
Pathian sin in a ra mi Fimnak

[1 KGS 3:4-13; PS 119: 9-14; MK 6:30-34]
Mark Thawngṭha bia nih a langhter mi, Pathian Bia thiang a phuang mi zultu hna Jesuh sin an rak kir tikah, lam i an tonmi vialte kha “Jesuh sinah an chim” tiin kan hmuh.
Khual kan tlawn tikah lampi i kan tonmi hna chungin tampi theih hngalhnak a kan ngeihter. Lawmhnak a um bangin, tlamtlin lonak, ngaihchiatnak a phunphun zong ton khawh a si. Cu bantuk thil sining vialte kong kha zultu hna zong nih Jesuh sinah an chim ve.
Jesuh nih zultu hna chimmi a ngeih piak dih hna hnu ah, “Hmun kingah kal u sih law can tlawmpal i din u sih,” tiah a sawm hna. Hi vawlei cung thil sining le minung ruah ning ah cun, teinak kan hmuh a siloah khua-awng kan ton tikah tam chinchin in tuah ding kan i tim ṭheo tawn. Rian lian deuh tuah kan i tim tawn i rianṭuan tu hna zong kha tam chinchin in an ṭuan khawhnak ding caah thazang pek in forhfial chin kha timh a si tawn.
Sihmanhsehlaw, Jesuh nih cun zultu hna kha rian tam deuh ṭuan dingin a hne hna lo. A kin nak hmun ah kal in caan lak ding, Pathian he pehtlaihnak tuah ding, thlacam ding tu kha a sawm hna.
Hihi Pathian Fimnak cu a si. Minung ruah ning he a lo hrimhrim lo. Thawngṭha bia phuangtu si hna seh, Khrihfa a simi vialte hna zong nih kan i cawn ding hrimhrim le kan zulh ding hrimhrim a si. Mah bantuk sining kha nihin ni ah Jesuh nih a kan hmuh sak duh mi le a kan cawnpiak duh mi cu a si.
Dawtmi hna, kan rian cu a tam ko lai. Sihmanhsehlaw, caan tlawmpal lak in Pathian he pehtlaihnak tuah ding na philh sual maw? Philh hrim hlah u sih. Pathian sin in Fimnak cu kan caah a herh tuk mi a si.
Siangpahrang Solomon nih Pathian sinin a hal mi “a chia, a ṭha thleidan thiamnak fimnak ka pe” tiah a timi, Pathian nawl zulh duhnak lungthin kha kan ngeih cio ding a si. Pathian sin lawnglawng in thilṭha, thluachuah kha kan hmuh tawn. Pathian he um ṭi, caan hman ṭi timi cu ka pumsa himnak caah siseh, kan thlarau himnak caah siseh, kan herh mi a si. Pathian sinin Fimnak hal cio ding, cun Pathian sinah thlacam ding le caan tawi te tal caan hman zungzal ding kha kan rian a si.
