Bia ngainak le Rawl Ulhnak, Ulh caan cu lungthlen caan asi
Ka dawtmi ka u le ka nau hna, Ulh caan (Lent) cu Pathian biathuk kha biapi ah chiah in thinphan lungretheihnak nih a khangh a hrawh dihmi kan lungthin le kan zumhnak kha tharchuah ṭhan awk ah Bupi nih a kan sawm. Toidornak lungthin he Pathian Bia cohlannak cu lungthlennak i hramthawhnak asi. Pathian he i pehtlaihnak kha kan cohlan tik ah cu nih cun thlennak a chuahpi. Ulh caan cu Bawipa he Jerusalem lei ah khual a tlawngṭi i a intuarnak, a thihnak le a thawhṭhannak tlinternak lam kalnak caan ṭha asi. Bawipa caah hmunhma kan pek khawhnak ding ah ngainak (Pathian bia ngaihnak) ngei usi ti kan duh hna. Mi pakhatkhat he kan i chawnhbiak tik ah an chimmi ṭha tein kan ngai piaknak thawng in an mah he kan i pehtlaihnak kha a fehter. Pathian nih Moses kha burbuk meikangmi chung in a kawh lio ah nawlngainak le bia ngaihnak asullam a langhter. Egypt ram i Ka mi hna an harnak le an ṭahnak kha ka hngalh (Ex 3:7). Namneh le rialdip a tongmi hna an ṭah an aihramnak aw theih piaktu Bawipa nih luatnak lam kawl piak awk ah le saltaannak in chanhchuah awk ah Moses kha a kawh i rian a fial. Kan Pathian cu a rian ah i tel ve awk ah a kan kawltu asi. Nihin kan chan zong ah Bawipa nih a lungchung i a ummi rianṭuan awk a kan hrawm rih. Pathian bia kan ngainak thawng in nihin thilsining hna kha hmuh awk ah a kan cawnpiak. Pakhat cio kan nunnak ah kan tonmi awthawng tampi tong cio ko hmanh usi law, kan minung hawi harnak le sifah retheihnak a tuarmi hna an aihraamnak au-thawng theih khawhnak caah Cathiang nih a kan bawmh. Lungthin innka on i a thiang bia kan ngaih khawhnak hnga Pathian i a kan cawnpiak mi kha kan lungchung ah luhter a hau. Sifakmi hna ṭahnak le au thawng cu zatlangbu ah siseh, ramkhel lei ah le sipuazi lei le Bupi ah siseh, a chanchan in minung tuanbia ah zuamcawhtu asi zungzal.
Ulh caan cu Pathian bia kan co khawhnak hnga timhlamhnak caan le rawl ulh caan asi. Sumnak a phunphun tuahnak thawng in thil dik thil hmaan duhnak kha kan chung ah a nunter i thlacam nun le kan innpa bawmhnak kha a kan cawnpiaktu asi.