Transfiguration

Serlomi Ceunak Zoh

Bible Relnak (Dan 7,9-10.13-14, Salm: 96, 2Pt 1,16-19, Lk 9:28b-36)

Khrih ah dawtmi Ulenau hna, nihin ah Peter, Jeim le Johan he Tabor Tlang ah kan dir i, Zungzal Fapa sunparnak langhter awkah Khrih minung sinak puanzar a hlermi kan hmuh. Sualnak le sifah harnak nih a muimi vawlei ah, hi Puai nih kan ruahchannak a alhter: Khrih muisam a thlengtu Pathian nih kanmah le sermi thil vialte a kan thlen lai.

Nihin relmi avoikhatnak Bible ah, Daniel nih “Hlanlio i Mipakhat” mei bawiṭhutdan cungah a hmuh, vancungmi rel cawklo nih an zulh. Cun, “Mi Fapa bantuk pakhat” cu a naih i zungzal in a hmunmi “uknak, sunparnak le siangpahrang sinak” kha a hmuh. Hi apocalyptic langhnak nih tuanbia cung i Khrih Pathian nawlngeihnak kha a langhter.

“Hlanlio mi” cu Pa Pathian a si; “Mi Fapa” cu Khrih a si (cf. Mt 26:64). Hi chimchungbia nih vawleicung uknak le ṭhatlonak “saram” hna cungah Khrih nih zungzal in teinak a hmuhnak kong a thanh. Pope Benedict XVI nih a cawnpiak bantukin: “Khrih pennak cu hi vawlei ta a si lo, asinain hi vawlei ah a um… chunglei in a thlen” (Nazareth khuami Jesuh, Vol. 1). Muisam thlennak nih hi langhnak hi a tlinter: Jesuh cu nawlngeihnak vialte a ngeimi Pathian Fapa a si. Muihnak ṭhawnnak nih a tei hna tikah, Mi Fapa cu khuadawm cungin a ra dingmi kha kan zoh—tuanbia Uktu taktak a si.

Nihin Thawngṭha ah, Peter nih hitin a thanh: “A lianngannak mit in kan hmuh… Pa Pathian sinin upatnak le sunparnak a hmuh tikah.” Khrih a rat ṭhan hlan tiang “muihnak hmunah a ceumi meiinn” timi tuanbia thil cangmi ah Khrihfa ruahchannak kha a dirpi. Peter nih Khrih Pathian sinak kong Gnostic nih an rak almi hna kha hngalh khawhnak hmuhtonnak (“kan theih… kan hmuh”) ah a auh hna. Muisam thlennak nih Khrih cu Pathian taktak le Minung taktak a sinak a fehter. Catechism nih a cawnpiakmi cu: “Caan tawite chung, Jesuh nih a Pathian sunparnak kha a phuan, Peter nih [Amah cu Khrih a si] tiah a phuanmi kha a fehter” (CCC 555). Hi thil cangmi nih hin Vailamtahnak konglam caah thazaang a kan pek.

Mithiang Thomas Aquinas nih Khrih nih a sunparnak a phuannak aruangcu hitin a fianter: “A ra laimi fahnak kong he aa tlaiin Lamkaltu hna lungthin kha fehter awkah” (Summa, III, Q.45). Pope Francis nih a peh rihmi cu: “Mithmai thlennak nih hneksaknak hna cu Jesuh cungah kan mit chiah pengnak thawngin teikhawh a si ti kha a kan cawnpiak” (Angelus, March 8, 2020). Peter bantukin, muihnak chungah hi philhlonak hi kan i tlaih peng.

Jesuh hmai cu ni bantukin a ceu; A hnipuan cu “a rang i a ceu ngaingaimi” ah a cang. Moses (Nawlbia) le Elijah (Profet) nih tehte an khan. Pa aw cu a thang: “Hi pa hi ka thimmi Fapa a si, a bia ngai tuah u!” Zultu hna nih Khrih sunparnak Thawhṭhannak le Parousia (ratṭhannak) hmuhsaknak an hmuh.

Jesuh muisam thlennak thil cangmi ahhin, a biapimi biatak pathum a lang: Pakhatnak, Khrih Pathian sinak: Ceunak cu Serlomi Pathian i Ceunak a si (Ex 34:29-35). Pahnihnak, Trinity (Thumkomh Pathian) umtuning: Pa aw, Fapa l sunparnak, Thlarau “a khuhmi” khuadawm (Lk 9:34). Pathumnak, Cathiang Tlinnak: Moses le Elijah nih Jesuh cu Pathian timhtuahnak a donghnak a si tiah an fehter.

Pope Mithiang Leo the Great nih hitin a chim: “Thlennak nih aa tinhmi cu Zultu hna lungthin chungin Vailamtahnak ningzahnak kha hloh ding a si… a sunparnak lianngannak langhternak in” (Phungchimnak 51). Cun, Ávila khuami Mithiang Teresa nih hitin a forh: “Hneksaknak ah thazaang hmuh awkah aa thlengmi Khrih cungah na mit chia.” Tabor cu biakamnak a si: Khrih he kan i fonhmi kan intuarnak hna cu sunparnak in a dong lai (Rom 8:17).

Nifatin kan nunnak ah Tabor Tehte bantukin kan nun khawhnak hnga,

“Amah bia ngai tuah!” (Pa Nawlbia):

Vawlei aw-an nakin Cathiang chung i Khrih bia le Eucharist kha biapi deuh ah chiah. Mithiang Padre Pio nih hitin ruahnak a cheuh: “Muihnak caan ah, na mit kha hup law, ‘Jesuh, Nangmah cu kan in bochan,’ tiah ti.”

Muihnak chungah Tabor Ceunak kha kalpi:

Zultu hna cu khuachia nih a tuahmi ngakchia pa damter awkah an rung ṭum (Lk 9:37-43). Kannih zong nih, sifahnak ah Khrih ceunak kan chuahpi. Mithiang Mother Teresa nih: “Ahohmanh lunglawm tein chuahtak loin nan sinah ra hna hlah seh,” tiah a ti.

Thlacamnak nih na muisam thlenter seh:

Jesuh cu thla a cam lio ah mui aa thleng (Lk 9:29). Pope Benedict XVI nih a cawnpiakmi cu: “Thlacamnak cu kan tuahsernak a thiannak le a ceunak hmun a si” (General Audience, May 4, 2011).

Nihin ah, Daniel i mei bawiṭhutdan, Peter i mithmuh tehte khannak le Tabor i mitcawtertu ceunak hna cu vawlei muihnak hrawh awkah an i fonh. Pa nawlbia cu atu tiang a thang rih: “Hi pa hi ka dawtmi ka Fapa a si—A BIA NGAI U!”

Khrih ah dawtmi ulenau hna, Tabor ah um dingin sermi kan si lo—a ceunak kha muihnak nelrawn ah kalpi dingin sermi kan si. Aa thlengmi Khrih cungah na mit chia. A ceunak nih na hmuhnak kha thianter ko seh. Cun chuak—zinglei i a duh tukmi vawlei ah a sunparnak kha langhter. Zeicatiah Siena khuami Mithiang Catherine nih bia a kamh bantukin: “Na si awk a simi na si ahcun vawlei pumpi mei in na khangh lai!” Amen.