MISSA CHUNGAH TLANGBAWI HRUKMI THUAM (Ex 28:1-43, Mt 27:27-31).
Crusu angki fual (Chasuble) hi muici phun (6) a um.
(a) Arang (b) Asen (c) Ahring (d) Cicaa (e) Anak (f) Aihre tlei hna an si.
(a) Arang
Thianghlimnak, thangṭhatnak le lunglawmhnak hmelchunhnak a si. Nu Mary puai, Vancung mi hna puai le Mithiang hna puai hna caan ah hruk a si.
(b) Asen
Ralṭhatnak thi thletnak i hmelchunhnak a si. Thiang Thlarau rung ṭum puai, Vailamtah puai le zumhnak ruangah thahnak a ing mi hna puai caan ah hruk a si.
(c) Ahring
Ruahchannak i hmelchunhnak a si. Mifim pathum puai le Thiang Thlarau ṭumnak puai hnu ni sawhsawh ah hruk a si.
(d) Cicaa
Sual ngaihchihnak le ulhnak hmelchunhnak a si. Advent le lent caan chungah hruk a si.
(e) Anak
Ngaihchiatnak i hmelchunhnak a si. Bawi Jesuh a thihnakk, a thiang ninga ni le mithi caanhmannak ah hruk a si.
(f) Aihre tleu
Siangpahrang hna hruk mi muici kha a si. Cu caan puai ngan, Nipini hna ah Arang, Ahring le Asen mi hna aiawh in hruk a si.
Angki Fual Rang (ALB)
Rom miphun ngaki fual rangmi a si. Herod le a ralkap hna nih Bawi Jesuh kha an zaih i puan an aihternak kha a kan hngalhter. (Lk. 23:11). Cu hleiah tlangbawi lungthin thiannak kha a kan hngalhter.
Taisawm Hri (Cincture)
Bawipa Jesuh harsatnak a in lio i ralkapp hna nih Jesuh tai ah an temmi hri kha a kan hngalhter. Bawi Jesuh an tukvelhnak hrihrual mi zong kha a kan hngalhter ṭhan. (Mt. 27:2, Jn 19:1). Cu hleiah tlangbawi i a thianhlimnak, pumsa duhnak i tei khawhnak, sumnak i hmelchunhnak a si. Hi hri cu angki fual rang (ALB) hruk hnau tai ah sawmhmi hri a si.
Hngawng Kual (Stole)
Hngawng ah awihmi puan sau a si. A sullam cu Bawi Jesuh Khrih harsatnak a in li oi ralkap hna nih cikcin in an khihnak hri kha a kan hngalhter. Cun tlangbawi i a nawlngeihnak zong kha a langhter. (Mk 15:1, Mt. 18:18).
Crusu Angki Fual (Chasuble)
A cungbik ah hrukmi thuam a si. Pilat zungah Bawi Jesuh kha siangpahrang tiah an zaih i an aihter mi puan kha a langhter. (Jn 19:2). Crusu angki fual (Chasuble) cungah khan vailamtung khenh a si. A sullam cu Calvary tlang leiah Jesuh vailam a putnak kha a langhter. Cun a hnulei kengah vailamtung cu zumtu Khrihfa hna sual phorhnak a si i a hmailei i vailamtung cu tlangbawi sual phrohnak kha a langhter. Phundang in chim a si ahcun tlangbawi cu Missa raithawinak a tuah tik paoh ah hin amah sualnak le zumtu Khrihfa hna sualnak vialte caah ngaithiamnak a hal i Missa raithawinak a tuahmi a si.
Hngawng Ngerh Puan (Amice)
Bawi Jesuh a hmai kha cil an chaknak, an benghnak an tuah tikah ralkap hna nih Jesuh hmai an huhpiaknak kha a langhter. Cun zumtu Khrihfa hna zong Jesuh bangin toidornak langhter awk kha kan lungchung ah a kan ruahter.