Sual i ngaihthiam timi cu Pathian sinin a ra mi Fimnak a si

Nihin ni caah Bupi a kan timhpiakmi Cathiang hna cu, Jer 18:18-20; Matt 20: 117-28 an si. “Ra tuah u, Jeremiah hi zeitindah kan tuah lai, i ceih tuah u sih an ti. Kannih lam a kan hruaitu ah tlangbawi an um ṭhiamṭhiam ko lai. Fim a kan chimtu ah mifim an um ṭhiamṭhiam ko lai i Pathain bia a chimtu ah Profet an um ṭhiamṭhiam ko lai. Ra u law a cungah bia kawl tuah u sih. A bia cu zeihmanhah rel hlah u sih an ti.”

Dawtmi u le nau hna nihin kan relmi cathiang hna in thlarau fimnak tawi tein ruat ṭi hna u sih. Kan Diocese chungah, kan Parish chungah, kan peng kan khua chungah Pathian rian a kan ṭuan piaktu a kan hruaitu hna kha kannih hna nih zeitindah kan hmuh tawn hna. Minung cu kan duh ningin pakhatkhat nih an nun khawh lo tikah an kong chiat chim hi kan i foih tukmi a si tawn. Sihmahsehlaw an ṭhatnak chim le an i dawhnak chim phuan cu kan i harhngai tawn. Pathian thluachuah thawng tein nihin ni tiang Pathian rian a kan ṭuanpiaktu, thlarau lei in lam a kan hruaitu hna kan i ngaih rih ko hna. Zeitluk in dah kan sunlawih hna timi kha ruat ṭhan hna u sih. Zeicah tiah cun an nih hna cu Thlarau lei in lam a kan hruaitu an si caah a si. 

Mi hna nih Jeremaih cu, ‘Zeitindah kan tuah lai, i ceih tuah u sih’ an ti. Profet kha an zohchuk tikah hi bia hna hi an sin in a hung chuak mi a si. ‘Amah a um lo zongah a poi lo, midang pakhatkhat an um ko lai cu teh’ timi ruahnak hi mi hna nih an ngeihmi ruahnak cu a si. Kannih lam a kan hruaitu ah tlangbawi an um ṭhiamṭhiam ko lai. Fim a kan chimtu ah mifim an um ṭhiamṭhiam ko lai i Pathian bia a chimtu ah Profet dang an um ṭhiamṭhiam ko lai’ tiah an rak ti. Sihmahsehlaw, atu lio caan ah kan i ngeihmi a kan hruaitu Siangbawi te, Saya te, Sister te hna hi kan sunlawih thiam hna lo i an chiatnak le an ṭhatlonak lawng te kan kawl chim kan i zuam a si ah cun, kan ngiar hna a si ahcun kan cungah thil ngaihchia a tlung kho mi a si. 

Mi pakhat le pakhat taza an i cuai tikah တရားသူကြီး pa nih chikhat te ah bia a khiak colh tawn lo ti a si. Caan saupi lak in, chawva tampi an dih tiangin pakhat le pakhat cungah remnak ngeih le dawtnak ngeih cu zeitluk in dah a ṭhat timi kha theihter nak hnga ding caah biakhiahnak caan kha saupi an lak tawn ti a si. Zeicah tiah fimchimh an duh hna caah a si. Pakhat le pakhat taza cuai cu thil ṭha lo a si, hmai lei ah tuah ti hlah u timi fimchimh an duh hna caah zong ah a si tiah an ti tawn. 

Thlarau lei zongin a kan hruaitu hna kha bia ṭha lo, ruahnak ṭha lo in kan ruah sual hna a si ah cun zeizong te a uktu le Biaceihtu a simi Pathian nih ‘Fim deuh hna seh, pakhat le pakhat i dawt hi zeitluk in dah a ṭhat timi hi thei deuh hna seh’ tiin caan saupi lak in Pahtian rianṭuantu hna kan sin in an lak sual a si ah cun ahodah kan caah thla a kan campiak lai? Ngaihchiat caan, lunglawmh caan ah ahodah kan caah Pathian sinin thluachuah a kan hal piak lai timi zong kha ruat thiam hna u sih. Cuasicaah, kan i ngeihmi Pathian rianṭuantu hna hi daw thiam hna u sih, an man ngeihnak hi hmuh piak thiam hna u sih. An caah thlacampiak hna u sih. 

Minung cu ahohmanh a tling mi kan um lo. Pathian rianṭuan tu hna zong thazang dernak he a nung mi an si ve. Teinak an hmuh khawhnak hnga ding caah thlacam bawm hna u sih. Cucu kanmah hna cio i kan rian zong a si. “Ra u law, a cungah bia kawl tuah u sih. A bia cu zei ah rel hlah u sih” tiah mi hna nih Jeremiah kha an rak ti. Kannih hna zong a kan hruaitu hna kha an cungah bia ṭhalo kan chim sual kan puh sual hna a si ah cun Pathian nih caan saupi lak in fimchimh kan si ve sual lai. Thlacampiaktu kan ngeih ti lo, thluachuah a kan hal piaktu an um ti lo a si sual ah cun ngaihchia kan si sual lai. An ca tu ah khan thlacam piak hna u sih, pakhat le pakhat i rem i daw tein um khawh tu kha i zuam hna u sih. 

Maṭhai 20:17 “Jesuh nih cun Jerusalem khua lei i an hung kal lio ah khan a zultu 12 kha kaa dangah aa kalpi hna i anmah lawngin bia a ruah hna” tiah a ti. Zei kong dah a ruah hna hnga? “Mi fapa hi tlangbawi upa pawl le phungbia cawnpiaktu saya pawl sinah khan an ka pek lai i thahawk a si tiah sual an ka phawt lai” tiah a ti. 

Thaizing kiptuh ah zei kan ton hnga ahohmanh nih kan thei kho lo. Minung kan si caah kan ruahnak hi limit a ngei. Kan ton te hnga dingmi, harsatnak kan ton hnga dingmi vialte hi Bawipa nih a kan hmuh piak cia dih ko. Zultu kha Bawipa hmundang te ah kal pi in a cawnpiak hna bantuk tein khan kan nih hna zong a cang kho te hnga ding mi ‘I theihpalhnak te te an hun um tikah’ nan ngeihchia hlah u, nan lung dong hlah u. Pakhat le pakhat zong sual i phaw hlah u. Keimah cungah zumhnak ngei u, cun ka Pa cung zongah zumhnak ngei u” tiah a ti bantukin Pathian bia cungah te ah khan zumhfek tein kan um khawh a si ahcun ngeihchiatnak, tukforhnak hna hi tei khawhnak thazang kan ngei ko lai. 

Pakhat le pakhat sual i ngaihthiam timi cu “Thlarau fimnak a si.” Hi thlarau fimnak, i ngaihthiam khawhnak hi Khrihfa vialte nih kan tuah khawhmi a si ko. Hi thlarau fimnak te hi kan ngeih khawh, kan tuah kan zulh khawh a si ahcun kan Parish, kan community, kan innchungkhar chungah, kan khua kan ram ah lawmhnak daihnak a um ko lai. Cu a si caah pakhat le pakhat caah thla i campiak zungzal ko hna u sih. Thazang i pe hna u sih. Pathian sinin ngaihthiamnak thazang zong hal hna u sih. Kan thlarau caah himnak a kan pe kho tu hnga dingmi Pathian sual ngaihthiamnak zong kan co khawhnak hnga ding caah pakhat le pakhat i rem tein le i daw tein um khawh i zuam hna u sih.