Zarhkel Avoi (4)nak Zarhpini

Zeph. 2:3, 3:12-13; 1Cor. 1:26-31; Matt. 5:1-12a

Khrih ah dawtmi ulenau hna, voikhat cu Mother Theresa nih thinghmui zawtnak a ngeimipa i a hma a thianh lioah chawlehtu mirum pakhat nih a va leng tiah an ti. Hliamhma rimchia le pa pum chungin a chuakmi rungrul hmuhnak nih chawlettupa cu a fihtertuk. Amah nih cun, “Tangka million pakhat hmanh a ka pek hna sehlaw, nan tuahmi hi ka tuah ngam lai lo,” tiah a ti. Mother Theresa nih a lehmi cu: “Kei zong; dollar million tampi a ka pek hmanh ah, na tuah duh lomi cu ka tuah ve lai lo,” tiah a leh.

Nihin kan thawngṭha ah, Mithiang Matthai chimning ahcun, Jesuh nih min a thang ngaimi vancung phunghram, Beatitudes kong a chim. Greek holh in, Beatitude timi biafang cu macarius a si i a sullam cu lawmhnak tinak a si. Cucaah Jesuh nih a chimmi “Thluachuah” timi biafang a sullam cu lunglawmhnak a si. Jesuh nih a kan duhpiakmi cu hi vawlei nih a hngalhmi lawmhnak cu zeidah a si timi hngalhthiamnak ningin siloin Pathian nih hi bia in a chim duhmi ningin a si.

Fr. Rudy Horst, SVD nih Mary Jensen nih a ṭialmi We Belong to the Land timi cauk ah nihin thawngṭha fianternak thar caah khuaruahhar ngai a si tiah a chim. Jensen nih Jesuh i a hmanmi Aramaic holh kha a cawng i Jesuh nih a hmanmi biafang hrampi cu Mirang holh in lehmi “Thluachuakmi nan si…” timi bantukin a silo ti kha a hun hngalh. Jesuh i bia cu tho law i tel ve dingin nawlnak a si tiah amah nu nih a hngalh. Hi bantuk hin a si: “Nannih remnak sertu hna, tho u, hmailei ah kal u, thil pakhatkhat tuah u, i chawk u, zeicahtiah nannih cu Pathian fa tiah ti nan si lai…” Amah nu nih “A chimmi ka theih khawh: ‘Minung caah minung zatlang nun ser awkah nan kut kha thurhnawmhter u; cu lo ahcun, midang nih sifak, aw ngei lo le thilti khawhnak a ngei lomi hna kha an hrem hna lai i an thah hna lai’ a ti. Khrihfa biaknak cu a cawlcang lomi siloin a cawlcangmi, thazaang a ngeimi, a nungmi, lungdonghnak leng tiang a kalmi a si.”

Cucaah, thluachuahnak hna nih hin Jesuh zultu tling si khawhnak lam a fek bikmi le vancung kai khawhnak lam a fek bikmi a si timi zumhnak ruangah nifatin thlacam le Missa kai a haumi nunnak ah a ummi biaknak lei lungput thlum lawng kha a langhter lo. Cucu a hlat tuk. Cu nak cun, kan khrihfa nun zong hi vawlei buaibainak, misual mi lungthlennak le Khrihfabu missionary rian, chunzan in kan dirkamh mi hna leiah kan i mer awk a si.

“Thlarau leiah sifakmi hna cu zeitluk in dah thluachuah an hmuh, Pathian uknak cu anmah ta a si” tiah a timi thluachuahnak hmasabik kha biapi deuh in langhter ka duh. Mithiang Luka chungah ‘thlarau in’ timi biafang a umlo. Hihi timhcia tein tuahmi a si maw silo ti ka hngal lo. Sifakmi hna caah sizung an sakmi missionary phu pakhat kong ka lung ah a hung chuak. A dih tikah, mirum phu pakhat nih missionary pawl sinah biachim an duh i, sizung cu mi vialte caah a si awk a si caah, midang vialte telh loin, zeicahdah sifakmi lawng kha nan chimh hna tiah hal an duh hna. Missionary pakhat nih cun hitihin a ti hna: “Siizung cu mi vialte caah a si, nanmah telh in le mi vialte cu man loin le zaangfahnak he zohkhenh an si lai ti cu ahmaan ko. Asinain sifakbik le a herh bikmi hna caah cun, hi siizung hi lawmhnak thawngpang ṭha a si ti zong ahmaan, zeicahtiah, annih cu nanmah bantuk siloin, kalnak ding hmun dang an ngei lo. Cucaah atu ah, sizung kan sak tikah ahleiin an i lawm.

“Sifakmi hna caah Duhthimnak” timi phunglam kong na theih men lai. Sifakmi cu ahodah an si? J. O’Halloran nih a cauk Signs of Hope timi ah a ṭialning ahcun, sifakmi hna cu thilri chawva a ngei lomi an si, ahleiin an nunnak caah aa zuammi hna, a ra laimi rawl cu khoika in dah a rat lai ti a ruatmi hna an si tiah a ti; thlarau lei asiloah minung rumnak ruahnak caah caan hman an ngei lo. Sifak timi Hebru biafang cu Ani le Dal a si, cu nih hin thilti khawhnak ngeih lonak ruahnak a langhter i thilri chambaunak he aa pehtlaimi a si tawn. Cun, vawlei thilri a za tawk a ngeimi hna nih anmah tein sifakmi hna caah rian an ṭuan i an i zuamnak ah anmah he pakhat an si. Jesuh nih sifahnak le sifakmi kha a thim. Aho cung hmanhah innka a kharlo. Amah nih sifakmi hna caah thimnak pakhat -piantharnak ah a kan auh.

A dang thluachuahnak hna: thianhlimnak caah rawlṭamnak, zaangfahnak, lungthin thianhnak, daihnak sertu, dinnak caah hremnak le a dangdang hna cu Pathian nih kan caah lawmhnak a kan chimhmi kha an langhter.

A ngaingai ti ahcun, Pathian uknak cu mi vialte caah le mikip caah a si. Pathian uknak cu sifakmi hna caah ahleicein pekchanh a si, an sifah ruangah siloin Pathian Pennak cu an caah thawngṭha a si caah a si. Pathian nih mi vialte kha a dang tein a dawt hna nain Pathian nih a fale hna lakah a derthawmmi le hremnak a tongmi hna kha a duh deuh hna. Pathian nih mirum le sifak vialte kha pakhat le pakhat cun kan cungah aa khatmi lungputning ngeih dingin a cawnpiak hna. Atu ah zeidah a cang ti ahcun a cawnpiaknak kha a pialter i a bia kha a palh in an leh. Cucaah, atu cu hi cawnpiaknak; thluachuahnak (Beatitudes) hna cungah kan nunnak le kan nunning kha kan thawk kho cang lai maw tiah ruatṭhan hna u sih! Nihin ah piangtharmi kan sicang maw Jesuh keneh zulhnak ah biatak tein kan i zuamcang maw? tihi ruatṭhan hna u sih dawtmi ulenau nulepa hna.

The post 1 February – Reflection first appeared on RVA Hakha Chin.

The post 1 February – Reflection appeared first on RVA Hakha Chin.

Rev. Fr. Dominic Kung Teal i Pathian nih David i sualnak a ngaihthiam bantukin kan zualnak zong a kan ngaithiam ve.

The post 31 January- Zarhteni ca i Thawngṭha hrawmnak first appeared on RVA Hakha Chin.

The post 31 January- Zarhteni ca i Thawngṭha hrawmnak appeared first on RVA Hakha Chin.

30 January- Nifatin Thlarau rawl- Rev. Fr. Dominic Kung Teal

Thlaici le anttamci bianabia

The post 30 January Reflection first appeared on RVA Hakha Chin.

The post 30 January Reflection appeared first on RVA Hakha Chin.

29 January Thlarau Rawl (Fr. Dominic Kung Teal)

Mark 4:21-25 chungin Meiinn cu ihkhun tangah kan chiah lo.

The post 29 January Reflection first appeared on RVA Hakha Chin.

The post 29 January Reflection appeared first on RVA Hakha Chin.

Rev. Fr. Dominic Kung Teal i thlarau thazaang hrawmmi

The post 28 January Thlarau Rawl first appeared on RVA Hakha Chin.

The post 28 January Thlarau Rawl appeared first on RVA Hakha Chin.

27 Januray Reflection (Rev. Fr. Dominic Kung Teal)

Mark 3:31-35 chungin Thlarau Thazaang laknak

The post 27 January Reflection first appeared on RVA Hakha Chin.

The post 27 January Reflection appeared first on RVA Hakha Chin.

Rev. Fr. Dominic i Thlarau Thazaang caah hrawmnak

Lamkaltu Timothy le Titus hna puai

Bible 2 Tim.. 1:1-8; Mark 3:22-30

The post 26 January Reflection first appeared on RVA Hakha Chin.

The post 26 January Reflection appeared first on RVA Hakha Chin.

Mark 3:20-21

Jesuh le a rualchan hna

Dawtmi ulenau nulepa hna, nihin i thawngṭha cu kan liturgical calendar ah a tawibik a si, catlang pahnih lawng a si. Hi thawngṭha tawite ahhin Jesuh i chungkhat pawl nih Jesuh cungah zeimawzat an lung a fak ti kan theih. Amah cu a lung a fim lomi tiah an ti, a ruang cu rawl a ei tawn lo caah le nikhat chung fakpiin rian a ṭuan hnuah dinhcaan a ngeilo caah a si kho men. Cun hi hna nih hin a chungkhat zong an thin a phangter hna. Ngaihchia ngai a simi cu, amah le amah bawmh hmasa nakin midang bawmhchanhnak, zohkhenhnak a tuah. Caan tawite nun i midang caah siloin mah chungkhar calawng lungrethei, tbk., an tuahtawn mi bantuk tein Amah kha siter an duh. Zanlei sangah siseh, zinglei sangah siseh, thlacamnak in a Pa he bia an i ruah lioah an hmulo. Asinain minung pakhat nih annih pawl cu an lung a fak deuh tiah a ti, zeicahtiah voikhat cu Jesuh nih ‘mi pakhat i a ral cu a innchungkhar chungmi lila an si lai’ tiah a ti (Matt 10:36).

Phundang in chim ahcun, hi Bible caang hna nih hin Jesuh i tuahsernak cungah lehrulhnak phun hnih a kan hmuhsak.

Pakhatnak cu mibu nih an lehrulh ning a si (v.20). Jesuh cu ahodah a si timi ruahnak an ngei lo. An theih hmasa bikmi cu khuaruahhar thil a tuahtu, khualtlawngmi profet le pawngkam khua ah phungchimtu a si ti hi a si kho men. Theih an duh caah Amah sinah an kal nain an i ruahchanmi leng tiang a kalpi hna zeicahtiah Thawngṭha a chimh hna i an lungthin cu mei nih a hninh hna. Khuachia kha a ṭhawl hna i a tuahsernak nih an khuaruah a harter. An thinlung ah zumhnak mei a alh. A bia sullam fiang tein an hngal lo nain Pathian nih a thlahmi profet le Messiah zong a si kho men ti cu a fiang ko. An i lawm dih.

Pahnihnak cu a chungkhat hna nih an lehrulh ning a si (v.21). An lehrulhnak aa dang tuk. Nazareth khua ah Jesuh i a nunchung vialte an theih caah a si: khuaruahhar thil pakhat hmanh a tuahpiak ballo; nifatin a rian tlamtling tein tuahnak ah a lungthin a pek; a caancaan ah Pathian kong asiloah an hmai ah Judah zumhnak zulhphung kong ah a thukmi bia pakhatkhat a chim men lai. Cun atu cu a pa i zungthiam thingremh rian kha a kaltak i khualtlawng phungchimtu ah a kal. Jesuh nih a rianṭuannak caah a chungkhar le a rualchan hna i daite le upat awk tlak nunnak himnak kha a hlonh cang dara? tiah an ruat men lai.

Jesuh i tuahsernak nih dai tein umnak le a bia hna, i hlatnak le naih tein umnak karlak ah tlukruannak kha tlamtling tein a kan hmuhsak. Jesuh nih vawlei a nunnak a dongh tiang peknak le hmuhnak, damternak le temtuarnak, rianṭuannak le thla thlacamnak a tuah peng. Amah nih Khrihfa nunnak i tlukruannak kha a kan hmuhsak.

Dawtmi ulenau nulepa hna, midang nih kan cungah zeidah an hmuh i kan kong an chim zongah, Khrih bantukin kan nunnak kha i zohchunh hna u sih. Pathian he kan i dawtnak le kan i komhnak le kan unau hna kan i dawtnak le kan rianṭuannak kha i tlukruanter hna u sih. Hihi Khrih lam a si i hihi kanmah lam zong a si ve awk a si.

The post 24 January Saturday first appeared on RVA Hakha Chin.

The post 24 January Saturday appeared first on RVA Hakha Chin.

Mark 3:13-19

Pahleihnih hna i mission rianṭuannak

Dawtmi ulenau nulepa hna, hitiin an timi a um: Noah cu zu a ri; Jakob cu a lihchim; Leah cu a mui a chia; Abraham cu a tartuk cang; Isak cu mang a manhmi a si; Joseph cu tlaihhrem a si; Gideon cu a thin a phang; Elijah cu amah le amah thah aa tim; John cu a luatmi a si; Job cu a rawk; Jeremiah cu a ṭapmi ngakchia a si; zultu hna cu thla an cam lioah an i hngilh; Peter nih a Bawipa a hlawt i Lazaruh cu a thi cang! Pathian nih a kan hmang kho lo tiah kan ruah ahcun, hi hna hi philh hna hlah.

Nihin thawngṭha ah Jesuh nih mi sawhsawh, santlailo le tlamtling lomi pa pawl kha a Zultu ah a auh hna. Asinain Jesuh nih hi hleihnih hna hi a Lamkaltu ah a auh hna tikah thil pathum a tuah:

Pakhatnak ah, tlang cungah a kai. Tlang cu Moses le Biakam Hlun profet hna caah a rak si bantukin Jesuh caah a duhmi thlacamnak hmun a aiawh. Lungthin tak tein thlacamnak le a zultu hleihnih hna a thim hlanah zeizong vialte nakin Pa duhnak tuah kha a kal hmasa. Zeicatiah hi cu hmailei Khrihfabu caah aa hngatmi abiapi tukmi thimnak a si. Amah nih rianṭuan ṭi a fawi ngaimi hna kha siloin Pa nih a duhmi lawng kha a thim hna. Zeidah kan tuah awk a si ti kha zohchunh awk a kan chiahpiak. Khrih nih a tuahmi kha kan tuah ve maw? Kan nunnak ah a biapimi biakhiahnak kan tuah hlanah Jesuh Khrih bantukin thla kan cam i, zeizong vialte nakin, Pathian duhnak kha kan zulh maw?

Pahnihnak ah, Pahleihnih kha a thim hna. Jesuh nih amah he umṭi ding, phungchim dingin thlah awk le khuachia ṭhawlkhawhnak nawl ngeih dingin a thim hna. Lamkaltu pawl kha amah bawmh awk lawng siloin cawnpiaknak, lamhruainak le thianternak rian hrimhrim i hrawm awkah Jesuh nih a herh hna. Amah zong kan cungah aa hngatchan venak hnga lam pakhatkhat in a kan thim hna. Amah nih a kan herh i a kan thim.

Amah he hawikom bantukin um ticu a zultu si tinak a si. Zultu pakhat cu rabbi ke hram ah a ṭhu i amah sinin cawnnak a ngei tiah an ti. Zultupa cu saya sinah a kal i suimilam zeimawzat a sinah a um hnuah inn ah a kir nain amah he a um. Saya he umṭinak a ruang cu zultu nih saya nunning: a tuahsernak, a ruahnak, a biaceihnak le a intuarnak hmanh kha a hngalh khawhnak hnga caah a si. Pope John Paul II nih “ṭuannak-doing” nakin “sinak-being” kha biapi deuh ah chiah awk a si tiah voi tampi a kan theihter. Pope nih Legionaries of Christ le Regnum Christi chungtel hna sinah (Jan. 4. 2001): “Na si awk a simi na si ahcun, vawlei pumpi mei in na khangh kho lai.” a ti hna. Cun a caan a phak tikah bawipa nih a hmaika lawngah siloin a cawnpiaknak le a tuahsernak zong chuahpi dingin a zultu cu a thlah lai.

Thlahmi si timi cu a lamkaltu si tinak a si, asinain zultu cu lamkaltu in thlah a si zongah zultu a si peng, zeicahtiah zultu sinakin lamkaltu sinak ah graduation (boih ngah) a umlo. Mi pakhat nih Khrih i toidornak le nemnak kha a hngalh deuhdeuh tikah Khrih i umpinak kha midang sinah hmual a ngeiter deuhdeuh. Pathian hngalh, dawt le rianh (serve) lawng a zalo i hi nunnak ahhin innpa hngalh, dawt le rianṭuan piaknak thawngin zungzal nunnak ah anmah he Amah ah lawmhnak ngeih hi a si. Tipil a ing cangmi Catholic hna nih hi rian ahhin zeitluk indah kan i bawmh taktak?

Pathumnak ah, Pahleihnih kha a min in a thim hna. Khrih nih lamkaltu min a sakmi kan theih. Pathian Pennak dirh khawh awkah, hmunkhat ah ṭuanṭi awkah an sining thar a pek hna ti a si. An kawhauhnak, an rianṭuannak nih pakhat cio kha a fianter, cun a dang vialte caah lam phundang cio in ṭuanvo an ngeih, asinain pakhat cio cu thlenkhawh an silo. An nunnak ah a ummi thil pakhat hmanh atu an sining he aa dang kho lo. Kan kawhauhnak le kan rianṭuannak nih kan nunnak ah a ummi thil vialte a tawngh i a tlingter maw? Amah i auhnak nih a kan tawngh lomi kan chunglei zei ṭhen dah a si? tikha ruatṭhan hna u sih ulenau hna.

Dawtmi ulenau nulepa hna, a donghnak ah, midang nih kan chungah Khrih an hmuh maw asiloah kan pawngkam ummi hna he aa ralchanhmi tehte kan si maw? Pathian nih a Khrihfabu hmang in a rianṭuan dingin a kan auh caah kan i lawm maw? ruatṭhan hna u sih!

The post 23 January Friday first appeared on RVA Hakha Chin.

The post 23 January Friday appeared first on RVA Hakha Chin.

Mark 3:7-12

Jesuh i Zangfahnak

Run Today’s Race ah Oswald Chambers nih hitin a ti: “Ka luatnak caah zumhnak cu Pathian ah zumhnak a silo. Zumhnak timi cu, hmuh khawhmi in luatnak ka hmuh zongah, ka hmulo zongah, Pathian cu dawtnak a si timi ka zumhnak ah ka dir peng lai. Thil cheukhat cu meiphu chung lawngah cawnmi an um,” tiah a ti.

Nihin thawngṭha ah Jesuh nih Amah a kawlmi, a duhmi, a ngaimi le Amah a ṭammi vialte hna sinah harnak chungin damnak a pek hna. An zumhnak nih Jesuh kha tawngh awkah an forh. Cun cutin an tuah tikah Jesuh sinin ṭhawnnak a ra i an dam.

Jesuh cu thilṭha le damnak vialte hrampi a si tiah kan zumh. Pathian duhnak kan tuah khawhnak hnga a herhmi vel a kan pek lai ti kan zumh. Amah kan dawt i midang zong dawt awkah lung a kan thawhter mi cu a kan dawtnak ruangah a si.

Mithiang Paul cawnpiaknak (1Kor 13:13) cungah hram bunh in, Catholic Khrihfabu Catechism nih zumhnak, ruahchannak le zaangfahnak timi theological virtues (biaknak lei ziaza ṭha) pathum an um tiah a ti, cu hna cu Khrihfa ziaza cawlcanghnak hrampi an si i Pathian nih zumtu hna thlarau chungah a fale bantukin an um khawhnak hnga le zungzal nunnak an hmuh khawhnak hnga caah a khumh hna. Hi ziaza ṭha hna hi Jesuh nih nihin thawngṭha ah a langhter bantukin a kan cawnpiak.

Pakhatnak cu zumhnak i ṭhatnak a si. Zumhnak timi cu Pathian cu biatak hrimhrim a si caah a kan chimhmi le a kan phuanmi vialte ah Amah kan zumh kha a si. Nihin thawngṭha ah mitampi nih Khrih cu an zumh caah an zulh; annih nih “a tuahmi kha an theih”; A damternak le a thlopbolnak hna kha an hmuh. Asinain zumhnak hramthawknak tal aa tel loin cun ahohmanh nih Amah cu an kawl lo. An zulh deuhdeuh tikah, cu zumhnak cu a ṭhangchin lengmang. Thlacamnak he Khrih kawlnak hrimhrim nih zumhnak a karhter. Thlacamnak ah zeihmanh ka hmuhlo tikah, hnemhnak tlawmte lawng a um tikah, zumhnak ṭhancho dingin caanṭha kha ka cohlan a hau.

Pahnihnak cu ruahchannak ziaza ṭha a si. Ruahchannak cu vancung pennak le zungzal nunnak hi kan i lawmhnak ah kan duh, Khrih biakamnak kan i bochan i Thiang Thlarau vel bawmhnak kan i bochan tinak a si. Mibu nganpi nih Khrih kha an zulh. Mi tampi cu Amah nih a damter hna caah Amah cu an i zuan hnawh. Damter siding ruahchannak an chuahpi dih; Khrih sin phanhnak nih an nunnak a thlen i zawtnak a ngeimi hna nih Amah tawngh an i zuam tikah ruahchannak nganpi in an khat ko lai. Communion (Bawipa Thisa) cohlan ding kan naih tikah zeitluk indah ruahchannak kan ngeih? Hihi Khrih amah ṭhiamṭthiam kha a si. Cun thlarau lei kan derthawmnak le sualnak tampi kan ngeihmi kha kan i theih dih. Damternak kan duh, hihi kan ruahchannak nganpi a si.

Pathumnak cu zaangfahnak ziaza ṭha a si. Zaangfahnak timi cu Pathian dawtnak caah zeizong vialte nakin Pathian kan dawt i Pathian dawtnak caah kan innpa kha kanmah le kanmah kan i dawt bantukin kan dawt tinak a si. Nihin thawngṭha ah, damternak, mibupi le Jesuh nih a ral pawl kha a tlaih khawhnak ding caah hnulei a kirnak hmanh nih a rianṭuannak mission a ruang kha a langhter. Dawtnak nih a dong lomi mibu cohlan awkah a forh, an sinah um awkah tilawng hmanh a hman.

Dawtmi ulenau hna, a dawtnak kan tonmi cu zeidah a si? Dawtnak nih dawtnak a chuahter. Sacramentu he pehtlaimi Pathian i dawtnak nih a tongh cangmi mibu hna kha ruat hmanh! Zeizong vialte kha lamthar in hmuh hram an thawk. Pathian cungah an i lawmhnak le an dawtnak nih Khrih muisam zoh in biaknak ah zeitindah an chiah hna.

Ulenau hna, Jesuh zum law na nunnak ah khuaruahhar thil a cangmi kha zoh!

The post 22 January Reflction first appeared on RVA Hakha Chin.

The post 22 January Reflction appeared first on RVA Hakha Chin.