Ngaknu thiang Mary Chuahni
September 8
Bible: Mic 5:1-4/Rom 8:28-30; Matt 1:1-16, 18-23
Dawtmi ulenau hna, vanlawng cit ding a si nain Lam buainak (traffic jam) ruangah a tlai i vanlawng aa cit ngah lomi chawlehtu kong kan theihbal ko lai. Vanlawng cu a zuang hnu tlawmpal ah a tla tiah a theih hlantiang a thin a hung tuk. Lung a fahter tukmi thil pakhat cu thluachuah ah a cang.
Eden dum chung i Adam le Evi i sualnak bantukin, hi cu chiatserhnak ah aa cang. Rul ruahnak cheuhnak in nawlngaihlonak sualnak an tuah hnuah, Yahweh Pathian nih rul cu, “Nangmah le minu karlak ah, na tefa le a tefa karlak ah ralnak ka ser lai i amah nih cun na lu kha an tuk lai i nang nih a kedil kha na cuk lai,” (Gen 3:15) tiah a ti.
New American Bible nih hi bantuk comment dawh taktak a ngei. A chimmi cu, “Ahnu deuh theology nih hi cacang ahhin rul le minung karlak ah a dong lomi ralchanhnak nakin a tam deuh a hmuh. Rul cu khuachia bantukin ruah a si (Wis. 2:24; John 8:44), a donghnak ah a sunghnak cu lu le kedil karlak i aa dannak ah a lang. Zeicatiah “Pathian Fapa cu khuachia rianṭuannak kha hrawh awkah a lang,” (1 John 1:38). Cucaah minu tefa cu abik in Jesuh Khrih a si.”
Cucaah, kan chim khawhmi cu, “Minu i a tefa cu….Jesuh Khrih” a si i amah cu Mary a si ti cu a fiang ko. Sualnak ngei loin hrinnak thawngin Satan le amah karlak ah ralnak a chuahter. (Hi ruahnak cheuhnak cheukhat hi Ni 365 Bawipa he 2007 chungin lakmi a si).
Nihin ah Ngaknu thiang Mary chuahni kan lawmhpi hna. A chuah ni fiang tein kan hngal lo. Crete khuami Mithiang Andrew nih a chuahnak cu “Bia le taksa fonhnak” caah “hramthawknak” a si tiah a ti. Zeiti a si hmanh ah, Khrihfabu nih December 8 ah Immaculate Conception puai tuah hnu thla 9 hnuah a chuahni lawmhnak he aa khat. Mary chuahnak ah lawmhnak a ruang tampi kan ngei i lawmhnak caah a ruang zong kan ngei. Ngaknu thiang Mary cu a nunnak a hramthawk tein thianter a si caah hrinnak thiang a si; a chuahnak cu kan Khamhtu a rat lainak caah a hramthawknak a si; minung sining ah a phanh tikah, chanthar aa thawk cang lai. Cucaah, minung caah Pathian sinin a rami thluachuah nganpi a si.
Ngaknu thiang Mary chuahnak nih lawmhnak le a tlaumi vawlei khamhnak a naihmi kong a thanh. Mary cu Adam fale dang hna bantukin sualnak nih a tlunhmi si loin vawlei ah a rak chuak, asinain a fiangmi, a thiangmi, aa dawhmi le a sunglawimi, Khamhtu Nu si dingin timhcia a simi caah aa tlakmi a sunglawi bikmi zangfahnak (thluachuah) vialte he aa thuam.
Mi nih, a caan ah cun aw thawngringtuk in, hi vawleicung mi lianngan hna chuahni cu an lawmh tawn… Cu a si ahcun, Khrihfami hna nih, kan khamhnak Nu, Ngaknu thiang Mary chuahni ah zeitindah kan i lawmh awk a si i, Amah cungah a langhtermi zaangfahnak nganpi caah kan thangṭhatnak le lawmhnak bia kha Pathian sinah mipi hmai ah kan pek awk a si. Amah i Pathian Fapa he remdaihnak tuah dingin kan nawl awk a si. Nazareth khuami Jesuh nih Vancung in rung ṭum dingin a thimmi a thiang bikmi a Nu i thlacamnak kha a al lai lo.
Na philh khawh rih lo ahcun, a thi cangmi Pope John Paul II i a biafang cu Totus Tuus a si, M cafang he Mary a aiawh. “Completely Yours -Na ta a sidih” tinak a simi hi biafang hna hi Pope cu Mary a duhpattu a si ti langhternak a si. Mary duhpattu tling sinak nih Khrih cungah aa hngatmi sinak kha zeiti lam hmanh in a zorter lo. A ngaingai ti ahcun, Mary he kan i naih deuhdeuh tikah Khrih he kan i naih deuhdeuh ve.
Khrih bantuk tein, Mary zong cu atu ah a nung. Amah cu vancung ah pum le thlarau he a um. Khrihfabu Nu le kanmah pakhat cio Nu a si bantukin amah he pumpak pehtlaihnak kan ngeih caah, hi ni hi lawmhnak ni ah kan ser awk a si. Chuahni ah kan tuah tawnmi laksawng pek zong hi ni sunglawi a si.
Dawtmi ule nau hna, Nihin ah Thluachuah Hringtu Nu sinah zei laksawng dah kan pek lai?