Bawipa Pathian cu vawlei pumpi kha Pathian nih a ser lioah a chiahtakmi hmuitinhmi ningin upat tein hman dingah minung hna kut chungah a rak pek bangin pakhat le pakhat zong kha Pathian pekmi laksawng sinak in pakhat le pakhat upat cio ding a rak pekmi a si. Minung hna cu pakhat le pakhat caah Pathian pekmi kokek thil umtu ningcang le minung ziaza he pehtlaimi thil umtu ningcang hna kha upat hmaizah in hawikomh cio ding a si.

Tuchan ah hin minung a laicer chiahmi thangṭhatnak kha tampi kan hmuh. Cu nih cun zatlang nunphung tlaihchannak hriṭem kha a cahter. Vawlei pumpi le cu i tahnak cu a sining tein hmuh thiam awk a caan a cu cang. Hi kong cu minung pakhat cio caah siseh, minung chungkhar caah siseh, a ningcang i san a tlaimi ṭhanchonak caah a herhmi sining a si.

Minung le pawngkam vawlei pehtlaihnak kha hmaan tein theih a hau. A hmaan lomi khuaruahnak hna ruangah, minung cu vawlei kha a uk lai timi ruahnak a chuak i kokek kha khamh zohkhenh ding tiah a chimmi hna cu a lung aa thlengnawng khomi menmen an si, tiah an ti cio. Minung nih vawlei pumpi cungah chiah dingmi lungthin cu ṭuanvo a theithiammi cawmtu pungsan lungtliang in theih a herh.

Minung hna cu mah pumpak biachahnak ruangah a chuakmi kokek le kokek pawngkam kha a khonden hna caah ṭha tein ruahkhunnak tlolh cu kokek pawngkam saknak ah aa telmi Pathian pekmi cawnnak hna kha ralrinmi hmelchunhnak a si. Kannih cu sifakmi pakhat kha zeirel lonak, pawimi ngakchia kha man ngeihter loin hrawhnak, pum tlamtlinglo pakhat kha man ngei ah chia loin, annih kha vawlei pumpi cheuchum an si tiah ruat awkah kan tlolh cio tikah kokek ṭahnak awthawng theih khawh awk a har. A ruang cu vawlei pumpi i thilnung vialte hna cu khat le khat pehtlaihnak an ngei dih.

Minung cu vawlei pumpi he aa pehtlaih lo, vawlei pumpi cungah khuhchilh duhnak an ngei tiin an langhter tikah minung i a hrihram hna cu a kuai dingmi umtu ningcang leiah a panh cuahmah. Minung cu sernak rianṭuannak kha Pa Pathian umhmun chuh awkah an i zuam ruangah annih cu thilnung saram vialte nih dohnak kha an hmaitonh.

Hi thil umtu ningcang nih thinlung aama lomi umtuning lei ah a chanhpiak. Thiamnak pakhatte lawng kha a thangṭhatmi zumhnak ah ṭumchukmi thilnung saram hna cu man ngei lomi thilnung saram sinak in hmuh an si i, a dang luantuk zumhnak pakhat ahcun minung hi a hleicemi man pakhat hmanh kha an ngei lo, tiah an ruahdap. Minung cu minung phu chungin pehtlaihnak chah khawh a si lo.

Vawlei pawngkam le minung hna i pehtlaihnak kha sak ṭhand ingin zuamnak ah minung pakhat le pakhat ngeih dingmi pehtlaihnak kha sakṭhannak tel loin, cun teinak a hmuh kho lai lo. Minung he petlaimi tlamtling tein cawn hlathlainak i tel loin pawngkam vawlei kong kawl le cawn khawh a si lo. Minung kha thilnung saram hna lakin pakhat menmen a si ve, pulrinlo piin a rak chuakmi an si, pumrua muisam he pehtlaimi in biakhiahnak thawngin a rak chuakmi a si…tiin kan ruah ahcun, kannih minung leikap in kokek pawngkam cungah kan chiah dingmi ṭuanvo tuah awk a simi hna konglam cu a lohtlau khawhmi a si.

A palhmi, minung a laicer chiahmi zumhnak cu thilnung saram hna a laicer chaihmi zumhnak caah ngol a herh lo. Cuti tuah a si ahcun a dang cuaithlainak lei aa tluktlak lonak kha a chuahter i, tulio harnak piahtana fianter awk a simi hleiin harnak piahtana thar hna aa chap chih rih. Minung hna a hleicemi theihhngalhnak, a hmaanmi dawtnak, zalonnak, ṭuanvo laak in rianṭuan thiamnak hna kha hnatlak piin man ngeihter a si hlan tiang vawlei pumpi caah minung cungah ṭuanvo a umnak kong ruahchan khawh a si lai lo.

A palh khomi, minung a laicer chiahmi ningcang cu minung pakhat le pakhat hawikomhnak i a biapitnak kong zong kha man niamter in tuah awk an ṭha lo. Kokek pawngkam he pehtlaimi harnak piahtana cu tuchan minung nunning ziaza he pehtlaihmi, pupa zatlang nunphung ṭhanchonak he pehtlaimi, biaknak lei he pehtlaimi piahtana hna a chuahnak hna i a hmetemi hmelchunhnak menmen an si ahcun kannih cu minung pakhat le pakhat karlak a hrampi a ummi hawikomhnak kha thlop loin cun, kokek le kokek pawngkam um minung hna karlak i a um dingmi pehtlaihnak kha thlop khawh a si lai lo. Minung hna cu a dang thilnung saram hna nakin a thiang i a sang deuhmi huham a ngei tiah Khrihfa hna nih an ruah i an zumh. Cucaah minung pakhat le pakhat pehtlai tein upat, hawikomh cio a hau. Kannih cu, mikip hi theihhngalhnak le a hmaanmi dawtnak, pakhat le pakhat i daw diahmah tein biaruah hawikomh thiamnak thazaang kha kan ngei cio. Midang hna he hlangfang tein hawikomh thiamnak cu minung pakhat sinak in a sangmi huham he thutdir umnak i a biapitnak bik a hrampi a si. Pathian cu a serimi vawlei pumpi le minung hna i a hmaanmi pehtlaih hawikomhnak kha a herh ahcun minung pakhat le pakhat karlak chiah hnga dingmi hawikomhnak le Pathian le minung karlak ngeih dingmi a sunglawi bik hawikomhnak hna kha zorter lo dingin zohkhenh a herh. Cuti a si lo ahcun kokek pawngkam caah tuahṭuan bantuk, Angki fual i hruk in, lungtum bantuk mah pumpak kha tawhhrenh i mah ca ṭhathnemnak a kawlmi duhdawtnak zatlaan tluk menmen ah a chuak lai.

The post TUCHAN MINUNG KHA THANGṬHAT ZUMH NING UPADI PIAHTANA (HARNAK) LE THIL DANG CHUAHNAK first appeared on RVA Hakha Chin.

The post TUCHAN MINUNG KHA THANGṬHAT ZUMH NING UPADI PIAHTANA (HARNAK) LE THIL DANG CHUAHNAK appeared first on RVA Hakha Chin.

Minung hna cu a nuammi le lunglawmi hmailei caan cungah zumhnak an ngei lo. Annih cu vawlei pump ii tulio thil umtu ningcang le ningcang fimthiamnak hna i ṭhawnnak kha an hmuh tikah a nuammi hmailei caan cungah mitchinh in zumhnak an ngei hna lo.

Teikpan fimnak le thiamnak fimthiamnak a cuang a ṭhancho paoh ah minung hna le tuanbia he pehtlaimi a ṭhancho cang tiah ti khawh a si lo kha ṭha tein a theitu an rak tam chin. Annih cu hmailei chan i a nuam lunglawmhnak kha lamdang lawngin hmuh khawh a si lai tiah ruahdap in an zumh. Hi bantuk khuaruatnak cu minung ṭhathnemnak caah thiamnak hna nih a pek awk a simi theipar hna alnak a si lo. A leng men in minung hna cu tampi an i thleng i, cat lo a chuakmi tharhlamnak hnna aa ponnnak cu minung kha hmundang ah a hruai hna. Minung nunnak ah khuaruat in rianṭuanmi a biapitnak hna a um ti lo.

Inn muisam suaitu le tlangtlatu kutzung hna cu chan tiluan i thinlung put kha kan langhter ahcun, atu vantong inn dot sang hna, taikkhaan hna i umnak hna cu Globel ningcang fimthiamnak hna kha a langhter i, innchung hmanmi thilri tharhlamnak hna catlo a luang peng ko nain minung nunnak cu lungpanh lomi pungsan pakhatte a si ko lai.

Kannih cu tulio thil umtu ningcang he hin hnangam awk a si lo. Hi thil vialte i hmuitinh le sullam kong biapi ah chia hi ruat ding a si. Cuti asiloah cun tulio umtu ningcang hi phungning bantuk fehter in thinlung chungah pakpalawng pi a sinak kha intuar khawhnak ngeih dingah chuahnak awngka kawlnak a si te lai.

A cunglei i langhtermi hna kha kan zoh ahcun, tulio tuahser rianṭuannak hna dingah nunphung dohnak phun in ralṭha tein tuah cio awkah a biapi ngaiin a herh.

Teikpan fimnak lei thiamnak fimthiamnak hna cu karlak a dirmi thil an si lo. Thil serchuahnak a thawk tein a dongh tiang tan dingmi a dot hna ah hmuitinh mi phunphun a chuah khomi thil can khawhnak phunphun hna cu hmundang leiah an hoih kho.

Ahohmanh nih lungto chan ah kir dingin ruahnak an chuahp lo. Asinain i manhlo rianrang in cawlcanghnak kha zorter i tulio a cang cuahmahmi thil umtu ningcang i bawmhchanhnak kha tlaihchan buin, tlaihkhip khawh lomi rumra ngeihnak a ruahchanmi hlenthawinak ruangah a lotlaumi hmuitinh kawltung le aman hna k ha hmuh ṭhan awk aa tlak.

The post CHAN TILUAN A ṬHANGCHO NAIN LUNGDAIHNAK A UM LO first appeared on RVA Hakha Chin.

The post CHAN TILUAN A ṬHANGCHO NAIN LUNGDAIHNAK A UM LO appeared first on RVA Hakha Chin.

Sihmanhsehlaw kannih hmuh ning le tuaktannak cu kaupi in tuah in hmuh khawh a si. Kannih cungah fimthiamnak hna kha rikhiah in zohkhenh le uk khawh a si. Kannih cu aa ningcang deuhmi, minung he aa lomi, zatlang nunphung ṭhathnemnak aa telmi, kakip ṭhanchonak aa telmi, ṭhatchonak riandang hna caah fimthiamnak kha hman  khawh a si.

Thiamnak lei thiamsang hna khuh chilhnak in luat khawhnak caah zuamnak cheukhat a rak um. Bianabia ah kan chim ahcun thilri a hme pacikte hna a serchuahmi komh in rianṭuanmi cheukhat cu thilri serchuahnak ah pawngkam thurhnawmhnak a ding deuhmi ningcang kha hmannak, sawksamnak a um lomi zatlang nunning pungsan hmannak, i dinhnak le tlaihchan tein i komh in umnak hna kha thapeknak tiin ningcang thar hna kha hneksak in an hman cio hna.

Thiamnak lei thiamsang hna zong nih minung nih kuttongh in an ton ciomi piahtana fianter dingah biapi in an i zuam i an ton dingmi sifah harnak hna an zorter i minung huham a cawisangmi program kha hman khawh a si.

A nuam i aa dawhmi pawngkam kha serchuah duhnak lungthin zong thil umtuning ṭumchukternak hna a khamh piak i, khamnak rianṭuannak pungsan in a zohmi hna caah biatak in bawmhchanh dunak thinlung zong thiamnak lei thiamsang hna thinlung ah thluamthlam tein a um.

Hi ruahchannak a pemi hmuitinhnak hna hi lungpuam lungnganmi ralchannak hna lakah saupi a nguh kho lai maw?

The post RUAHCHANNAK A PEMI TUAH PIAKNAK first appeared on RVA Hakha Chin.

The post RUAHCHANNAK A PEMI TUAH PIAKNAK appeared first on RVA Hakha Chin.

Cheukhat chungkhar hna ahcun tulio ṭhanchonak ningcang le fimthiamnak hna cu kokek pawngkam harnak piahtana kha a fianter lio ko, tiah an ruah cio. Annih nih chawdawr sipuazi a ṭhancho a si ahcun vawlei cung dihlak nih a ton liomi mangṭaam a tlunnak, sifah harnak piahtana dihlak kha a fianter khawh tiah mitam-uak duhnak, teikpan ning a silomi ngaihthiam halnak phun in an chim tawn.

Annih cu sipuazi ningcang timi kha a ṭhat zong ṭhat lo zongah an cohlan i a tawkfang thilchuah ternak, vawlei chungchuak thilri hna kha a ṭha khun ṭhencheu in hmannak le kokek pawngkam caah thinphan lungretheihnak, hmailei chan cithar peh minung hna i an hmuh awk aa tlakmi tinvo hna kha zei ah anr al hna lo. Annih umtu ning kan zoh ahcun amiak tampi hmuh chinchin, lungdi a riam chinchinmi an si. Chawdawr sipuazi cu minung hna i kakip ṭhanchonak le zatlang nunphung i minung vialte an rak i telnakk caah aamah khaannak a um lo.

Caankhatte ah luantuk ṭhanchonak timi sawksamnak phunkhat a rak chuak. Cu a sifak tuk i minung tluklo ummi ningcang he a ralchanmi a si. Sifakmi hna caah a hrampi a herhmi hna kha a bet piak khomi sipuazi, zatlang nunphung cawlcanghnak hna kha ṭuanchuah rianṭuan awkah an khual a nuar.

Cawnnak pakhat i ṭengnge pakhat lawng kha thiam ngaiin cawnnak thawngin thil umtu ningcang dihlak kha hngalh awk a har ngai. Fimthiamnak kulh chungah a ṭengnge pakhat lawng thiam ngaiin hngalhnak cu kuttongh rianṭuannak ah a ṭhahnem ko nain, atu le atu ti bantukin a dihlak kha hmuh lonak, man ngeihter thiamlonak, a ṭengnge pakhat cio i pehtlaihnak kong theihlonak leiah a hoih kho.

A ṭengnge lawng kha hngalh duhnak cu vawlei cung i kan ton liomi hnok cencun piahtana hna fianternak ah a bikin kokek pawngkam piahtana, um nuamhlo sifahnak piahtana, fianternak ah harnak ton a si. Hi piahtana hna kha hmuhnak pakhatte lawngin siseh ṭhathnemnak a cotu phu pakhat i hmuhnak in siseh, a fianter kho lai lo. A nganmi piahtana pakhat tlangtlak fianter dingmi cawnnak cu a dang fimthiamnak hmunkip in ruahnak chuahmi fianternak ningcang hna, a hleicein philosophy fimthiamnak, zatlang nunphun he pehtlaimi, minung ziaza he pehtlaimi vawlei cawnpiaknak ziaza kong hna in a pekmi biatung chuahpi mi hna kha telh chih in ruah a hau lai.

Minung hna a nung in kan umnak cu fimthiamnak hna a cuang a ṭhancho ruangah a chuakmi umtu ningcang caah hriamnam chiah in a sung pek he aa lo i, minung i a nungmi in nunnak caah thiamnak cu a biapibik a herhnak kong zong a hman tiah ruahdap a si. Kannih kan ton liomi kuttongh thil umtuning ah kokek pawngkam rawhralnak, lungretheihnak, a nung in umnak i hmuitinh sunghnak, a phu in umthiam lonak tiah umtu ningcang a palh kha a langhtermi zawtnak hmelchunhnak hna fiang tein a lang. Kuttongh umtuning hmaan cu ruahdapmi nakin a ṭha deuh hringhran ti kha kan theih lai.

Kokek pawngkam piahtana he pehtlaimi ningkeel cu thiltu thurhnawmnak, kokek pawngkam rawhralnak, kokek vawlei chungchuak thilri a rocarnak, tiin tulio caan tei kan tonmi piahtana hna caah biapi in a cheuchum fianternak tiah tuah dingmi rianṭuannak hna kha rikhiah zorter awk an ṭha lo. Hi piahtana hna kha hleikhun ningcang lam in zoh i cawnnak, ruahṭhannak, zulhphung hna sernak, fimchimhnak prokarem hna suainak, mah nih tuahser rianṭuannak he pehtlaih in thlen a herhnak, biaknak lei he pehtlaimi ruahkkhun cohlannak tiah lam phunphun hmang in tulio hmanmi zumhphung upadi ruangah a chuakmi thil umtuning hna kha tlangtlak fianter a hau.

Cutin tuah lo ahcun kokek pawngkam piahtana fianter dingin rianṭuanmi hna a ṭhabik ruatnak thar serchuah rianṭuannak hmanh nih hin vawlei cung pumpi tahnak in khuhchilhnak ningcang hna kha a lonh kho lai lo. Hi piahtana a phi kawl dingah, thiamnak pakhatte lawngin a phi kan kawl ahcun khat le khat aa pehtlaihnak thil kha cheu-par in ṭhen bantuk ah a cang i, vawlei cung huap tahnak khat le khat pehtlaihnak ningcang i a thukmi piahtana (harnak) taktak kha hmaihuh i huh in kawl le fianter awkah i zuammi he aa lo lai.

The post FIMTHIAMNAK RUANGAH A CHUAKMI HNU ZULHNAK. first appeared on RVA Hakha Chin.

The post FIMTHIAMNAK RUANGAH A CHUAKMI HNU ZULHNAK. appeared first on RVA Hakha Chin.

Minung hna cu kokek thazaang cheukhat kha tlaihkhih dingah a zungzal in an rak i zuam peng. Asinain kum tampi lio in an rianṭuannak hna cu kokek thazaang rianṭuannak kha khonden ter loin cu hna cawlcanghnak lam zulh i lamthluan zohkhenhnak menmen lawng anr ak tuah. Kokek nih a onhmi kha kokek kut chungin hmuhmi phun in an rak cohlan cio. Asinain atu ahcun minung hna cu kokek cungah an khuhchilh an uk cang hna i cu hna chungin amiak lak ding an i zuam i, atu le atu ti bantukin cu hna i kotho sitawnning kha zei rel loin an philh. Kokek caah siangngakchia si duh loin saya ṭuan an duh cio. Minung hna cu kha hlan i kokek taksa vawlei he hawikom bantuk i komhnak in atu i komhnak pungsan cu hmaitonh tein ton bantuk an si.

Hi umtu ningcang ah mi hna kha zumh lak in lem an fawi deuh. Vawlei cung vawlei chungchuak thilri hna cu hmancawk lo sawksam cawk lomi thil hna cat loin a chuakmi thil hna an sinak, sipuazi rianṭuan pawl duhning, phaisa hram bunhtu, thiamnak lei thiamsang cheukhat hna i an duhning paoh in an zumhnak an pharh cio. Hi ningcang cu vawlei cungah hman cawk lomi Vawlei chungchuak thilri a umnak kong lih le hrokhrol in chimnak cungah hrambunh in, vawlei chungchuak dih cikcek dingin dop, chuah le hmannak a si.

Vawlei cung i hman cawk lomi thazaang hna le vawlei chungchuak thilri a umnak kong, a dih cangmi hmunhma hna ah annih nih voikhat a thar a chuah ṭhan dingin rianrang tein tuah khawh a sinak kong aupi in thanhnak cu hrihram umlo a palhmi zumhnak a si i, annih cu anmah pumpak ṭhathnemnak caah amiak laknak in a chuakmi ṭhathnem lonak hna zong thinphan awk si lo fianter khawh a sinak kong an zumhnak pharh in an chim ṭheo tawn.

Vawlei cungah tulio kan ton cuahmahmi harnak piahtana tam-uak cu Teipan fimnak le thiamfimnak he pehtlaimi ruahchannak le ningcang hna kha minung nunnak caah kakip in a kilven piakmi, mi tampi nih cohlanmi tuaktan (theory) sinak in thluamthlam, ralrin loin rianṭuannak cungah hram a bunh. Hmunkip ah hi pungsan cu minung le zatlang nunphung he pehtlaimi ukchung kipah hnekchih rianṭuannak i thildang chuahternak vasi ahcun kokek pawngkam rawhralnak hmelchunhnak in kan hmuh.

Asinain hi kong cu minung he pehtlaimi zatlang nunphung uk chungah a ton liomi piahtanak hna lakin pakhatte lawng a si rih. Thiamnak fimthiamnak ruangah a chuakmi thil vialte cu karlak um thil hna i ṭhathnemnak kha ruahchanh i annih chimmi paoh kha an duhning zulhin tuah a si i zatlang nun ningcang le zatlang nunphung umtu ningcang kha annih an herhmi pungsan ningin rikhiah piak khomi umtu ningcang kha hau a kulhpiak i a serpiak hna. Thil umtu ningthar pakhat ser dingah bia an rak chahmi cu annih nih a hmaan tein an sak liomi phu caah a ra chuakmi biachahnak a si.

Nunphung phungphai bantuk a lomi fimthiamnak kha hrambunh in rianṭuannak hna kha thlen dingin i zuamnak cu ruah khawh lomi thil a si. Thiamnak nih a pekmi phungsan cu zeizongte kha a khuhchilh caah cu i a hrihram tel loin cun zeihmanh tuah khawh a si lo; cu he pehtlaihmi khuaruahnak hna nih a khuhchilh caah cucu hmanak zongah harnak tete a um kho. Thiamnak he aa hlaatmi umtu ningcang thiam duh ahcun mah cu nunphung-phungphai bantuk an rianṭuannak he a ralchanh lai i a dih heumi, vawlei ramkip khuhchilh dingin a zuammi thiamnak ri chungin a luat hlei lai lo.

Thiamnak fimthiamnak cu zeizongte kha mah i thirkut he aa lomi khuaruahnak nih a dolh. Thiamnak nih a kulhmi hna cu hi kong kha ṭha tein an hngalh. Cucu ahohmanh kha zei rel loin, ṭhathnemnak amiak le minung ca ṭhathnemnak kha tuak chih loin hmailei lawng a nor chih. Cu i a hnubik dot kha kan hlai tuah ahcun aana ngeihnak cu a biapi a si i zeizongte kha uk awkah a si. A hnupeh vasi ahcun minung hna cu kokek thazaang lawnglawngin minung i a hram kokek kha a uk a tlaihkhih i a duh ningin a tuah khawh. Kannih a dik a hmaanmi zalonnak le zuamcawh in ser tharchuahnak hna caah biachah khawhnak cu a zor.

The post THIAMNAK RUANGAH A CHUAKMI VAWLEI CUNG HUAP HNU ZULHNAK. first appeared on RVA Hakha Chin.

The post THIAMNAK RUANGAH A CHUAKMI VAWLEI CUNG HUAP HNU ZULHNAK. appeared first on RVA Hakha Chin.

Kumzabu (20) a lai i Japan ram ah an thlakmi atom bom hna kong, Nazi zumhnak, Communist zumhnak le aana hmang cozah hna, minung nuai tampi thahnak an rak hmanmi, artlang in an langhtermi ṭihnung ningcang fimthiamnak hna, tuchan raldohnak ah hman dingin an kut cung an chiahmi thazaang a ṭhang chinchin mi hriamnam chiahnak innkhaan (kodong) hna ah an khomhmi ṭihnung mithahnak hriamnam hna kong ruat in zoh khawh cio a si.  Hi hrawhnak hriamnam thazaang hna cu zeibantuk minung kut chungah dah an phan cio i hi thil hna cu zeitindah kan donghter hna lai. Hi thil hrawk khotu thilti khawhnak thazaang hna ngeih cu ṭihnung tukmi kongkau pakhat a si.

Minug cheukhat ruahnak ah minung kutchung ah thilti khawhnak thazaang kan ngei chinchin, ṭhanchonak kan hmuh i humhimnak, a santlaihnak, minung caah ṭhathnemnak, ṭhawnnak thazaang a ṭhangcho deuh tiah a ruatmi nunphung lam a lomi tiluannak chungah aman tharhlammi hna hmunkhatte ah pon in an rak lut. Annih hmuhnak ah umtu ningcang hna, ṭhatnak le a hmaannak hna cu thiamnak a karh a ṭhanchonak he sipuazi (ṭhanchonak) thazaang hna in mah duh tein a ra te lai tiah an ruah cio.

Ngaite tiah cun tulio minung hna cu an ngeihmi thilti khawhnak thazaang hna kha zeitindah ṭha tein hman awk a si lai timi cawnnak an ngei lo. Zeicah tiah cun thiamfimnak ah a ngan ngaingai mi ṭhanchonak cu minung nih ṭuanvo lak thiamnak, aman le chiaṭha thleidan thiamnak (thinlung thian lonak) hne he hmunkhatte ah um in a ṭhangchomi a si lo.

Chan a pehpeh i minung hna cu annih thilti khawhnak thazaang ah rikhiahnak a ummi kha a hngalmi an tlawmte. Cuti a sinak cu kannih kan ton dingmi zuamcawhnak cu zeitluk in a ngan i a ṭhawn timi kha dik tein kan hngalh lo ca zongah a si kho men.

Minung hna cu mah ngeihmi ṭhawnnak thazaang kha hmanthlak ning tein an hmang lai lo, hmaitonh hnga dingmi ṭihnung ral cu nikhat hnu nikhat a karh chinchin. Minung zalonnak ah aa telmi minung nih a thim i bia a chahmi paoh caah a chuak khomi harnak piahtana caah mah nih ṭuanvo a ngeihnak kong, thilti khawhnak thazaang hna hmannak he pehtlaih in an ruat cio lo. Annih pakhatte lawng a simi zulhphung upadi cu minung caah santlaimi a si, humhimnak caah hman a herhnak kong an hmuhsak i cu ṭhawnnak thazaang hna cu an ser chuah cio hna.

Minung hna nawlngeihnak aana tling cikcek in a ngeimi an si lo. Ṭhihphai duhnak, mah ca ṭhathnemnak kawlnak, tulio caante i a herhmi hna he hmuhton tikah, thluamthlam tein mitchinh in a kan forhfialmi thinlung in thil ṭhalo thazaang hna he kan ton tikah zalong tein khuaruat bia in khiah khawhnak cu a ziam ṭheo tawn. Kannih cu thazaang kan ngei chinchin, cu hna kha zeitindah kan zoh khenh lai ti kan theih lo ruangah khamhnak um lo ṭihnung ral he ton a hau cang.

Kannih cu a parpavuan nawlnak kha kan tuah ṭheo tawn. Asinain kannih cu minung ziaza he pehtlaihmi zulh ningkel nunphung a fekmi hrampi ngei lo, minung thilti khawhnak hna i tahnak kha langhter in, mah le lungthin uk khawhnak a cawnpiakmi biaknak lei hrambunh mi cohlannak hna zong an ngei hna lo.

The post MINUNG KUTCHUNG A PHANMI THINPHAN AWK THAZAANG HNA. first appeared on RVA Hakha Chin.

The post MINUNG KUTCHUNG A PHANMI THINPHAN AWK THAZAANG HNA. appeared first on RVA Hakha Chin.

Thilthar Ser-chuah khawhnak le Thil tikhawhnak Thazaang

Minung hna cu teipan fimthiamnak, ningcang fimthiamnak a ṭhanchonak ruangah chan pakhat ah kan phan i, zeibantuk lam dah ka zawh lai ti theih lomi lam hna aa tonnak ah kan phan.

Kannih cu kum (200) chung thlennak tilet hna i ṭhathnemnak a cotu kan si. Tahchunhnak ah tisa khu seh hna, tlanglawng, biachimnak thirhri, lektrik, motor, vanzuanglawng, chemical sehzung, chan he aa tlakmi si-aii hna, thawngzamhnak lei ningcang thiamnak  le a rauh hlante i a chuakmi computer Digital chan, sehzuk hna, (Biotechnologies) timi biology he pehtlaimi nunnak ngei saram hna i nunnak bawm kalasi (cell) hna le cihram chuakkehnak kawl in remhmi fimthiamnak (Nanotechologies) timi samfa khat le atom nakin a hme deuhmi thil hna hlaai in  kawlmi fimthiamnak tiah ningcang fimthiamnak thar hna an si.

Hi ṭhanchonak hna he pehtlaih in lunglawmh awk a simi konglam a um i, teipan fimnak le thiamnak, ningcang fimthiamnak hna cu Pathian nih minung a pekmi thilthar serchuahnak thazaang theipar hna an si i, rianṭuan khawhnak tampi ca zong lam a onh piak.

Ṭhathnemnak caah nun ningcang a thlen piaknak cu vawlei thawkka in minung hna i hleice nak a si. Teikpan ningcang fimnak a ṭhanchonak cu taksa vawlei rikhiah tahnak kha lonh dingah, minung thinlung a nuamh lonak kha a langhter. Kannih zong hi ṭhanchonak caah a bik in si lei fimnak, Engineer le pehtlaihnak lei ukchung i ṭhanchonak hna kha theihpi lo, lawmh loin kan um kho lo.

Kannih cu ṭhanchonak lei rianṭuannak kha pehzulh tein a hmunh khawhnak hnga caah i zuam ningcang hna a kan ser chuahpiak mi science lei thiamsang hna zong theihpi lo le lawmh loin kan um kho hna lo.

Fimthiamnak hna cu ṭha tein lamhumhsak thiam a si ahcun, innchungkhar ah hmanmi thilri hna thawkin, a nganmi lamsul lei ningcang hna, hlei hna, innlo hna, dinhnak dumh hna kha serchuahnak in minung nun ningcang kha a santertu thil hna an si. Kutzung thiamnak lei zong ṭhanchonak a pek i vawlei pumsa leiah a pilmi hna zong kha aa dawhmi vawlei ah a perter kho hna. Vanzuanglawng le vantong inn dot sangsang hna i an i dawhnak kha aho nih dah a al khawh lai. Chan a pehpeh in an rak sunhsakmi kutzung thiamnak hna, hlaphuah/ saknak lei zongah ningcang fimnak thar hna kha an hman cang. Seh thilri thar hna kha a hmangmi hna caah an timhmi dawhnak, minung lawng nih tuah khawhmi mang kha an ṭuanchuah cio hna.

The post KOKEK PAWNGKAM PIAHTANA CAAH KONGLAM HRAMPI MINUNG HNA first appeared on RVA Hakha Chin.

The post KOKEK PAWNGKAM PIAHTANA CAAH KONGLAM HRAMPI MINUNG HNA appeared first on RVA Hakha Chin.

Bawipa cu a zultu hna kha Pathian nih thilnung saram vialte cungah chiahmi Pa le Fa sinak in i komhnak kha fehter in cohlang cio dingin a sawm hna. Bawipa Pathian hmai ah thilnung saram paoh hi man an ngei dih, an biapi dih tiah a nemmi thinlung in a intuarnak kha Bawipa nih a chim.

“Pithlung panga cu piah nih ah an zuar hna a si lo maw? Asinain an lak i pakhat hmanh khi Pathian nih a philhmi hna an um lo. (Luke. 12:6). A zuang lengmang mi va khi zoh tuah hna uh: thlaici an tuh bal lo, rawl an ṭuan bal lo, buk zongah an rawn bal lo: Sihmanhsehlaw Vancung i a ummi nan Pa nih a zohkhenh ko hna. Asiah, nannih cu Van akin nan biapi deuh lo maw? (Mt. 6:26).

Bawipa Jesuh cu hi Vawlei pumpi i aa dawhnak hna kha ralring tein zohkhenh kilven dingah a kan sawn. Bawipa cu zungzal in kokek he i tonnak a ngei i amah cu Vawleipi cungah a duhdawtnak le khuaruahharnak kha a langhter. Bawipa Jesuh cu khuate hna tanpah in khual a tlawn lio, chikkhat aa dinh lioah khan, Pa Pathian nih a serimi aa dawh ngaimi khuacuanhnak hna kha khuaruat pah in a zultu hna kha, kokek aa dawhnak hna i aa telmi Pathian pekmi cawnnak kha a hmuhsak hna.

“Nannih, lo khi ṭha tein zoh na hmah u; rawl cu an hmin dih cang i ṭuan an cu diam cang” (Jn. 4:35). “Vancung Pennak cu mipa nih aa lak i a lo i a tuhmi anṭam ci bantuk a si, asinain an ṭhan tikah an hringso kung vialte lakah a nganbik a si” (Mt. 13:31-32).

Bawipa Jesuh cu sermi thilnung saram vialte hna he hnatlak tein a um caah midang nih an khuaruah a har dih. Annih cu an khuaruah a har i, “Hi pa hi zeibantuk minung dah a si? Thlichia le tilet hmanh nih dahngai a bia an ngaih ko hi,” an ti. (Mt. 8:27).

Bawipa i a umtu ning ziaza cu vawlei he hlatpi in a ṭhu a dirmi biatak a zulmi he zong aa lo lo. Vawlei cung i nun nuamh awk a simi thil hna he zong a ralchanh mi a si.

 Amah kong he pehtlaih in minih soisel in an chimnak kong ah Jesuh nih a chimmi cu, “Mi Fapa cu a ra ve i a ei a ding i mikip nih, “Hipa hi zohhmanh u; mi saram le mi zuram, ngunkhuai khawltu hna le misual hna hawikom hi,” an ti. (Mt. 11:19).

Minung i pum taksa ruang vuaksak, thilri chawva hna le Vawlei he pehtlaimi thil hna kha an ṭhalo tiin a thang a chiatmi khuaruahnak lei thiamsang cheukhat le Bawipa ruahnak cu aa hlattuk hringhran. Cu bantukin aa tluktlak lomi lungthin kaphnih zumhnak a zulmi hna ruahnak cu Bible thiang kha palh ngaiin sullam a lakter hna i tuanbia thawhkehnak kha zohchia a sitertu Khrihfa biaknak lei in khuaruahnak lei thiamsang cheukhat zong an rak um ve.

Bawipa Jesuh cu amah a kut bak in rian a rak ṭuan ve. Amah cu nifate a nunnak ah Pathian sermi thilri chawva hna kha tlang a tlak i, kutzung thiam (lettama) fimthiamnak in cu thilri chawva hna kha pungsan thar ah a canter.

The post KOKEK PAWNGKAM CUNGAH BAWIPA JESUH HMUNHNING (Dal 01) first appeared on RVA Hakha Chin.

The post KOKEK PAWNGKAM CUNGAH BAWIPA JESUH HMUNHNING (Dal 01) appeared first on RVA Hakha Chin.

Kannih cu Khrihfa siseh, Biaknak dang a biami si hna seh, Vawlei pumpi cu mi vialte nih kan ṭhencheu i kan hman dingmi rothil a si i, vawlei i a theipar vawlei chungchuak thilri hna cu minung dihlak kha bawmh dingin timhmi a si tiah kan cohlan cio. Khrihfa hna caah hi bantuk cohlannak cu vawlei pumpi cu mi vialte caah Pathian nih a sermi a si caah Pathian sin dinfelnak kha langhternak a si.

Kokek pawngkam zohkhenh kilvennak caah rianṭuannak paoh ah sifak harsa mi le hnonmi hna i a hram minung tinvo kha a upatmi zatlang nunphung hmuhsak kha khumhchih a herh. Vawlei chungchuak thilri dihlak cu mi vialte caah a timh i, mi vialte nih hman khawhnak nawl an ngei tiah cawnpiakmi upati tangah pumpak ngeihnak chiah cu zatlang nunphung tuahser ning hna caah sui upadi a si i zatlang nunphung le nun ziaza he pehtlaimi ukchung ah a hram aa thawknak a simi upadi a si.

Khrihfa hna tuahtawn ningkeel in cawnpiaknak ah pumpak ngeihnak paoh kha tong khawh a si ti lomi aana tling in ngeihnak a si tiah a rak lehkhan lo. Pumpak in ngeihnak paoh ah hin zatlang nunphung timhnak aa tel ve tiah a cawnpiak. Mithiang Pope John Paul II nih hi cawnpiaknak kha fek tein a rak chimh. Pathian cu vawlei pumpi kha minung pakhat cio nunnak i umnak caah minung phun vialte caah a pek i, ahohmanh kha a hnon lo, ahohmanh kha hleice tinvo a pe lo. Hi kong kha biapi ah chiah in a rak chimmi bia a si.

Pope nih a chimchap mi minung rian, zatlang nunphung, ṭhanchonak sipuazi, ramkhel rian le mipi hna nawlngeihnak telh in minung covo kha upat loin thapek dirkamhnak a um lomi ṭhanchonak prokarem hna cu minu huham he aa tlak lo. Pope nih a fianternak ah Bupi cu pumpak in ngeihnak cu phungning nuhrin covo a si, tiah dirkamh in a chim nain, vawlei chungkhuak thilri hna cu Pathian nih minung caah a rak pek li oi a chiahtakmi tinnak kha bet khawhnak caah hman khawh dingin, pumpak in ngeihmi thilri hna cu zatlang nunphung kongkau caah pawnmi thilri bantuk a si zong kha Bupi nih a cawnpiak.

A hnu pehzulh mi ah Pope nih a peh i Pathian nih minung dihlak caah laksawng ah a pekmi Vawlei chungchuak thilri hna kha mitlawm deuh ṭhatahnemnak ca lawngah hmannak cu Pathian timhtuahnak he a ralchan tiah a chim. Minung chungkhar cheukhat ah an hman liomi a dingfel lomi tuahtawn keel hna kha biapi in biahalnak a um kho.

Sifak mirum thlulo, mikip cu aa khatmi huham kan ngei dih. Pathian cu annih dihlak a sertu bawi a si. (Phungthlukbia. 22:2). A nganmi le a hmemi an dihlak in Pathian nih a ser hna. (Wisdom. 6:7). Pathian cu miṭha le mi ṭhalo hna cungah amah Ni kha a tlanter. (Mt. 5:45). Hi konglam ruangah sullam hngalh khawh a simi hnusultu thil hna a chuak te lai. Paraguay ram i Bishop hna nih an hmuhsaknak ah mikip nih mah le innsaknak hmun caah, innchungkhar humhim in khuasaknak caah tinvo pekmi an ngei cio. Chim duhmi cu minung cu minung cu mah pumpak thilri kha an ngeih cio dih hleiah khuate ah a ummi hna zong fimthiamnak he pehtlaimi fimnak cawnkhawhnak, tangka cawi khawhnak, nunnak aamah khaan chiah khawhnak le chawleh thalnak hna caah covo ngeihnak nawl kan ngeih awk a si.

Kokek pawngkam cu minung vialte nih i hrawm in kan ngeih dingmi a si. Minung dihlak nih pupa chan in a pehpeh kan hmuhmi rothil a si i,  khakha zohkhenh kilven awk mikip nih ṭuanvo kan ngei. Vawlei chungchuak thilri cheuchum pakhat kha pumpak thil caah kan tuah ahcun, cucu mi tampi ṭhathnemnak caah ṭuanvo lakin rianṭuannak a si.

Hitin tuah a si lo ahcun midang hna a nungmi in an dirnak kha alnak a si tiah thinlung chungah thiang tein a umter lai lo. Newzeland ram i Bishop pawl nih, Vawlei cung milu 20% cu misifak ram hna le hmailei cipeh chanthar minung hna an nun an um khawhnak caah a herhmi vawlei chungchuak thilri hna kha mifir damiah nih chuh bantukin sawksam mi caan kha kan zoh ahcun, mi va that hna hlah (lai va nawng hlah) timi nawlbia cu zei sullam dah a ngeih tiah biahalnak an rak tuah.

The post VAWLEI CHUNGCHUAK THILRI HNA KHA MI VIALTE HRAWMMI HMAN AWK THILRI AH RUAHCHANNAK. first appeared on RVA Hakha Chin.

The post VAWLEI CHUNGCHUAK THILRI HNA KHA MI VIALTE HRAWMMI HMAN AWK THILRI AH RUAHCHANNAK. appeared first on RVA Hakha Chin.

Vawlei cung i sermi thilnung saram vialte hna cu a ngeitu umlomi thil an si lo. Nunnak ngei saram hna kha a dawtu maw…Bawipa Pathian, annih cu Bawipa nih na ngeihmi hna an si. (Wisdom. 11:26). Hi konglam cu Van le vawlei a cheuchum a simi kannih kha pakhatte lawng a simi Pa Patahian thawngin sawm kan si i thilnung saram vialte hna cu hmuh khawh lomi ṭemnak hri in an i pehtlaih cio i an dihlak funtom in vawlei innchungkhar bantuk an si. Hika zawnah chim ka duh rihmi cu, Pathian cu kannih kha pawngkam vawlei he naihniam in a kan fonhter caah a ṭhami hmun hna, non hna kha thetse rawn ah canternak kha takpum cung i a chuakmi ngaichiat awk tlak zawtnak pakhat siternak in siseh, thilnung saram hna an cimitnak kha ngaihchiat awk a simi zohchia ngai sinak in thinlung chungah intuar cio awk a si.

Minung khat le khat karlak aa tlaklo tukin hawikomhnak

Hiti ka chimnak cu thilnung saram vialte kha aa khat tein chiahnak a si lo. Minung hna zong saram hna lakah annih a hleice hmun zong kha thilnung saram hna cungah an ngeih dingmi ṭuanvo hna zong alnak a si lo. Hiti chimnak cu vawleipi kha biak awk a simi Pathian sinak in thangṭhat i, cu cungah rianṭuan rawl einak le cu i a rawh fawinak ningcang kha zohkhenh khamh kilvennak kha khapnak zong a si fawn lo. Hi bantuk ruahnak hna cu tluklonak kha a chuahter i a kan zuamcawhtu thil umtu ningcang hmaan he i hlaatnak leiah a kan phakter te lai. Caankhat khat cu thilnung saram hna lakah minung thiannak kha al in minung vialte aa tluk tein cohlanmi ṭhawnnak huham kha kha khamh dingah an tlolh i a dang saram hna khamhnak cungah lungtho tein rianṭuannak ah aa tuaitammi hna zong kan hmuh hna.

Ngaite tiah cun a dang thilnung saram cungah ṭuanvo tlolh in tuahsernak caah lungretheihnak ngeih a hau. Asinain kannih cu minung lakah kan hmuhmi i tlukruan lonak, aa tlaklonak in hawikomhnak hna, cheukhatnak hna nih midang nakin biapi deuh kan si tiah ruat in rianṭuannak hna cohlannak hna kha lungretheih thinphan deuh awk an si. Cheukhat hna cu sifah harsat ruangah a chia ngaimi umtu ningcang minung tluklo sining ah chuahnak awngka um loin an pil i, a cheu phukhat hna cu an ngeihmi thilri chawva chiahnak hmanh umlo tiangin an rum i, ruamkai ngaiin mi cungah um duhnak kha man ngei loin an langhter, hlonhmi thilri tampi kha an tangtak i hmunkip ah hi bantuk thil sining cang hna a chuah ahcun hlonhmi thilri hna hmanh nih hin vawlei hi a rawhter te lai.

Kuttongh sinak in cheukhat minung hna cu mah le mah kha sangpi ah an i ruah midang kha minung ah chiah loin, annih kha a hleice tinvo lami minung ah i ruah in khuasaknak kha zeirel loin kan um. Kan thinlung chungah duhtlai nunnemnak, zaangfah zawnruah thiamnak, nunnak khat minung hna cungah zaangfah zawnruahnak hna a um lo ahcun kannih cu vawlei thilnung saram vialte he funtom in kan um tiah an chimmi cu zumh awk tlak a si hrimhrim lai lo. Ci lohtlau awk tiangin ral a tong liomi a harmi thilnung saram hna chaw lehthalnak kha a doh i, minung zuarthlainak, sifak harsami hna cungah zeirel lonak, a herh lomi minung tiah ruahmi hna hrawh in rianṭuannak hna cungah hmurcipnak hna cu papeknak a hrelh i chimmi le tuahmi aa khat lonak hna an si. Hi bantuk tuahsernak cu kokek pawngkam harnak piahtana caahr al a tu liomi hna rian kha zorternak a si.

St. Francis i thilnung saram hna kha sernak caah Pathian a thangṭhatnak hla ah ton sual in hitin a ti. Maw…Bawi Pathian, na dawtnak kha hmuhsak in nunnak khat minung hna karlak ah pakhat le pakhat aa ngaihthiammi hna la minung phu hna chungin harnak piahtana hna kha fianter dingah lungsau thinfual in nunnak a pekchanh i rianṭuanmi hna thawngin Bawipa kha kan in thangṭhat cio.

Kannih cu kan thinlung kha kan hun i Vawlei cung dihlak he pehtlaihmi thilnung saram hna i pehtlaih funtom in an umnak kha kan cohlan tikah, zeithil hmanh kha kan hnon hna lo i zeizong vialte kha unau ṭafar bantuk ah kan ruah i an dihlak he kan i fonh kan komh te hna lai. Kan Vawlei cung i nunning khat ser a ingmi thilnung saram hna cungah mah he pehtlai lo bantukin nunnak, sersatnak hna cu kannih he nunnak khat minung hna hawikomhnak hmun chung zongah a rak chawnh khawh. Minung hna ah hin lungthin pakhatte lawng a um. Saṭil hna cungah kan ngeihmi sersatnak thinlung cu minung khat le khat komhnak zongah a chuak kho ve.

Thilnung saram hna cungah chiahmi sersatnak cu minung huham he a ralchan. Saram hna zeiah a rel lomi hna cu mah pum aa daw thiammi ka si a ti kho lai lo. Daihnak, ningcangnak, saram hna zohkhenh kham thiamnak hna cu a chung taktak in aa pehtlaimi tlangtar an si. Cu hna kha ṭhen in chiahnak, a dangte hlathlainak hna cu kannih kha a sung a kan pekmi phu chungah a kan phakter.

Thilnung saram vialte hna cu khat le khat pehtlaihnak an ngei dih. Kannih minung hna zong Pathian nih thilnung hna cungah a ngeihmi duhdawtnak zuunhri in hmunkhat ah a kan ṭem i, unau ṭafar bantukin Pathian sin aa thawn thluahmahmi Pathian biak khualtlawng kan si i kannih kan u a simi Turizah Nika, kan far Sanda Thlapa, kan nau Tiva hna he kan nu Vawlei sinak ah a kan funtom.

The post VAWLEI INNCHUNGKHAR MUISAM NUNNAK NGEI VIALTE PEHTLAIHNAK first appeared on RVA Hakha Chin.

The post VAWLEI INNCHUNGKHAR MUISAM NUNNAK NGEI VIALTE PEHTLAIHNAK appeared first on RVA Hakha Chin.