Reflection for Saturday
December 21, 2024 – (Luke 1:39-45)
Luke 1:39-45 cu Bawinu Mary i khualtlawnnak asiloah Elizabeth sin a lennak kong a si i Mary siseh, Elizabeth siseh an pahnih in Pathian vancungmi Gabriel thawngthanhnak in nau a pawi veve mi an si. Cun, hi bible caang hi kan zoh hna a si ahcun, Pathian biakamnak hna zeitindah minung hna cungah a tlincang i a tlin rih lai timi langhtermi zong a si. Hi kong he pehtlaiin tlawmte ruatṭi hna u sih.
Pathian dawtnak cu mi vialte caah a si i a dawtnak in mi vialte kha a kan dong zungzal tu zong a si. Elizabeth nih Mary siseh, a pawi liomi nau siseh, a donnak cu mi hna nih an hrial-an hlawtmi hna sinah Jesuh nih a langhter te hnga mi Pathian dawtnak, cohlaannak tahchunhnak pakhat a si.
Dawtnak kan i hrawmmi hna hi Khrihfa mi hna kan nunnak ah a herh tukmi le pakhat le pakhat cungah kan langhter hnga ding mi kan rian a si. Mary nih Elizabeth sinah a hrawmhmi tuahsernak nih Elizabeth le a fa cu a lawmhter hna. Hihi i hrawmhnak in a chuak khomi lawmhnak tahchunhnak a si bantukin i hrawmnak nun kan ngeih awk a si ti hngalhternak zong a si.
Elizabeth nih Mary sinah thluachuah bia a chimmi le a thangṭhat mi hi Mary nih Pathian a zumh ruangah a si i, kannih zong Pathian biakamnak kan zumh tik paoh ah zeitindah thluachuah kan hmuh khawh ve timi zohchunh awk tlak le kan theih ding mi a si.
Cun, Pathian biakamnak cu mi vialte caah a si. Elizabeth i thluachuakmi bia cu Pathian biakam a thei i a tling lai tiah a zummi hna paoh caah a si. Hihi hlawtmi hna asiloah ningzah awk tlak ah ruahmi hna hmanh kha Pathian nih thluachuah a pek ko hna timi a kan hngalhtertu a si.
Cupinah, Pathian biakamnak hna cu zeibantuk minung dah kan si timi a kan hngalhtertu zong an si. Mary nih a chungah Bia (Jesuh- Pathian bia) aa ken bantukin kannih Khrihfa mi hna zong nih Pathian kha kan i ken ve timi a kan theihter. Kan i kenmi bia cu nunnak a kan pe kho tu a si i cu BIA cu kan ngai lai maw, kan hlawt lai timi cu a kengtu pakhat cio nih kan i thim ding a si. Nunnak maw nai thim lai thihnak dah?