13 October 2025

Pekmi hmenchunhnak

Rom 1:1-7, Salm: 97, Lk 11:29-32

Khrih ah ka dawtmi unau hna,

Tehte, khuaruahhar hmelchunhnak le al khawh lomi tehte a kawlmi chan ah, nihin ah Pathian Bia nih khuaruahhar le zuamcawhnak biatak a kan pek. Pathian i dawtnak hmelchunhnak nganbik cu pek a si cang. Buainak cu tehte a umlo caah si loin, hmuh a duh lomi lungthin a hak caah a si.

Thawngṭha chungah, Jesuh nih vancung in hmelchunhnak a halmi chan kha a ton hna. Zumh awkah a forh hna dingmi vancung hmelchunhnak kha an duh. Sihmanhsehlaw Jesuh nih fimdingmi biaceihnak in hitin a leh: “Atu chan hi miṭhalo an si, hmelchunhnak an kawl, sihmanhsehlaw Jonah hmelchunhnak dah ti lo cu hmelchunhnak zeihmanh pek an si lai lo.” Mah hnuah a sullam kha hitin a fianter: “Jonah cu Nineveh khuami hna caah hmelchunhnak a si bantukin Mi Fapa zong hi chanmi hna caah hmelchunhnak a si ve lai.”

Jonah hmelchunhnak cu zeidah a si? Nga nganpi paw chung i nithum a um hnu ah a nung in a chuakmi profet hmelchunhnak a si, sual ngaihchihnak thawngthanhnak a chim i cu nih cun pagan khuapi dihlak kha a lung a thlenter hna. Jesuh nih a ngan deuhmi thil taktak Amah pumpak thihnak le thawhṭhannak a lnghter. Minung cungah Pathian dawtnak a donghnak bik, a fiangmi hmelchunhnak cu Paschal Mystery a si—Pathian Fapa nih kan khamhnak caah a nunnak a pek i sualnak le thihnak cungah teinak a hmuh. Hihi midang vialte nakin a sang deuhmi hmelchunhnak a si. Thlanglei Siangpahrangnu cu Solomon fimnak theih awkah lamhlapi ah a kal i, Nineveh mi hna cu Jonah phungchimnak ah an i ngaichih. Sihmanhsehlaw, hika ah hin Solomon le Jonah nakin a ngan deuhmi pakhat a um, cun Amah cu lunghrinhnak le tam deuh halnak he a ton.

Hihi a si caah St. Paul i Rommi hna sin cakuat ah a hramthawknak cu a ṭhawngmi dohnak a si. Paul nih fimkhur tein bia alnak asiloah khuaruahhar thil tuahnak in a thawk lo. Jonah hmelchunhnak a tlinnak kong thawngthanhnak in a thawk: Pathian Thawngṭha “a Fapa kong, David tefa in a chuakmi, sihmanhsehlaw thihnak in thawhter a sinak thawngin thianghlimnak Thlarau ningin Pathian Fapa ah fek tein dirhmi, Jesuh Khrih kan Bawipa kong a chim.” Paul caah cun, Thawhthannak cu zeizong vialte a thlengtu a biapi bikmi, al khawh lomi biatak a si. Lamkaltu a sinak hrampi le a bia a chimmi a hrampi a si.

Hi thawngpang hi, Paul nih, “zumhnak nawlngaihnak” caah a si tiah a ti. Hihi a biapimi biafang a si. Zumhnak cu biatak pakhatkhat kha fimthiamnak in cohlannak sawhsawh a si lo; dawtnak hmelchunhnak donghnak bik ah amah le amah aa phuangmi Pathian sinah kanmah le kanmah nawlngaihnak he kan i pekchanhnak a si. “Jesuh Khrih ta si dingin kawhmi” hna lakah kan i tel, cun kan kawhnak cu thianhlimnak a si.

Mah nih kan caah zei sullam dah a ngeih? Cu chan bantukin Pathian sinin hmelchunhnak thar a thli tein kan hal tawn. “Pathian nih hi buainak hi fiang tein remh sehlaw, asiloah a duhnak kha khuaruahhar in phuan sehlaw, zumhnak fek deuh ka ngei lai” tiah kan ruah men lai. Asinain Jesuh nih a biapi mi hmelchunhnak pakhat : Vailamtahnak le Thlan lawng ah kan mit a kan hruai ṭhan. Hihi kan hnangamnak le kan thazaang hrampi a si.

Lunghrinhnak kan ton tikah, khuaruahhar thil thar kawl awkah kawh kan si lo, pek ciami khuaruahhar thil kha ruah awkah kawh kan si. Pope Benedict XVI nih a ṭial bantukin, “Khrihfa sinak cu ziaza lei thimnak asiloah a sangmi ruahnak nih a chuahpimi a si lo, thil cangmi, minung pakhat he i tonnak nih a chuahpimi a si, cu nih cun nunnak kha a thar in hmuh khawhnak le biakhiahnak lam a pek.” Cu thil cangmi cu Thawhṭhannak a si; cu pa cu Jesuh Khrih a si.

Lisieux khuami Mithiang Thérèse nih mah kha a hngalhthiam, hmelchunhnak nganpi lam kha a thim lo, vailamtahnak cungah langhtermi Pathian dawtnak ah zumhnak tling “lam hmete” kha a thim.

Dawtmi unau hna, cucaah khuaruahhar thil kawl kha ngol hna u sih. Cu nakin, zumhnak nawlngaihnak kha cohlang hna u sih. Hmelchunhnak pek kan si cangmi kan caah a thi i a thoṭhanmi Khrih dawtnak leiah kan thinlung i mer hna u sih. Hi hmelchunhnak chungah hin kan kawlmi vel, ṭhawnnak le khamhnak kan hmuh lai. Amen.