St. Joseph’s Sister Bu a rak dirhtu St. Emilie, a min sau cu Emilie de Viala a si. St. Emilie cu 1797, September (12) ni ah France ram thlanglei, Gaillac khua in mirum phunsang mi chungkhar in an rak hrin. Ṭa pahnih a ngeimi Emilie cu fanu upabik a si bangin fanu fang khatte a si ti khawh zong a si.

Kum (13) a si ah Paris i a ummi Sister Boarder ah an rak chiah nain kum (2) a rauh ahkhin inn lei ah a rak kirṭhan. A nu nih a thihtak tikah inn rian ṭuan ding ṭuanvo hna a ngei cang. Emilie te inn ah amah a rem lomi sin-um nute pakhat a um. A pa nih Emilie kha va ngeih ding a forh tikah Emilie nihcun a al i, cu tikah a pa le amah karah lungput ning i dannak hna a chuak.

Cu lakah cun sin-um nute nihcun an lung a thawhter hoi hna. Mirum mingei mi Emilie cu thildawh a uarmi a si bangin lungvar mansung hna, sui ngun hna in i ṭamh kha a tlaihchan mi a si. Sihmanhsehlaw a lungthin cu duhsah duhsah in Pathian he a vun i naih tikah thil dawhnak, ṭamhnak, mansung lungvar suingaun hna kha a hlawt i, a nungak thiang sinak kha Pathian sinah thlithup in pekchanh dingah bia a rak i kam.

Emilie cu Bawi Jesuh Khrih sinin langhnak (vision) pakhat a rak hmuh. Cu langhnak ahcun Bawi Jesuh Khrih cu a hmai ah a dir i, a hma hna kha a rak hmuhsak.

France dohthlennak ah hnorsuan in rawhralnak hna remhṭhannak caan chungah Emilie cu Gaillac ah kum (15) rauh tiang ngakchia hna kha fimnak a rak cawnpiak hna. Sifak mi hna, mi zaw hna kha a bawm thiammi Emilie cu a pa nih a mit a rak kem. A pa duhnak kha cohlang loin a ralchanh caah le sin-um nute ruang zongah innchungkhar tlamtlin lonak poipang atu le atu a rak chuak.

1832 kum ah Emilie te ṭafar hna cu ro co ding konglam ah an rak chuak. A ruang cu a putar a simi a thi i a tufa a simi hna nih a ro kha an co ding a si. Emilie cu ro a hmuh cangka, a pa inn in chuak ding bia aa khiah.

A hmuhmi rothil vialte kha a zuar i, Gaillac ṭhiamṭhiam ah inn nganpi pakhat a cawk i, a zawfakmi hna kha zohkhenhnak, sifak mi hna bawmhnak rian kha a rak ṭuan.

A rauh hlan ah nu tampi hna cu an rak i fonh ve i, thlathum a rauh tikah Archbishop nih Sister a cang dingmi (12) hna kha Sister hna umtu ziaza pungsan he umnak nawl a rak pek hna. 1885 kum ahcun nu (26) hna cu Sister cannak biakamnak an rak tuah i Angkifual (သင်္ကန်း) an rak laak. A Bu min kha ‘Langhnak a hmumi St. Joseph Sister Bu’ (ရူပါရုံမြင်သောစိန့်ဂျိုးဇက်သီလရှင်ဂိုဏ်း) tiah min an rak pek. Thong chung ummi hna, siizung i mizaw hna, ngakchia hna i fimthiamnak le sifakmi hna kha pekchanh in rian an rak ṭuanpiak hna.

1856 kum, August thla (24) ni, Mother Emilie a thih tikah amah i a bu cu hmunkip le khuazakip ah a rak phan cang i, Sister Sianginn zapi (42) a rak dirh khawh cang. Mother Emilie a thih hnu kumli a rauh ah a takpum cu rawk loin a rak um rih. 1939 kum ah amah kha Mithianghlim ah an cawisan i, 1951 kum ah Pope Pius XII nih Mithiang (Saint) sinak ah a rak cawisan.

The post St. Emilie de Viala first appeared on RVA Hakha Chin.

The post St. Emilie de Viala appeared first on RVA Hakha Chin.

Audio (aw) zongin ngai khawh a si. 👇👇

Misifak hna kha a bawmtu Mithiang pakhat a si. Padua khua i Mithiang Anthony cu 1195 kum ah Portugal ram, Lisbon khua ah a chuak. Kum 15 a si ah St. Augustine Zateik Bu ah a lut i, a caan a zat tikah Siangbawi cannak a laak. 1221 kum ah St. Francis Zareik Bu in Martyrs panga hna i an ruakpum hna kha Moroco in Portugal hna nih an phorh tikah anmah keneh zulh duhnak lungthin kha a rak ngei. Caan tlawmpal a rauh hnu ah Africa ram i a ummi Mislim hna kha thawngṭhabia va chimh awkah an thlah. Asinain a rauh hlan ah anih cu fakpi in a rak zaw. Thla tlawmpal a rauh ah Portugal ah a kirṭhan. A zulhmi tilawng cu tilawng lam in ennak a ton caah Sisilia ah tilawng cu aa din. Mah in St. Anthony cu Asisi khua ah a kal i, mah khua ahcun Mithiang Francis he an i tong.

Forli pawng i a ummi, mi an phak theng lonak Zateik Sianginn zung ah rian an pek i, umkheng ṭawl rian kha a ṭuan. Ahnu tlawmpal a rauh ah St. Francis bu le St. Dominican bu in Deacon hna kha ordination peknak cu Forli ah an tuah. I theihthiamnak tlawmpal aa kalh caah Dominican Zateik bu in pakhat hmanh nih phungchim awkah an rak i tim lo. Cu a si caah anmah aiawh in St. Anthony nih phung a chim. A phungchim a ṭhattuk caah a uktu hna cu an khuaruah a har ngaingai i, cu nit hawk cun Italy le France ram ah Evangelist in an thlah. Khoika a kal poah ah mipi hna cu a bia ngaih awkah an rak i pum. Amah i a nunnemnak, Biathiang kha a deng tiang a theih khawhnak ruangah zumlotu tampi hna cu an zia an i thleng hna. Mithiang Anthony cu amah i a hawi a simi Zateik hna kha biathiang lei fimnak cawnpiak awkah St. Francis nih khunh a pekmi a hmasabik St. Francis Zateik a si. ‘Hi bantukin hlathlai le cawnnak nihcun thlacam a duhmi, biak a duhmi hna i duhnak kha a hrawk kho lo’ tiah a rak ti.

Mithiang Anthony cu a nunnak a hnubik caan kha Padua khua ah a dither. Kum 36 a si ah cu khua ahcun a thi. A hnu kum ah Mithiang sinak ah an cawisan i, cu ni thawkcun relcawk loin khuaruahharnak a langhtertu a si tiah a min a thang. A ruang cu, amah nih Bawhte Jesuh kha a kut in aa pommi kha mi nih an hmuh caah a si. Amah i a thiangmi Bible ca kha a hlei deuh in theihhngalhnak lungphun can ah amah kha cauk pakhat he siseh, amah i a thiannak lungphun can ah Lily pangpar kung he siseh an tahchunhmi a si. Mithiang Anthony nih a kut in a thlirmi Bawipa Thisa hmaiah a khuk aa bilhmi laa pakhat nih a caancaan ah a zulh ve tawn. Cu ruangah laa a ngeitu pa cu Khrihfa zumhnak a rak ngei ve. Mithiang Anthony cu misifak hna nih an bochanmi Mithiang a si. A thlacampiaknak kha hmuh awk caah a bikin i  ruahchan in pekmi ahlu phaisa, thilei hna kha Mithiang Anthony min chalh in thla an cam cio. A ruang cu, voikhat ah Brother a cang hngami pa pakhat cu Pathian biaknak cauk pakhat kha a laak i a tlikpi tikah Mithiang Anthony min chalh in cauk hmuhṭhan dingah thla an cam. Cu mifirpa cu a firmi cauk kha chiahṭhan dingah thlarau thazaang in namchihnak a ing ti a si.

The post St. Anthony of Padua, Priest & Doctor first appeared on RVA Hakha Chin.

The post St. Anthony of Padua, Priest & Doctor appeared first on RVA Hakha Chin.

Levi chung phun a simi Mithiang Mark i a chungkhat unau a simi Mithiang Barnabas cu Cyprus tikulh ah a chuak. Lamkaltu hna nih amah a min hram Joseph timi kha Barnabas ah an thlenpiak. A sullam cu ‘Thazaang petu’ tinak a si. (Lam 4:37). Mithiang Paul a ziaza aa thlen hnu kumthum a rauh ah amah cu Jerusalem ah a rat tikah, Barnabas nih a bawmh i lamkaltu hna sinah a kalpi. (Lam 9:27). Caan tlawmpal a rauh hnu ah Antiok khua i a ummi Khrihfa hna kha cohlan dingah Pual le Barnabas kha an thlah hna. Mah Antiok khua ahcun pei Jesuh Zultu hna kha ‘Khrihfa’ tiah an rak ti hmasabik hna cu. (Lam 11:26). Kumkhat a rauh hnu ah Paul le Barnabas hna cu Judea peng i a ummi mi sifak hna caah thilri tlawmpal kha an rak ken i, Marka min an pekmi Johan kha Jerusalem ah an i ratpi. (Lam 12:25). Thiangthlarau Pathian i thlahnak thawngin annih cu hmasabik mission rianṭuan hram an thawk. (Lam 13:2). Ahnu ahcun Johan Mark cu hmakhatte ah a lung aa thleng i Jerusalem ah a kirṭhan. Cyprus le Asia Minor ah phung an chim khawh in Lamkaltu pahnih hna cu Khrihfa si a duhmi zumlotu hna nih Judah mi upadi nunphung hna kha zulh awkah a herh maw herh lo ti kha i ceih awkah Jerusalem meeting ah an auh ve hna. A voihnihnak mission rianṭuan ding an i thawh lai zanlei ah Barnabas le Paul cu an i si. A ruang cu; Barnabas nih Johan Mark kha auh ve a duh. Asinain Paul nih hmasa ah a kan tliktak cang tiah auh a duh lo. An lung aa khah lonak cu a fak ngaingai caah, annih cu an i ṭhen. Barnabas le Mark hna cu Cyprus tikulh leiah lawng in an kal i, Paul le Silas cu Siria le Silisia ram ah an kal. (Lam 15:38).

The post St. Barnabas, Apostle first appeared on RVA Hakha Chin.

The post St. Barnabas, Apostle appeared first on RVA Hakha Chin.

Hlan lio Bupi pupa hna chungah minthang bik a simi ringawn lei thiamsang Mithiang Ephrem cu AD 306 kum ah Siria ram, Nisibis khua ah a chuak. Kum 18 a ti ah tipil a ing i, cu tipil a innak kha lehrulhnak caah Khrihfa zumhnak a pom lomi a nu le a pa nih amah kha inn in an ṭhawl. Cu hnu thawkin amah cu Nisibis Bishop Mithiang Jacob i a hnuzul a rak si hnu ah AD 325 kum i tuah mi Nicaea tonpumhnak ah Bishop pa he a va kai ve. AD 350 kum ah Nisibis cu Persia kuttang ah an tlak tikah amah cu Edessa khua pawng, minung an phak setsai lonak tlang cungah a va um i, a fak bikmi le a har bikmi nunzia kha a zul i aa zuam. Amah i a dai ngaimi lungkua chungah cun thlarau lei cauk tampi hna le Bible hrilhfiahnak cauk hna kha a ṭial. Ephrem cu Deacon pakhat ah a hung cang. Asinain i suumnak le Siangbawi cannak laak ding kha a rak al hna. Amah cu Edessa khua ahkhan atu le atu phung a chim i, a hmaan lomi cawnpiaknak kha ralchanh in Catholic zumhnak kha ralṭha ngaiin a dirkamh. AD 373 kum ah Edessa ram ah mangṭam a tlun lio i sifah harnak a tongmi hna kha bawmhnak pekin rianṭuan dingah aa pechan. Mi sifak a bawmhnak hna ahkhan a thazaang vialte a dih i, a lungkua a phakṭhan tikah thlakhat lawng a nung kho cang. Amah i a nganbik a ṭuan khawhmi cu a thiangmi Pathian hla hna kha pumhnak caan ah a telh khawhmi kha a si. Cu ruangah amah kha, ‘A thiangmi Thlarau i Ṭingṭang’ tiah tuanbia ah a min a thang.  

The post St. Ephrem, Deacon & Martyr first appeared on RVA Hakha Chin.

The post St. Ephrem, Deacon & Martyr appeared first on RVA Hakha Chin.

AD 718 kum ahcun Pope Gregory nih ramdang ah thawngṭha chimnak nawl a rak pek. Khrihfa zumhnak a pom lomi hna i zumh palhnak kha zorter awkah Gudenbery tlang cung i a ummi Dobar i a thiangmi kuhthing kha a haupiak hna. Vancung i sual dantatnak kha a hngak mi hna cu an khuavang bawi hna nih anmah khuachia biakinn kha khamh khawhnak thazaang an ngeih lonak kha mitampi nih an lung a fiang i an rak cohlan hna. Cu caan thawkin mission rian cu hmaan tein a karhcho. Biakinn thar le Sister Sianginn hna kha ram chungah tampi a sak hna. Amah i a ṭuannak hna kha fehter dingah Pope Gregory III nih Boniface kha Mainz i Bishop caah Germany ram i Archbishop nganbik min a pek. Mithiang Boniface cu a thih lai kum chungah Netherland i Khrihfa zumhnak a pom lomi hna sinah Evangelist thawngṭha chimnak in a caan kha dihter dingah bia aa chah. AD 754 kum ahcun Dokoam i a thlam chungah dai tein thla a cam lioah zumlo tu hna i thahnak kha a hawile hna he an in. Mah zumhnak ca i a thimi hna (Martyrs) hna an vuinak hmun Fulda Zateik Sianginn ah Mithiang Boniface thahnak a in hlante ah a lu cung i thlir buin aa put mi cauk kha a thlah lo. Mah cauk cu namte hma ruangah hma a pumi Martyr pa pakhat i thidor nih a tlak i thi aa neh mi kha kan hmuh khawh.   

The post St. Boniface, Bishop & Martyr first appeared on RVA Hakha Chin.

The post St. Boniface, Bishop & Martyr appeared first on RVA Hakha Chin.

Mithiang Charles Lwanga le a hawi (21) hna cu Uganda ram in biaknak caah hmasabik thah a ingmi hna tiah an upatmi hna an si. 1870 kum ah Europe rammi Siangbawi hna cu mah ram ah an va phan i, Siangpahrang Metsa chan ah mission rian an ṭuannak cu san a tlai ngaite. Asinain 1885 kum ah Siangpahrang Mwanga a kai i a uk tikah, a miphun karlak ah Khrihfa zumhnak kha cat lakin hrawh awkah bia a chah. A ruang cu, Siangpahrang pa hi pa le pa sualnak a ṭanhmi a si i, mah bantuk ṭhatlonak ziaza le tuahsernak kha Khrihfa Siangbawi le a hawi hna nih an duhpiak lo caah an cungah fakpi in a thin a hun caah a si. Kumthum chung hremnak caan chungah, cu bantukin hremnak a ingmi hna chungah Siangpahrang kuttang i rianṭuantu bawi pakhat a simi Charles Lwanga le a dang a hawile mino (21) an i tel ve. Annih vialte cu Siangpahrang inn in an hnuk hna. Annih kha ‘Khrihfa zumhnak hi nan hlaw lai maw hlaw lo’ tiah Siangpahrang Mwanga nih a hal hna tikah an zapi in ‘kan thih tiang’ tiah awkhat tein an leh. A cheu cu Siangpahrang hmai ah an lu an tan hna i, a cheu cu an hngawng kha fei in pemlak an chunh hna. A taangmi hna kha meng (37) aa hlatnak hremnak hmun leiah an kalpi hna. Mah hna chungah pathum cu lampi ah an thah hna i, a tang rihmi hna kha pher in an zual chih hna i mei ah an khangh hna. Ngakchia deuh pa pakhat cu aana ngei upa pakhat a si vemi a pa nawl peknak in a hngawng ah voikhat an chunh hnu ah a hmasabik ah a thi. Uganda i biaknak caah lu pek in thahnak a ingmi vialte cu Jesuh Khrih an hlam buin an nunnak cu an dihter. Cu hnu ah ‘zumhnak ruang i a thimi hna thisen cu Khrihfa hna caah thlaici a si’ timi Tertullian chimmi bia cu a rak hmaan ngaite. Cu hna thahnak an in kum bakah Baganda hna chungin Khrihfa a simi milu cu zahnih in zanga tiang an karh i, Khrihfa luh dingah Pathian bia a cawngmi hna milu cu zariat in thongthum tiang an phan.

The post Ss. Charles Lwanga & Companions, Martyrs (1886) first appeared on RVA Hakha Chin.

The post Ss. Charles Lwanga & Companions, Martyrs (1886) appeared first on RVA Hakha Chin.

Mithiang Marcellinus cu Rome khua ah minthang Siangbawi pakhat a si i, Mithiang Peter cu khuachia khuavang hna a ṭhawltu pa a si. AD 304 kum ah Diocletian nih Khrihfa a hrem lio caan ahkhan annih cu tlaihkhihnak an ing i thong an thlak hna. Thong uktu Altemius nih an zumhnak kha a uar i a upat hna caah an chungkhar ningin tipil in awkah a rak hal hna. Cu hnu ah annih kha a thli tein thah awkah Silva Nigra an timi tipi chung leiah an kalpi hna. Asinain biaknak caah thihnak an innak kong kha a hnu ah Khrihfa pakhat ah a rak cangmi, nawl ngeitu hna chungin pakhat nih a rak phuan. Biaknak lei i aa zuam ngaimi nu pahnih a simi hna Lucila le Fimina nih an ruak kha a thli tein an laak i, Lebicana lam i a ummi St. Tiburtius i lungkua thlankhor ah upatnak he an vui hna. An thlankhor kha khuh in Constantinople nih Biakinn pakhat a sak i, mah hmun bak ahcun a nu St. Helen zong kha an vui ve.

The post Ss. Marcellinus & Peter, Martyrs (304) first appeared on RVA Hakha Chin.

The post Ss. Marcellinus & Peter, Martyrs (304) appeared first on RVA Hakha Chin.

Khrihfa zumhnak kha hmasabik a dirhkamhtu Mithiang Justine cu AD 100 kum ah Samaria khua, Khrih a zum lomi nu le pa nih an hrin. Cu chan lioah Philosopher hna cu nunnak lam cawnpiaknak in phaisa laak kha an duh deuh caah annih nih Mithiang Justin cungah lungtlin lo nak an ngei. Kum 30 a si ah biaknak caah a thimi (asiloah) hremnak a ingmi hna nih ralṭha ngaiin thih an ngamhnak kong kha tehte khaan in a chim hnu ah Khrihfa zumhnak leiah a rak i thleng. Cu hnu ah a nunnak dihlak kha ca relnak in siseh, Khrihfa zumhnak thlaici karhter dingin siseh aa pechan. Theih ṭung lo ralṭhat hruhnak in sualnak a tuahmi hna i an sualnak le sual dantatnak an innak cu kan cungah ral a si nakhnga lo, kan cawnpiaknak hna kha mitheih in tuah awkah kan ṭuanvo a si tiah a rak chim. Aa ruahchannak kha biatak in ṭuan dingah amah nih Khrihfa biarak kha a konglam langhter chin in dirkamhnak ca pahnih le Trypho he bia i alnak hna kha a rak ṭial. Mah ca hna chungah hlanlio pupa hna i zumhnak le tuahsernak kong le man a ngeimi kong hna an i tel.

Rome khua ah Sianginn pakhat a on hnu ahcun Pathian a hngal lomi philo thiamsang pawl he mipi hmai ah bia i alnak a rak tuah. Anmah i theih lo, hruh ralṭhatnak le a sullam laak aa palhmi hna kha amah nih sual a rak phawt hna. Anmah chungah Crescens an timi pa, ṭhatlonak lei lawng a hmumi pa pakhat nih Justin le a hawile paruk hna kha a rak tlaih hna. Uktu Rusticus sinah a kuat hna i amah nih Mithiang Justine le a hawile hna kha Vahirawa phung a zulmi hna khuachia pathian hna kha a biakter hna. Lungthin hmaante a ngeimi aho poah nih palhnak tuah awkah a hmaanmi biatak kha zeitik hmanh ah kan hlaw lai lo. Kannih cu kan Bawipa Jesuh Khrih caah sifah inpiak in khamhnak hmuhmi nakin kannih nih a dang thil zeihmanh kan hal duh lo tiah a rak ti hna. AD 165 kum, Marcus Aurelius Siangpahrang a can ah Mithiang Justine le a hawi paruk hna kha an lu an tan hna i an thah hna.   

The post St. Justine, Martyr (100-165) first appeared on RVA Hakha Chin.

The post St. Justine, Martyr (100-165) appeared first on RVA Hakha Chin.

Canterbury i a pakhatnak Bishop a simi Mithiang Augustine cu Rome khua i a ummi Andru Zateik sianginn i Zateik pakhat a si. AD 596 kum ah Mithiang Augustine cu a hawi (30) he England ram ah mission rianṭuan dingah Mithiang Pope Gregory nih a thlah hna. Annih cu Kent ramṭhen ah hmun an laak tikah Siangpahrang Ethelbert nih kuhthing tangah a cohlan hna. Zei ruangah a si ti ahcun camh le doih, mitleh thiamnak hna kha an hmang sual lai ti a phan caah a si.

A ṭhami an i timhnak kha Siangpahrang pa nih a rak zumh hna tik ahcun Canterbury ahkahn vawlei hmun tlawmpal a pek hna i, an herhnak khoika hmun poah ah phungchimnak nawl kha a pek hna. Mitampi nih Khrihfa zumhnak kha an rak cohlan i AD 597 kum, Thiangthlarau puai ni ahcun Siangpahrang pa zong tipilnak a ing ve.

Mission rianṭuantu hna cu Pope pa he pehtlaihnak an ngei lengmang i, ‘A sannak leiah kai a duh mi cu a dotdot in a kai lai, peh in lonh khawh a si lo’ timi Pope i ruahnak a pekmi hna bia kha an zulh. Annih cu khuachia khuavang a biami hna biakinn hna khah hrawk loin mah hna kha Khrihfa pumhnak hmun ah an thlen. An khua nunphung hna kha a si khawh chungin an umter ko hna i, zumhnak hmaan lo hna i khuahrum puai hna ahkhan Mithiang hna puai in an rolh hna. Mithiang Augustine nih Canterbury Biakinn pakhat le St. Peter le St. Paul kha pekchanh mi Zateik Biakinn pakhat a sak. Ramkip ah mission thar a phun. AD 605 kum ah a thi i, cu ni thawkin England ram lamkaltu pakhat tiah upat peknak a hmuh.

The post St. Augustine of Canterbury, Bishop first appeared on RVA Hakha Chin.

The post St. Augustine of Canterbury, Bishop appeared first on RVA Hakha Chin.

Thlacamnak, pumhnak phung kha a sertu Mithiang Philip Nerri cu 1515 kum ah Italy ram, Florence khua ah a chuak. A hmet tein toidor tein a ummi a si caah ‘Pippo Buono-Philip miṭha pate’ tiah an rak auh. Kum (18) a si ah khuaruahhar thil lianngan he aa ton hnu ah fiang tein i timhtuahnak um lem loin Pathian i timhtuahnak lamhruainak kha i bochan in Rome khua ah a kal. Zei thilri hmanh ngei loin le a nunnak nih a pek bantukin inncung dot ah sifak ngaiin a rak um. Catlotein thla tu a cam lengmang. Inn ngeitu fale hna kha ca a cawnpiak hna pah in philosophy he pehtlai mi le Bible lei he aa pehtlaimi fimnak kha a cawn pah. Amah cu mi thiamsang pakhat a sit e lai tiah an zumh mi a si. Asinain ruahlopi in a cauk hna kha a zuar i a ziaza a rawkmi Rome khuapi kha thawngṭha chimh hram aa thawk. Amah cu nihchuak capo bia in chawdawr hna ahkhan a kal i Pathian dawtnak kong kha a chim. Amah ngeih a simi; mi a chawnhbiaknak bia cu-‘Ei! U le nau hna; thilṭha tete tuah awkah kannih nih zeitik caan ah dah kan thawk hna lai?’ ti hi a si. 1548 kum ah a sunglawimi Thumkomh Pathian i Brothers unau hna bu kha a ser. A tinhmi cu Pathian biak ah a rami hna he Bawipa Thisa kha suimilam (40) chung biaknak hna aa tel. 1544 kum ah A thiangmi Thiangthlarau puai lai zan ah Mithiang Sebastian i a thlan lungkua ah thla a cam lioah meiṭil pakhat cu a kaa in a paw chungah a lut i a ṭang kha a rak nganter tikah amah nihcun hi bangin Thiangthlarau he a khah cu ‘a za ko cang, Maw Bawipa, na salpa in khawhnak ka ngei ti lo’ tiah a au.

Kum (36) a si ah thlarau lei lam a hmuhsak piaktu Siangbawi pa nawl kha a ngei i Siangbawi cannak a hmu. Cu kum te ahcun Vollicella i a ummi Santa Maria Biakinn ah phungchimbu kha a ser. Aa ngaichih mi lungthin kha tlanglak in hmuh khawhnak thluachuah kha a ngei i, mitampi kha an zia a thlenter hna. Zingkhat chung sualthlah a ngaihpiak hna hnu ah thlarau lei lam hmuhsaknak, phungchimnak kha a tuah tawn. Cu hnu ah Biakinn hna ah va leennak, asiloah zanlei sang Pathian biaknak ahkhan a kal tawn. Nikhat cu Mithiang Francis Yavieca kong a rel dih ahkhan ramdang ah kal i phung vac him kha a lung ah a hung chuak. Asinain thlarau lei lam a hmuhsaktu Siangbawipa nih nawl a onh lo.

Missa a tuah lioah voitampi cu molh phun in a um i, cutin aa tuah cu caan saupi a rau tawn. 1595 kum ah a nunnak i a hnubik caan kha sualthlah ngaihpiaknak in a liamter. Cu hnu ah thluachuah a pek hna i ‘Zeizong vialte a donghnak ahcun kan zapite hi kan thi ko lai’ tiah a ti hna.

The post St. Philip Nerri, Priest (1515-1595) first appeared on RVA Hakha Chin.

The post St. Philip Nerri, Priest (1515-1595) appeared first on RVA Hakha Chin.