Vatican khuapi, Jan 19, 2025 / 10:35 am

Pope Francis nih Jan. 19 in hman hram aa thawkmi Gaza ah a donghnakbik kahdaihnak hnatlaknak a tuahtu; remdaihnak sertu hna cungah lawmhnak bia a chim.

St. Peter’s Square ah aa pummi khualtlawngmi thong tampi he Angelus thlacamnak an tuah hnuah, Pope nih kahdaihnak cu khuapi caah “a biapi tukmi a phichuaknak” a si tiah a ti, Israel nih Oct. ni 7, 2023 ah Hamas cungah ral a thawh hnu in kumkhat leng raldohnak a tuar cang.

“Naite ah khan Gaza ah kahdaihnak cu nihin in hman hram aa thawk cang lai tiah thawng an thanh. Remdaihnak tuahtu vialte cungah kaa lawmhnak ka langhter. Remdaihnak a um khawhnak hnga remnak tuah cu rianṭha a si. Remdaihnak tuahtu hna cungah kan i lawm!” tiah pope nih Zarhpi ni ah a chimh.

“Hnatlakmi cu Party pawl nih an upat colh ko lai tiah ruahchannak ka ngei,” tiah a chimchap.

Angelus biachimnak ah, Pope nih tlaihmi vialte “a donghnak ah inn ah an kirkhawh lai i an dawtmi hna kha an pom khawh hna lai” ti le Gaza ah mi bawmhnak lam onnak ding ruahchannak zong a langhter.

Israel-Hamas ral a chuah hnu in, Pope Francis nih Israel le Palestinian tlaihmi vialte chuahter dingin a auh peng hna i hruaitu hna kha “biaruahnak, remdaihnak le daihnak” ṭhanchoter dingin a forh hna.

“Israel le Palestine an pahnih nih ruahchannak hmelchunhnak fiang tein an herh: An pahnih i ramkhel nawlngeitu hna nih, ramkip bawmhnak in, ram pahnih caah a dikmi a phichuak an hmuhkhawh lai ti ka zumh,” tiah a chim.

Ral ruangah Palestine le Israel ramah harnak a tongmi hna lengah, Pope nih Ukraine, Myanmar buainak le thahnawnnak nih a hrawhmi ram dangdang hna caah “thlacam zungzal” ding zong a theihter hna.

Ruahchannak Jubilee Kum a biapitnak le naite ah Cuba thongtla 550 leng an chuah hnanak kong a chim tikah, Pope nih thonginn chung ummi hna sinah “ruahchannak nganpi langhternak” tuah a herhnak kong zong a chim ṭhan.

“A ra laimi thla hna ah, hi bantuk thil tuahnak hi kan tuahpeng lai tiah ruahchannak ka ngei, cu nih cun mipi le milu hna khualtlawnnak ah zumhnak a chuahter,” tiah Zarhpi ni ah a chim.

Khrihfa lungrualnak octave hmelchunhnak caah — Jan. ni 18 ah aa thawk i Jan. 25 ni ah Mithiang Paul a lung aa thlengnak puai ah a dong — Pope nih hitin thla a cam: “Pathian sinin a sunglawi tukmi laksawng, tling tein i hrawmnak kha hal ngol hlah u sih Bawipa zultu vialte karlak ah.”

The post Zarhpi Ni Vatican first appeared on RVA Hakha Chin.

The post Zarhpi Ni Vatican appeared first on RVA Hakha Chin.

Daihnak hmuh khawhnak hnga caah phu vialte a telmi tonbiaruahnak a herh timi kha Zarhpi ni Angelus a donghnak ah Pope Francis nih a chim `han. Buainak ruangah harnak a tongmi hna philh lo dingin Vatican hmai i aa pummi zumtu hna kha a sawm `han hna. Abikin Myanmar ram a rak hnin dih mi kong a chim. November 25 cu, 1920 lio i a voikhatnak bik university siangngakchia hna lampi zawh in duhlonak an rak langhternak philhlonak ni zong a si.

“Thaizing cu Myanmar ram nih zalonnak lam (independence) a rak hruai hmasa bikmi siangngakchia hna duhlonak an rak langhternak philhlonak ni le, nihin ni tiang a tlamtling kho rih lomi daihnak le democracy chan ruahchannak, ram pumpi puai a si. Kawlram milu dihlak, ahleiin atu lio i dohnak ruangah harnak a tongmi hna caah, ahleiin a derthawm bikmi hna: ngakchia, tar, mizaw, ralzam, Rohingya telh in ka zaangfah hna nak langhter ka duh. Hriamtlai hna le party vialte hna nih an hriamnam chiah in, a hmunmi daihnak a chuahter khomi, phu vialte telh in tonbiaruahnak thawk dingah lungthin tak tein kan nawl ko hna,” tiah Pope Francis nih chim.

Cun, Pope nih Ukraine, Palestine, Israel, Lebanon le Sudan ram hna ah daihnak a um khawhnak ding caah mi vialte kha fakpiin thlacam peng dingin a nawl hna.

The post Myanmar ram caah Pope i Nawlnak first appeared on RVA Hakha Chin.

The post Myanmar ram caah Pope i Nawlnak appeared first on RVA Hakha Chin.

Keimah kha Rome khua Bishop le Pope ah an rak ka thimlio ah, ruahnak ṭhaṭha le lam hmuhsaknak pek i zohkhenh ding tiah min pekmi iang a ngei i, hmailei nornak a ka pekmi mi thianghlim Francis leikap ah ka ruahnak phanh loin, hi cathluan hi ṭial ka duh lo.

St. Francis cu hliam le rawh fawimi kokek pawngkam kha ṭhatein a zohkhenh i a tling cikcek mi kokek pawngkam kha a thangṭhat i, nuamtein a rak ummi zohkhenh awktlak sinak a rak langhtertu asi tiah ka zumh, ka cohlan taktak mipa asi.

St. Francis cu kokek pawngkam zohkhenh kilvennak kong a kawl a cawng mipa, zohkhenh kilvennak leikap ah rianṭuantu hna kha a zohkhenh a kilven, a khamhtu mithiang asi i biaknak phunkip in mi tampi nih an dawt i upat hmaizah a tongmi mithiang zong asi.

St. Francis cu Pathian sermi thil zeizongte le misifak hna le hnonhlawt mi vialte hna kha tlaihchan in a dawtupa asi. Amah cu, a lunglawmh tha nuamnak, sianngai in a nunnak pek i mi ca ṭhathnemnak caah pekchanh in a ṭuannak, hlangfangin a chimrel i tluantlam duhtlai mi lungthin a ngeih caah mi tampi nih upat hmaizahnak kha a rak co.

Amah cu biatak (Pathian) lei aa zuammi asi bangin sifak ngai le dinfel tein a rak um i, Pathian he siseh, kokek pawngkam he siseh, nunning aa khatmi, minung khat le khat hna he siseh, amah a thinlung put he siseh, hnatlak tein a rak um i Pathian biak khualtlawng mi pakhat zong a rak si.

Amah cu kokek pawngkam kha ṭhatein zohfelnak, misifak hna caah aa buaktlak ningcangte siding, i zuam in rianṭuannak le minung hna thinlung chungah lungnuam tein chiahnak hna cu ṭhenkhawh asilo mi ṭemnak zunhri bantukin pehtlaihnak a ngei tiah tehte a kan hmuhsak.

St. Francis cu kokek pawngkam kong kha kakipin tlinglakte kawl duh asi ahcun kanan (သင်္ချာ) thiamnak, saram lei thiamnak biafang biathuk hna kha lohn hnuah a daldang hna zong cawnkhawhnak innka aa hung i hlangfang tein cawn le kawl asi i, minung tling taktak sinakin um khawhnak cu zeikhidah a chimduh timi a chung taktak hmuhkhawhnak caah a kan bawmh.

Kannih cu mi zeimaw he kan i duhdawt tikah asi tawnning bantukin, Francis cu ‘Nika pi, Thlapa nu le a hmebik thilnung pakhat kha dengteo in a zoh hna tikah a thinlung, i suum kholoin, hla fungkhat a phanh i, amah i thangṭhatnak hla a saknak ah a dang thilnung vialte hna zong kha lemsoi in a hruai khawh hna.

Amah cu thilnung vialte hna he biachim in a komh hna i pangpar kung hna hmanh kha phung a rak chim hna i cu hna kha theih hngalhnak thluak a ngeimi thilnung hna bantuk Pathian kha thangṭhat ve awk ah a rak sawm tum hna.

Amah cu pawngkam vawlei he lehrulhnak ah mifim thiamsang hna thangṭhat mi pungsan asilo, ṭhanchonak tuaktan pungsan zong siloin, amah caah thilnung vialte hna cu dawtnak zunhri in ṭemmi kan farno hna bangin a chiah hna. Cucaah amah cu thilnung vialte hna kha zohkhenh ding ṭuanvo ka ngei tiah a thinlung ah a rak chuak.

St. Francis a zultu taktak asimi mithiang St. Bonaventure nih a sayapa kong a chimnak ah, amah cu thilnung vialte an chuahnak hrampi asimi kong kha ruahchih in khua a ruatnak in Pathian cung ṭihzah upat deuhnak he a rak khah hnuah, thilnung vialte hna kha zeitlukin an hmet zongah, ka nau, ka naunu tiin a rak kawh tawn hna.

Hitiin ruahnak hna cu sullam ngeilo mi duhnak zatlan pakhat asi tiah a ruat in fawi le bai in hnon awk aa tlaklo. Aruangcu hibantuk ruahnak cu mi hna i ziaza kha lam thianpiaknak, biakhiah piaknak he a pehtlaih caah asi.

Kannih cu kokek vawlei le pawngkam vawlei kha kan zohchih tikah Pathian nih a sermi vawlei i thangṭhat tlak asinak, khuaruahhar asinak hna kha langfang tein zohchihnak aa tello ahcun kannih cu, hi vawlei he pehtlaihnak kha kan langhternak ah annih an i dawtnak kong unau ṭafar bantukin chiahmi biafang hman asilo ahcun vawlei cungah kan ngeihmi lungput cu saya le bawi hna bantuk, sawksam mi hna bantuk, caantawite lawng, mah ca ṭhathnemnak a kawlmi caah zohkhenh tlangtlak piaktu ngeilo, zaangfah zawnruahnak a ngeilo mi, a hrawktu hna an si lai.

Tahchunhnak ningin kan chim ahcun kannih cu vawleicung i a ummi thilnung vialte hna kha kannih he duhtlai tein kan i komh tiah kan ruah cio asi ahcun tuaktan in hmannak le ralrinnak hna cu amah tein chuak dingmi asi ko.

 St. Francis nih sifak ngaiin a umnak, fakpin semrel aa suumnak hna cu biatak aa zuammi hna caah a par pavuan duhherhnak men siloin, a hrampi in remh duhnak tuah ningcang pakhat asi. Thilri hna kha mi hna caah mah duhning in sawksam ding mi thilri hna, minung uknak tangah chiah dingmi thil hna tiah lungput ngeih dingin alnak asi.

Chapchih rih ahcun St. Francis cu Bible ca cungah dinfelnak a ngeih bantukin kokek vawlei kha rumra ngeimi cauk nganpi pakhat sinakin hmuh cio dingah a kan sawm. Cu cauk ah Pathian cu kannih he bia aa ruah i, cu thawngin Pathian i tahkhawh asilo mi a dawhnak le ṭhatnak kha caan tawite biakcio dingin a kan sawm, tiah a rak chim.

Minung hna cu a ngan i aa dawhmi in sernak a ingmi nunnak ngei hna kong ruahchihnak in sertu Pathian kong kan rak hngalh (Wisdom 13:5).

Pathian cu vawlei a ser hramthawkte khan Pathian nih cun hmuhkhawh asilo mi a sining, zungzal hmunmi a ṭhawnnak le a Pathian sinak kha fiangtein a langhter ko. Cucaah i silhnalh khawhnak zeihmanh an ngeilo (Rom. 1:20).

Cucaah St. Francis cu a umnak zateik sianginn kulhchung i vawlei hmun pakhat kha zeihmanh cinglo chiah sawhsawh dingin a rak cah tak hna i, cu vawlei hmun ahcun hlingbur hna, aṭha lomi pangpar kung hna an rak khoh caah, cu hna a hmumi paoh cun cu kong hna i an i dawhnak kha zohin, dawhnak kha a sertu, sertu Pathian sinah an ruahnak a phanhnak hnga a timhnak asi.

Vawlei cu fianter awk a herhmi harnak asilo i lunglawmhte khuaruahhar thlaichun in ruahchih buin thangṭhat hnuah nuam tein umnak ding mi hmun asi.

The post Pope Francis le St. Prancis first appeared on RVA Hakha Chin.

The post Pope Francis le St. Prancis appeared first on RVA Hakha Chin.

‘Va kal law nupi ṭhitnak puai ah va sawm hna. . ‘

               “Siangpahrang nawlpeknak in mission rianṭuannak thinlung a langhtermi biafang pahnih a um,” tiah Pope Francis nih a chim. Cu biafang asiloah verb pahnih cu ‘kal’ le ‘sawm’ an si. Pope nih mah biafang pakhat cio sullam hna kha kapkhat cio in a langhter hna. “Mission” timi cu “tuu tlau kawl awkah a kalmi tuukhal Jesuh bantukin tuah ding” timi kha a si. Phundang in chim ahcun, mi vialte Pathian ton awk le Pathian he naihniam tein an um khawhnak hnga ding caah lunglawm tein va sawm hna kha a si.”

Siangpahrang nawlpeknak in a pakhatnak ah, “Sawmnak” timi kha, Pope nih “Pathian nih biapi ngaiin a kan pekmi rian pakhat cu hika ahhin hmuhkhawh a si” tiah a langhter. “Siangpahrang sawmnak cu sinum pawl nih khulrang in an leh i upatnak le zaangfahnak he thawngthanh ding kha an zulh colh,” tiah a chim chap. “Nihin khrihfa hna zong nih cuticun kan tuah ve awk a si. Lawmhnak tibantuk kan chung i a ummi Thiang Thlarau theitlai a simi ‘Lawmhnak’ tibantuk hna kha kan chungah a ummi a si i, “Thatnak le zaangfahnak he thawngṭha chim dingin kawh kan si,” tiah Pope pa nih a cawnpiak hna.

Ṭhitumnak Puai

Cun, Pope nih “ṭhitumhnak puai ah sawmnak” timi biafang a hmanmi ah rianṭuannak dang pahnih a langhter rih. Cucu hmailei caan ah tuah hnga dingmi ‘Tuufa ṭhitumhnak puai’ (eschatological) le tuah cuahmah mi Bawipa thisa ‘Missa’ “Eucharist” timi kha an si. Siangpahrang nih a timhtuahmi rawldanghnak nih vancung rawldanghnak kha a aiawh i, “Pathian pennak chung i khamhnak tlamtling hmanthlak” a si tiah Pope nih a ti.

Hmasa (hlan) Khrihfa tampi nih Khrih a voihnihnak ratnak cu a naicang tiah an rak zumh caah  Khrihfa hmasa hna nih “mission rian ah an i zuam i thawngṭhabia chim kha biapi ngaiin an rak tuah.”

“Hi thawngṭha chimnak rian hi tuchan zongah, kan caah a biapi tukmi a si” tiah Pope pa nih biatak tein a chim. (Hmailei zungzal nunnak) ṭhitumhnak puai cu “atu lio caan ah Missa kai le i tel” he tahchunh khawh a si tiah an ti.

“Zungzal in timhmi Tuufa nupi ṭhitnak puai ah mi vialte an i tel khawhnak hnga kan thawngṭha chimnak in minung vialte sawm ding a si” tiah a ti.

An hmuhmi vialte –

Pope pa nih a bia donghnak ah, siangpahrang nih sawmnak cu ‘mi vialte caah timhmi’ a si tiah a chim. “Hihi rianṭuannak lungthin a si.” ‘Mi vialte’ ti tikah, niam sam, phun lawhlonak le chiaṭha thleidannak um loin Vancung ram phanh khawhnak hnga ding caah sawm hnga ding an si.

Khrih zultu hna zong nih, “Pakhat hmanh chuahtak le hrelhtak loin, mi vialte kha hawikomhnak ah i tel dih dingin sawm hna ding an si”. “Zatlang nun le an ziaza dirhmun zoh loin an caah zawnruahnak taktak kan ngeih zungzal a hau,” tiah Pope nih a ti. Bianabia ningin, siangpahrang nih a sinum pawl kha “a chia a ṭha thlulo in hmuhmi paohpaoh” tiah a fial hna bantukin “mi sifak, pum tlamtlinglo, mitcaw Bawmtu ngeilo vialte hna kha pumh dingin nawl a pek hna. Pope Francis nih “minung vialte caah rianṭuannak ahhin i pekchanhnak dih a herh” tiah a kan cawnpiak. Hi kong dirkamh in, “Synodality timi ruahnak cu missionary rianṭuannak cungah hram aa bunhmi a si i, missionary rianṭuannak timi zong ‘synodality’ timi ruahnak he tling tein a nun zungzal a hau,” tiah Pope Francis nih a chim.

The post 2024 Mission Sunday Biacah (Message) first appeared on RVA Hakha Chin.

The post 2024 Mission Sunday Biacah (Message) appeared first on RVA Hakha Chin.

Dawtmi u le nau hna!

Middle East lei ah a cang lio mi thil sining zong lungrethei ngai in ka hmuh peng. Cun a rannak in kahdaihnak tuah dingin ka hal ṭhan hna. Remdaihnak hmuh khawhnak ding caah ramkhat le ramkhat pehtlaihnak le biaruahnak lam kha zul hna u sih.

Palestine, Israel le Lebanon ah a ummi vialte  hna he zong kan i naih ko. Cuka ahcun United Nations daihnak sertu phu pawl zong upatnak pek dingin ka hal hna. A thimi vialte caah thla ka cam, tlaih a tongmi hna zong a rauh hlanah thlah an si lai tiah ruahchannak ka ngei. Cun huatnak le lehrulhnak nih a chuahtermi sullam ngei lomi sifah harnak nganpi hi a rauh hlanah a dih lai ti zong ruahchannak ka ngei.

U le nau hna, raltuknak cu hlennak a si, sunghnak a si. Daihnak a chuahpi bal lo, himnak a chuahpi bal lai lo, mi vialte caah sunghnak a si.

Ukraine mi hna zong thih tiangin a kihnak ah chiah lo dingin kan nawl hna. Fahnak a tuar bikmi mipi cungah vanlawng in kahnak zong ngol cang uh. Sualnak ngei lomi thahnak hi ngol cang uh!

Haiti ram i a ṭihnungmi thil sining zong ka hmuh. Cuka ahcun mipi cungah thahnawnnak pehzulh in a um. Anmah umnak hmun in an zam i hmundang, ramchung le leng ah himnak an kawl hna. Haiti kan unau hna hi zeitik hmanh ah philh hna hlah usih. Thahnawnnak phunkip donghternak caah thlacam ding le, ramchung ah daihnak le remdaihnak serkhawh zungzal ding caah ramkip um a ṭhawngmi phu hna he rianṭuan ṭi peng ding; cun mi vialte upatnak le an covo kilven zungzal dingin ka nawl hna.

A ra laimi Friday, October 18 ah, “Aid to the Suffering Church” Foundation nih “Vawleicung daihnak caah ngakchia nuaikhat nih Rosary thlacamnak” timi thlacam timhtuahnak an ngei. Aa telmi nungak tlangval nan dihlak cungah kan i lawm! Anmah he i fonh hna u sih law Bawinu thlacamnak kha i bochan hna u sih. Nihin cu Fatima ah a donghnakbik a rak langhnak puai (anniversary) a si.  Bawinu Mary sinah bochannak lungthin he Ukarine, Myanmar, le Sudan ram hna ah daihnak a umnak hnga pekchanh hna u si.

Mi vialte Zarhpini ṭha nan hman khawh cio ding thla kan campiak hna. Zaangfahnak tein, keimah ca zongah thla ka cam piak uh.

The post ANGELUS THLACAMNAK AH POPE first appeared on RVA Hakha Chin.

The post ANGELUS THLACAMNAK AH POPE appeared first on RVA Hakha Chin.

Pope Francis nih Indonesia’s Istiqlal Mosque Jakarta ah biaknak dangdang tonnak caah a tlawn, cun mipi i “laksawng nganpi”, biaruahnak caah riantuannak, pakhat le pakhat i upatnak le lungrual tein umṭinak caah, cu ahcun kan dihlak in kawh kan si timi kha pek a bawmhchanh hna.

Thaddeus Jones nih a tialmi

Pope Francis nih Asia le Oceania ah a Lamkaltu Khualtlawnnak ni thumnak cu September 5, cawnnili ah Indonesia ram Jakarta khua i Istiqlal Biakinn ah a tlawn i Asia nichuah thlanglei biakinn nganbik ah biaknak dangdang he tonnak a tuah.

Amah a dontu cu Grand Imam, Dr. Nasaruddin Umar a si. An pahnih in “Hawikomhnak Tunnel- Tunnel of Friendship” zong an tlawng, cucu Istiqlal Mosque le Catholic Cathedral of Saint Mary of the Assumption a pehtlaimi vawlei tang lam asi i a karlak ah lam pathum a um.

Cun, 2024 Istiqlal i kaphnih fonh thanhca zong an min an thut, biaknak phunglam vialte ah aa khatmi sining hna kha “thahnawnnak le zeirel lonak nunphung tei” awk le remdaihnak le daihnak ṭhanchoter awkah ṭha tein thanchoter dingin an langhter.

A biachimnak ah, Pope Francis nih Grand Imam cu a lunglawmhnak le khual dawtnak caah lawmhnak a chim, cun hi biaknak le thlacamnak hmun hi “minung caah inn lianngan” a si tikha mi vialte a theihter hna i cuka ahcun mi nih “adong lomi duhnak” kha philhlo awkah caan an lak khawh, kan lungthin chungah kan i put i “Pathian he tonnak kawl le midang he hawikomhnak lawmhnak hmuh” a herhnak kha kan i put.

Biaruahnak le remdaihnak sersiam

Pope nih Indonesia mi hna i “biaknak, pakhat le pakhat i upatnak le biaknak le thlarau lei intuarnak aa dangmi hna karlak ah rem tein umṭinak” an rianṭuannak ah “laksawng nganpi” kha upatnak a pek hna.

Mosque tuanbia cu hi zuamnak hna caah tehte a si tiah a ti, cun khuachung Khrihfa inn suaisam thiam Friedrich Silaban nih saknak caah suaisamnak zuamnak ah teinak a hmuh ti kha a hun hngalh ṭhan.

Pope nih hi laksawng hi nifatin ngeih dingin thazaang a pek hna, “cucu biaknak lei hmuhtonnak hna cu unau le daihnak a ummi zatlang nun caah zohchunh awk an si khawhnak hnga.”

Tonnak le biaruahnak

Istiqlal Mosque le Saint Mary of the Assumption Biakinn aa pehtlaimi “Hawikomhnak Tunnel” zong nih “biachim thiammi hmelchunhnak” zong a langhter, zeicahtiah hi biaknak hmun pahnih hna hi pakhat le pakhat an i ton lawng si loin pakhat le pakhat an i pehtlaih caah “tonnak, biaruahnak… unau sinak hmuhtonnak taktak” caah asi tiah Pope nih a hmuhmi a chim.

Kan thlarau khualtlawnnak ah pakhat cio nih “Pathian kawlnak ah kan kal lai i, pakhat le pakhat i upatnak le pakhat le pakhat i dawtnak cungah hram bunhmi, a fekmi, a hrampi le a hlei in a ummi, a zungzal in a ṭihnungmi le a hmaanmi a si lomi hna sinin a huhphenh khomi, a ongmi zatlang nun sernak ah i tel ve hna u sih” tiah a ti.

Thukpi in zoh zungzal

“Biaknak lei hngalhthiamnak vialte ah aa khatmi hram pakhat: Pathian he tonnak kawlnak, Lianngan Bik nih kan lungthin chungah a chiahmi a dong lomi caah tihalnak, thihnak phunkip nakin a ngan deuhmi lawmhnak le nunnak a fek deuhmi kawlnak, cucu kan nunnak khualtlawnnak kha a nunter i Pathian he ton awkah kanmah le kanmah chuah awkah a kan forh.”

Pope nih a peh rihmi cu kan nunnak thukpi in zoh tikah, a tlangpi in “a dong lomi caah tihalnak” ceunak ah, zeitindah kan dihlak in unau kan si ti kha kan hmuh khawh, “khualtlawnnak vialte, kan dihlak in Pathian, a kan thleidangtu leng hmanh in.” tiah papek in a chim.

Hawikomhnak pehtlaihnak ṭhanchoter

Cu hnuah Pope nih hawikomhnak hri kilven a biapitnak kha a langhter i, “biatak kha hmunkhat ah kan kawl” i midang biaknak phunglam in “kan minung le thlarau lei herhbaunak.” kan cawn khawh a ti.

Minung upatnak kilvennak, sifak bawmhnak, daihnak thanchoternak le pawngkam kilvennak tibantuk tinhmi pakhat kha hmunkhat ah kan zulh khawh ve, tiah Pope nih a hmuh.

Biaknak lei lungrualnak sersiam dingin auhmi

A donghnak ah, Pope nih “minung caah biaknak lungrualnak sersiam” cu kan i fonhmi auhnak a si i min kan thutmi fonhmi thawngthanhnak min a si tiah a ti. Cutin tuahnak thawngin, “vanchiat ah biaknak thlennak ruangah a caancaan ah a chuakmi” harnak tampi a chuahtertu harnak, raldohnak, buainak hna kha hmunkhat ah kan lehrulh khawh hna.

Biaknak phunglam vialte ah aa khatmi sining hna kha ṭha tein ṭhanchoternak thawngin, “thahnawnnak le zeirel lonak nunphung tei khawhnak ding caah rian kan ṭuan khawh… cun remdaihnak le daihnak ṭhanchoter khawhnak ding caah,” tiah Pope nih Istiqlal i fonhmi thawngthanhnak chungin a chim.

“Vawleicung sui chuahnak hmun nganbik na umnak hmun a si ti ahmaan ahcun, a sunglawi bikmi ro cu buainak a chuahtertu si loin lungtlinnak le pakhat le pakhat i upatnak thawngin i dannak hna kha remh khawh a si timi biakhiahnak a si ti kha hngalh…Mi vialte nih khuaruahhar in um hna seh zalongmi saduhthah, unau le daihnak a ummi zatlang nun le minung sinak “.

Vatican news in kan lakmi asi.

The post Indonesia ram Mosque ah Pope first appeared on RVA Hakha Chin.

The post Indonesia ram Mosque ah Pope appeared first on RVA Hakha Chin.

(1 September, 2024)

Pope Francis nih Burkina Faso le Middle East ah buainak a chuahmi kha a mawhchiat, pawngkam kilvennak caah cawlcanghnak tuah dingin a forh hna, cun Slovak martyr pakhat cawisannak puai a tuah hlanah Asia ram a tlawnnak caah thlacamnak a hal.

Francesca Merlo nih a tialmi

Zarhpi ni Angelus biachimnak ah St Peter’s Square i aa pummi zumtu hna sinah bia a chim tikah, Pope Francis nih a ruahnak le thlacamnak cu vawleicung hmun dangdang ah ral le a dang thahnawnnak a tuarmi hna le Slovak martyr pakhat thluachuah (cawisan) peknak thar kong ah a thlen.

Burkina Faso ah thahnawnnak sualphawtnak

Pope Francis nih Burkina Faso, Barsalogho khua i naite ah ralhrang nih minung za tampi an thahnak le midang tampi hliamhma an tuarnak kong he pehtlaiin a ngaihchiatnak fakpiin a chim. A thimi chungkhar hna sinah ngaihchiatnak a langhter lioah, Pope nih, “Minung nunnak he aa ralchanhmi thil ṭihnung hna hi ka mawhchiat hna i Burkina Faso mipi he lungrual tein ka dir,” tiah a ti.

Burkina Faso ah hin naite kum hna ah khan ralhrang phu nih an kah hna caah ṭihnung le rawhralnak a chuak. August 24 thil cangmi cu a kau deuhmi buainak ah aa telmi a si i cu nih cun pengtlang a buaiter, minung lei harnak a chuahter.

Brazil harnak a tongmi hna caah thlacamnak

Cuhnuah Pope Francis nih Brazil ram Recife khua i Nossa Señora da Conceição hmunthiang ah ngaihchiatnak a tongmi hna caah thla a cam. Zarhpini ah khan, rawl bawm lak dingin mipi an i pumh lio ah, biakinn inncung a cim i a tlawmbik minung pahnih an thi i, mi tampi nih hliamhma an tuar. “Hliamhma a tuarmi hna le an chungkhar harsatnak caan chungah Bawipa nih hnem ko hna seh,” tiah Pope Francis nih a chim.

Ukraine mipi he lungrualnak

Cun, Pope Francis nih a tuahtawn bantukin, Russia meithal kahnak tangah harnak a tong pengmi Ukraine mipi caah a lungretheihnak a chim ṭhan. Infrastructure rawhralnak kong abikin a chim tikah, Pope nih minung caah a chuakmi thil sining kha a langhter, zeicahtiah “thihnak le hliamhma a chuahter pinah, energy infrastructure cung i tukdohnak nih hin minung nuaikhat leng cu mei le ti tibantuk a herhmi thilri ngei loin a chiah hna”.

Ram Thiang ah daihnak caah nawlnak

Cuhnuah, Israel le Hamas karlak buainak a karhchin lengmangmi kong a chim tikah, Pope Francis nih, voikhatte cu, buainak a karhchin lengmang lonak ding le hi pengtlang chungah buainak a karh lonak ding caah a rannak in cawlcanghnak tuah dingin a auh ṭhan.

“Voikhatte cu, Palestine le Israel buainak kongah lungretheihnak he ka ruahnak ka hun mer ṭhan, cu buainak cu Palestinian khuapi dangah a karh khomi a si. Biaruahnak ngollo ding, kahdaihnak ngol colh ding, tlaihmi hna thlah ding, le polio telh in zawtnak tampi a karh cuahmahmi Gaza khuami hna sinah bawmhnak pek dingin nawlnak ka tuah”, tiah a forh hna, a nawl hlan ah, ” Ram Thiang ah daihnak um ko seh, Jerusalem ah daihnak um ko seh!”

Vawleicung Sernak caah Thlacamnak Ni

September 1 cu Sermi Zohkhenhnak caah Vawleicung Thlacamnak Ni a si ti hngalh awkah aa mer i, Pope Francis nih pawngkam kilvennak caah hmunkhat ah rian ṭuan a herhnak kong a langhter.

“Nihin ah Sermi Zohkhenhnak caah Vawleicung Thlacamnak Ni kan lawmh. Mi vialte bu, phu fonh, chungkhar, le pumpak pakhat cio—kan innchungkhar ah a fekmi biakamnak ka hmuh lai ti ka ruahchan. Hliamhma a tuarmi vawlei authawng cu a ṭihnung chin lengmang i biakhiahnak cu a rannak in tuah a herh,” tiah Pope nih a chim.

Ján Havlík Cawisannak

Cuhnuah Pope Francis nih Czechoslovakia ram communist uknak lio ah martyr a simi seminarian Ján Havlík mithiang ah cawisannak puai a tuah. “1965 ah a zumhnak ruangah thah a simi hi tlangval pa hi hremnak a tong pengmi vialte caah zohchunh awk tlak a si,” tiah Pope nih a chim, hi thluachuah peknak a biapitnak kha a langhter, zeicahtiah hremnak uknak tangah biaknak lei mi hna nih an tonmi hneksaknak kha a langhter.

Pope Francis 45nak Lamkaltu Khualtlawnnak caah thlacamnak

A donghnak ah, Pope Francis nih a ra laimi avoi 45nak Aspoltolic khualtlawnnak kong a chim, cu ah cun September 2-13 tiang Indonesia, Singapore, Papua New Guinea le Timor-Leste ah a kal lai. Hi caan ah hin, Papa Thiang nih a hlawhtlinnak ding caah thlacamnak a hal hna, “hi khualtlawnnak nih thei a tlai khawhnak hnga thlacam cio hna usih” tiah mi vialte a sawm hna.

Kan capar na rel caah kan i lawm. Nifatin kan thawngthanhnak cauk ah i telnak in a thar in na theih khawh. (Vatican news in kan lakmi asi)

The post POPE I ZARHPINI ANGELUS AH CHIMMI first appeared on RVA Hakha Chin.

The post POPE I ZARHPINI ANGELUS AH CHIMMI appeared first on RVA Hakha Chin.

Sunday Angelus chungin a ruahnak ah, Pope Francis nih Bawipa kawl in zungzal lawmhnak a chuahtertu nunnak tlinnak caah Amah he um zungzal in zultu hmasa hna bantuk si dingin a kan forh.

Vatican News nih a tial

Mithiang Peter nih “Bawipa, aho sinah dah kan kal khawh lai? Zungzal nunnak bia na ngei” tiah a ti i zultu hna nih Jesuh cungah an zumhnak le an zumhnak a fehter lio Zarhpini Thawngtha kha Pope Francis nih cu “a dawh ngaimi muisam” in Peter nih zeitindah zultu hna nih Bawipa sinah um an duh, Amah kaltak an duh lo. Zultu hna nih Bawipa phungchimnak an theih, khuaruahhar thil a tuahmi an hmuh, mipi le pumpak nunnak ah an i hrawm peng, tiah Pope nih a fianter.

Pope nih Bawipa hnu zulh cu zeitindah a fawi lo ti kha a langhter, zeicahtiah zultu hna nih Bawipa nih a chimmi le a tuahmi kha an hngalhthiam zungzal lo. Cun Jesuh nih mi vialte a dawtnak a hrampi sining, a zaangfahnak a donghnak bik a halmi le Bawipa tuahsernak cu phunglam ningin biaknak le phunglam hna leng tiang a kalmi cohlan awkah an caah zuamcawhnak a si. Asinain Bawipa chung lawnglawng ah Piter le a dang lamkaltu hna nih “nunnak tihalnak, lawmhnak, dawtnak a nuntertu lehnak” an hmuh i cuticun “sualnak le thihnak ri leng hmanh in an kawlmi nunnak tlinnak kha an hmuh.” “

Cun rel chih

Bawipa hnu zulh ding zuamcawhnak nih hin kanmah pakhat cio zong a kan pehtlaih, tiah Pope nih a fianter, zeicahtiah kannih zong a lam hngalhthiam awk le a tahfung le zohchunh awk kha kanmah ta ah ser awkah kan i zuam ve. A biapi bikmi cu Bawipa he naih tein um zungzal, a Thawngṭha zulh, sacrament ah a vel hmuh, thlacamnak ah amah he umṭi  le toidornak le zaangfahnak a zohchunhmi zulh kha a si tiah Pope nih a chimchap. Cutin tuahnak thawngin, “Amah cu kan Hawikom ah kan ngeihnak dawhnak kan hmuh deuhdeuh tikah,” “Amah lawnglawng nih ‘zungzal nunnak bia’ a ngei ti kha kan hngalh deuhdeuh.”

Cu hnuah Pope nih Jesuh cu kanmah nunnak ah zeitluk in dah a um ti le a bia nih kanmah le kanmah a kan tawngh i a kan hninhter maw ti kha ruahṭhan dingin ruahnak a cheuh.

“Pathian bia Jesuh kha a taksa in a cohlangtu Mary nih a bia kan ngaih i zeitikhmanh ah kan kaltak ti lo nakhnga kan bawm ko seh.”

Kan capar nan rel caah kan i lawm. Kan nifatin thawngthanhnak cauk ah min cazin peknak in a thar in na theih khawh. Just click here

The post Pope Francis (25.8.2024) first appeared on RVA Hakha Chin.

The post Pope Francis (25.8.2024) appeared first on RVA Hakha Chin.

Daihnak Bawipa Pathian … kan thlacamnak kan ngaipiak ko tuah!

          Kan thazaang le kan hriamnaam hmangin buaibaihnak teikhawh kan i zuam hi, a caan tamtuk cang i a kum zong tamtuk cang. Zeitlukin muihnak le buainak caan hna kan intuar cang. Zeitlukin thi kan luanh cang. Zeitlukin nunnak hna kan vaihvuanh i zeitlukin ruahchanhnak kan hloh. Sihmanhsehlaw kan thazaang chuahnak hna cu pakpalawng ah an cang dih.

          Maw Bawipa atu hin kanmah bawmhawk ah ra ko cang. Daihnak rak kan pelaw daihnak rak kan chim, daihnak lamah rak kan hruai ko. Kan thinlung le kan mit hi rak ong hna law, “Raltuknak um hrim ti hlah seh”, “Raltuknak ah zeizong vialte a rawk dih” tiin chim ngamnak thazaang kan pe ko. Daihnak hmuhkhawhnak lamthluan biatak in kan serkhawhnak hnga thazaang kan pe ko.

          Maw Bawipa, Abraham Pathian, Profet hna Pathian, Dawtnak Pathian, Unau ṭafar bantuk nung dingin na kan ser i, na kan auh. Kan hmaiah kan hmuhtonmi hna cungah unau ṭafar hmuh in kan hmuhkhawhnak hnga le nitin in dawtnak hriamnaam kan sinak hnga thazaang kan pe ko.

          Kan raltuknak hriamnaam hna cu diahnak chuahpitu thilri ah, kan thlalauhnak vialte cu zumh hnangamnak ah le kan i sikcaaknak cu ngaihthiamnak ah a thleng duhmi mipi nawlnak aw kha run kan hngalhter ko.  Lungsau thinfual in biaruahnak le remrualnak kan tuah khawhnak hnga ruahchannak meizik kha kan chungah nunter ko. Cuti lawng cun daihnak nih teinak a hmuh lai. Cheunak, huatnak le raltuknak cu minung pakhat cio thinlung in hlh s ihram she. Maw Bawipa ka hmurka le kan kut in a chuakmi zaang-ennak hna hi kan ṭhawlpiak ko. Unau timi bia nih pumkhat ah a kan chuahpi zungzalnak hnga, kan thinlung le ruahnak hi athar in run canter ko tuah. Amen.

The post DAIHNAK CA POPE FRANCIS I THLACAMNAK first appeared on RVA Hakha Chin.

The post DAIHNAK CA POPE FRANCIS I THLACAMNAK appeared first on RVA Hakha Chin.

International Fund for Agricultural Development phufonh hna sinah Pope i a kuatmi ca chungah ei le din awk thilri hlonhnak hi ṭih a nungmi ṭhatlonak cu, leicung i pawṭam mi hna sin pek asikhawh nain kan hlon men tikah nikhua caan a chiatter khawh asi tiah ralrinnak a pek.

Pope Francis nih International Fund for Agricultural Development (IFAD) phufonh hna i avoi (47) nak tonhpumhnak i aa telmi hna sinah Lent Luhni (Ash Wednesday) ah biacahnak a rak kuat.

Ahohmanh nih chiatter loin aṭha deuh mi vawleipi caah izuam buin, chuakkhat unau lungrualnak chuakter in, mizapi caah lunglawmhnak le ruahchannak hrampi siter dingah nan pek lainak tikcu le caan, nan biakamhmi le nan thazaang pawl ruangah kaa lawm tiah a langhter.

Hmun cheukhat hna ah minung zeimawzat mehhaang loin pawṭam le tihal in an um lioah khatlei in, ei le din awk sawksamnak cungah ruah ngamlo tiangin hmuhkhawh asi tiah a chim.

Mah ei le din awk sawksamnak hi kum fatin in himnak caah sakmi thlalang inn tampi a chuahpi i pawṭammi hna cawm dingah pek in ṭhen hna sehlaw a zaceo hrawng cu asi ko lai tiah Pope nih a ti.

Kannih nih vawleipi harsatnak a pekhomi kan tuahtawnnak cungah Pope nih ralrinnak a pek i, nikhua thlennak i hrampi asimi le minung tampi i pawcawmnak zong a hromi (hlerh) relcawklo buainak hna a langhter tiah ralrinnak a pek.

Pope nih caanhar  kan ton tin tein zeikhom sizongah, ahmasabik ah a tuartu pawl cu khuate lei pawl an si tikong zong a chimchap.

Adonghnak ah Pope Francis nih “zumhawktlak asimi ṭuanṭinak le mi ca ah tuah duhnak lungthin i hrialnak, sifahnak le ahrampi kha a palh zawngin tuahnak hna hleiah, khuacaan harsatnak hna  i a chuahtermi hna hrialkhawhnak caah nan biaruah ṭimi hi lam in hruai hram seh” tiah  thla a cam piak hna. A reltu nan dihlak cungah Pathian thluachuah um hram seh!

Hrampi kan laknak >>>http://a1f33a.ttu.cc

The post IFAD sin i Pope Cakuat first appeared on RVA Hakha Chin.

The post IFAD sin i Pope Cakuat appeared first on RVA Hakha Chin.