mi Russia ram nih Mother Teresa nih a tuah mi thil vialte kong cu an theih tikah kan ram zongah rak ra ve law ngakṭhan cawmnak na tuah lai tiah Khrihfa a hua ngai mi Russia rampi nih an sawm. 

Mat 5:16 ah “Cuticun thilṭha nan tuah mi kha an hmuh lai i vancung khua i a ummi nan Pa kha an thangṭhat lai” tiah kan Bawipa Jesuh Khrih nih a kan chimh tak. Dawtmi u le nau hna, kan hmurka lawngin siloin kan nun in Jesuh Khrih a zumtu kan si bantukin kan nun in Thawngṭha hi phuan khawh i zuam hna u sih. Jesuh Khrih zohchih in thil ṭha kan tuah mi paoh ah kan biak kan Pathian a muisam dawh a lang i cucu zum lo tu hna zong nih kan nun kha zoh in kan biak kan Pathian cu hmu ve in vancung a ummi Pa Pathian cu an thangṭhat khawh ve nak hnga ding caah i zuam cio ve hna u sih.