Nawlngaihnak in Nunnak lei ah
Dawtmi u le nau hna, nihin Bupi nih a kan thimpiak mi Cathiang hna hi vun ruat hna usih. Pakhatnak ah Profet Isaiah 1:1-10,16-18/ Mt 23:1-17 tiang hi nihin kannih nih kan ruat ding a si lai. Dawtmi u le nau hna, nihin Profet Isaiah nih a kan cawnpiaknak chung ahhin Bawipa na Pathian i a bia kha na ngaih a si ahcun; nawl ngai na cawn a si ahcun ram chung i rawl vialte, a chuakmi vialte kha nangmah ta a si dih lai ti si. Cun Bawipa nawl ngai na duh lo le na lung khawn a si ahcun nangmah lila kha na vainam lila in khan na thi lai, a ti ning ahcun na vainam nih nangmah kha an thah lai, nangmah an ei lai tiah Profet Isaiah nih a chim.
Cucaah dawtmi u le nau hna, hika ahhin nawl ngainak le nawl ngai lonak hi Bawipa Pathian nih a kan cawnpiak i, nawl ngaimi kan si ahcun ram chung i thluachuahnak tampi kha kanmah ta a si lai. Cun nawl kan ngai duh lo, kan lung khawn a si ahcun kanmah kan nunnak lila kha kan vainam in khan kan i hrawk lai, kanmah le mah lila kha kan i hrawk lai tinak kha a si.
Cucaah dawtmi u le nau hna, nawl ngainak nih a theipar cu ram chung i thilṭha vialte co kho nak a si. Lungkhawn, nawl ngai lo i a theipar hna cu thihnak, sunghnak a si timi hi kan hmuh. Hi Profet cathiang chung ahhin Profet Isaiah 1:1-10 chung kan relmi ahhin hi ṭhatlonak vialte kha ngoltaak, cun dinfelnak kha kawl tuah timi, cun nuhmei hna sinah khan thil a hmaan ning tein na tuah lai timi, cun ṭhatnak tuah nai zuam lai, dinfelnak kha tuah naa zuam lai, na kawl lai, zawmhtaih mi, serhsat mi vialte kha na bawmh lai, cun ngakṭah buangro hna cung ahkhan dinfelnak in na nung lai, a ding tein na nung lai, cun nuhmei hna caah khan nawlpatnak na tuahpiak lai timi kha kan hmuh. Hi vialte hi kan tuah a si ahcun kannih vialte nih Bawipa a nawl ngai le Bawipa duhnak tuah a si. Cucu nawl kan ngainak i theipar kha a si caah hi nawl ngainak hi kan tuah a si ahcun ram chung i thil ṭha mi, rawl ṭha mi vialte kha kan co lai. A biapi bik inkhan Bawipa Pathian nih hi vialte hi na tuah dih hnu ah rak ra law a ti.
Hi kong hi i ceih usih, na sualnak vialte hi khuadawm bantukin khan a sen in sen dih hmanhsehlaw tuuhmul bantukin khan an raangṭhan lai tiah khan a ti. Cucaah cun kannih vialte nih Bawipa nawl ngai i ram chung i thilṭha thluachuah co maw kan duh? Asiloah nawl ngai lo, lungkhawn i sualnak chung ahkhan i ciah i hi kan sualnak man ah zungzal thih loh nak kha ton maw kan duh? Khakha kan i thim ding kha a si. Cucaah ram chung i a ummi thluachuahnak vialte kha a co duh mi kan si ahcun Bawipa nawl ngai i zuam usih timi kha pakhatnak ah forh kan duh hna. Cun Thawngṭhabia Mt 23:1-17 kan relnak ahhin a biapi bik in khan zeidah kan hmuh lai kan ti si ahhin Bawipa kan Pathian nihhin zumtu Khrihfa vialte hna, amah hnuzul vialte hna hi zeitindah kan nun awk a si; zei lam dah kan zulh awk a si timi kha a hmur a kaa in a kan cawnpiak leng ahkhan amah a nunzia inkhan lam a kan hmuhsak.
Vawlei cungah mah le mah a sangbik ah, a nganbik ah aa chiami cu nanmah nan sal ah a si a hau, cun amah le mah aa hlorh mi cu tang ah ṭhumh an si lai. Cun amah le mah tang ah aa ṭhummi cu cungah hlorh an si lai ti si. Minung kan sinak ah a hohmanh mi tang chiah, mi tang i umter kha a hohmanh kan duh lo. A ho poah kan si ah cunglei ah cawisan khi a duh mi lawngte kan si. Sihmanhsehlaw kan Bawipa Jesuh Khrih nih cawisannak kha kan kawl a si ahcun tangah chiah kan si lai i, toidornak kha kan kawl a si ahcun cunglei ah hlorh kan si lai timi kha fiang tein a kan chimh. Cucaah dawtmi u le nau hna, kannih kanmah le kanmah nihkhan a sangbik ah i chiah kan duh mi kha zeidah si ti ahcun hlanlio kan pu kan pa hna nih mah le mah i hlorh, mah le mah i chimthiam kha an rak uar. Mah le mah tang ah i chiah le mi toi ah i dor timi kha an lungput he khan aa ralkah mi kha a rak si. Sihmanhsehlaw kan Bawipa Jesuh Khrih nih a kan cawnpiak tik ahcun ni hmanungbik ni ah zungzal nunnak ahhin hlorh mi le cawisan mi kan si khawhnak hnga caah hi vawlei cung ahhin a hohmanh nih an kan niamter lai lo i tang ah an kan chia lai lo i kanmah le kanmah kha tang ahkhan i chiah kha a hau. Kanmah le kanmah kha mi toi ah kan i dor, mi tangah kan i chiah lawnglawng ahkhan hmailei kan nunnak ah cawisannak kha kan hmu lai timi kha ruah ding kha a si. Cucaah hika thawngṭhabia ahkhan kan ruah tikah Bawipa Jesuh nih a kan chimh tikah a hohmanh hi vawlei cung ahhin Saya ti kha duh hlah u; nan saya pakhat lawng a um. Cun nanmah vialte cu u le nau lawngte nan si tiah khan a kan ti. Cucaah Saya si ka duh, saya tiah kawh kan duh a si ahcun khakha amah te inkhan tangdornak lungthin inkhan kan i hlat tinak kha a si. Cu bantuk ṭhiamṭhiam inkhan vawlei cung ahhin Kan pa, ka pa tiah kawh auh kha duh hlah u tiah khan a kan ti tikah khan mi cheukhat pawl cu atu ah tahchunhnak ah vawlei cung ahhin bawi rianṭuan mi, ralkap rianṭuanmi pawl nihkhan aba, aba timi kha kawh kha an uar ngaingai. Aba timi kha nangmah lawnglawng hi kan i bochan mi na si, nangmah lo cun zeihmanh kan tuah kho lo timi ruahnak kha a si caah khatikhan rak chawnh, rak biak kha a duh mi a si. Sihmanhsehlaw kan Bawipa Jesuh Khrih nih khabantuk lungthin kha nan ngei lai lo tiah khan a kan chimh.
Sihmanhsehlaw hika ah Budang pawl nih mi cheukhat pawl nih nannih RC cu nan Siangbawi pawl kha Father, Father tiah nan ti hna; Bawi Jesuh nih a hohmanh Father tiah i ti hlah uh tiah a ti ṭung tiah an ti. Sihmanhsehlaw Mithiang Paul nih keimah ti lo cu vawlei cungah Pathian Jesuh Khrih ahhin nan pa hi keimah lawng ka si tiah a ti ve. Cucaah pa timi cu thlarau rawl a pemi cun thlarau inkhan Pathian fale ah a canter tu kha kan pa tiah kan timi kha kanmah nih ka pa tiah kan timi kha kan duh mi, kan uartuk ruang ahkhan a si lo i zumtu hna nih kawh awk aa tlak an ti i an kawh mi a si caah kawh a tuarmi kawh mi hna nihkhan palhnak kha a si lo i cucun hi a kotu nih kawh an tlak ko tiah an timi kha a si caah kanmah le kanmah kha hi ka pa timi kha kan uartuk riuangah an kan kawh mi zong kha a si lo. Sihmanhsehlaw hi ka pa timi siseh Saya timi siseh kan uartuk a si ahcun khakha tangdornak he khan aa hlatmi kha a si.
Cucaah tangdornak lungthi kan ngeih lo a si ahcun ka pa timi le saya timi kha a uarmi kha kan si ko. Cucaah vawlei cung ahhin hmailei kum caan tampi ah a chanchan in khan zungzal nunnak ahkhan co tlakmi kan si nakhnga zungzal nunnak ah hlorh mi kan si khawh nak hnga caah vawlei cungah kanmah le mah kha i niamter usih; mi toi ah i dor usih. Cucaah mah le mah i cawisan i hnu ah zungzal nunnak co kho loin khan tang ah chiah maw kan duh? Asiloah mah le mah mi tang ah i dor i hmailei ah zungzal nunnak co awkah cawisan dah kan duh? timi kha i thim usih. Cucaah hi a ṭhabik a simi zungzal nunnak kha co awk caah khan le cawisan awk caah khan kanmah le kanmah kha tangdornak kha i cuh usilaw a niamnak hmun kha i laak usih. Cuticun hmailei ah cawisan kha kan si te lai, timi kha fimnak i laak usihlaw timi kha nihin ah sawm kan duh hna. Kaa lawm tuk hringhran.