MINUNG I A DANGTE UM KHAWHNAK
Minung hna cu pakhat hnu pakhat aa thleng i a rak chuahnak kong kan cohlan hmanh ah pakhat hnu pakhat thlennak zumhnak nih a fianter khawh lomi pumpak pakhat cio he pehtlaimi a dangte umnak kha nawl a ngei. Mikip cu pumpak hleikhunnak kha kan ngei cio i midang hna he siseh, Pathian he siseh, tlaihchan tein i komh in umkhawhnak kha ngeih a si. Kannih cu hngalhthiamnak thluak kan ngeih caah khuaruah tuaktan in kan chim kho i bia-alnak hna zong kan tuah khawh, ruah in thil thar chuahter rianṭuannak a cangmi thil hna cungah sullam fianternak, zuk pachi suainak le a dang relcawk lo thil tikhawhnak hna ngeihnak cu physic le Zoology ram kha lonh in a dangte um (dir) khawhnak kha a langhter.
Vawlei i thilri chawva thilnung saram hna a lai ah hngalhnak thluak a ngeimi minung hna an rak chuahnak hi khuaruahhar a si i cucu Pathian nih dairek in a sernak le a nungmi in umnak, mah pumpak he tlaihchan le daw tein hawikomhnak hna caah Pathian nih a kan sawm peng ti a fiang.
Bible thiang chungah a langhter mi sernak konglam cu, minung hi thilri chawva dot ah ṭhumh khawh a si lomi thilnung hna an sinak kong langhter i ruat cio dingah a kan sawm.
Sihmanhsehlaw a nungmi a dang thilnung hna zong minung nih duhpaoh uknak tangah a ummi thil an si tiah ruah ahcun a palh lai. Kokek vawlei kha minung caah a miak laknak, hman awk menmen an si tiah ruahnak cu minung phu caah a chia ngaimi ahnu pehzulh a chuahter.
Thazaang a ngan lawng a hmaan tiah tiin, nawlngeihnak thazaang kha thangṭhatnak ningcang hna cu a herh lomi ahnu pehzulh a simi, minung pakhat le pakhat aa khah lonak, dinfal lonak, minng tamuak kha a ralchan i ṭhihphaih rianṭuannak hna kha a chuahter i, vawlei chungchuak thilri hna cu teitu vialte nih a ngeih lai tiah an timh bangin hmasabik a phanmi thazaang a ṭhawngmi kut ah a phan kho. Hi ningcang he aa ralchanmi ningcang cu Bawipa Jesuh nih a biatung a rak dirhmi, minung pakhat le pakhat daw tein i komh in umnak, ningcangte sinak, Unau ṭafar thinlung ngeihnak tiah zohchunh awk tlak hna an si.
Miphun dang (lawkihmi) hna Siangpahrang cu rammi hna cungah aana hmangzau in siseh, uktu bawi hna cu an kut tangmi hna cungah aana in an hrem tawnmi kha siseh, nannih nih nan hngalh. Nannih tu nih cun cuticun siter in nan tuah awk a si lai lo, Nanih lak i pakhat nih ngan a duh ahcun nan sinum a si awk a si. (Mt. 20:25-26).
Van le vawlei dihlak a ṭhangcho i a sangbik dot phanh khawhnak hmuitinh (kawltung) cu Pathian i tling cikcek a sinak dot kha a si. Cu tlin cikceknak cu Bawipa Jesuh Khrih thihnak in a thawhṭhannak ah khan a ṭuan chuah i a tlingcang mi a si.
Hika zawnah thilnung saram dang hna cungah minung nih hremnak, ṭuanvo tlolh in uk chihnak hna kha hlawt awk, a dang i al leng awk a simi konglam pakhat kha an hmuh cio. Thilnung saram vialte kha a ser tikah tinhnak kawltung kha minung hna cungah kan hmu kho lo. Thilnung saram vialte cu kannih he hmunkhat in, ka min thawngin Pathian timi aa khat in i hrawmmi kawltung leiah kal cio a si. Mi nih banh khawh lomi tling le rumnak ah a thoṭhanmi Jesuh Khrih cu zeizongte kha kutphar in a don hna i tleu ngai in a ceu ter.
Theihthiamnak le dawtnak kha a pekmi minung hna cu Bawipa Jesuh a tlin cikceknak in lemsoi a ing i thilnung saram vialte sertu sinah hruai in kalpi dingah sawmnak kan in cu a si.