THLACAM NUN NGEI UH
(Lk. 18:1-8), “Lungdong loin thla nan cam zungzal awk a si timi cawnpiaknak caah Jesuh nih hi bianabia hi a chimh hna: Aa thawh i, “Khua pakhat ah hin Pathian zong a ṭih lo i mi zong a hmaizah lomi biaceihtu bawi pakhat a rak um. Cun cu khua ahcun nuhmeinu pakhat a um ve i ka bia kha ka ceihpiak tuah tiah atu le atu kha a ra lengmang. Biaceihtu nih caan saupi chung cu a al lengmang, sihmanhsehlaw a donghnak ahcun Pathian cu ka ṭih lo i minung kha ka hmaizah hna lo nain hi nuhmei nu nih hin hnahnawhnak a ka pek lengmang caah a bia cu ka ceih piak ko lai. Cu lo ahcun a ra lengmang ko lai i ka re lam a ka theihter chin lai, a ti,” tiah a ti. Cun Bawipa nih cun a peh ṭhan i, “a ding lomi biaceihtu bawi nih a chimmi cu nan theih cang. Pathian nih tah amah a mi hna, chun zaan hlan in bawmh hal awkah a au lengmang mi hna cu thiamcoh loin maw hnga. Anmah bawmh awk ahcun a khul a nuar ko hnga maw? hihi kan chim hna anmah cu thiam a coh hna lai i, cucu khulrang tein a tuah lai. Sihmanhsehlaw Mi Fapa nih a rat tikah Vawlei ah hin zumhnak a hmuh te hnga maw? tiah a ti.
Thawngṭhabia chungin “Thlacam nun ngeih uh” timi in thazaang la hna usih. Nihin kan Bawipa Jesuh nih lungdong lo tein thla nan cam zungzal awk a si, a ti. Thlacam timi cu kanmah nih kan tuah khawh lomi kha a tuah khotu Bawipa kha bawmhnak kan halmi kha a si. Mi vialte nih kan tuah khawhmi a um i, kan tuah khawh lomi a um. Mi vialte nih kan tuah khawhmi cu thlacamnak hi a si. Mi vialte nih kan pekchanh khawh lo, mi vialte nih ṭhatnak kan tuah khawh lo, mi vialte nih kan tuah khawhmi cu thlacamnak hi a si.
Cucaah nihin kan Bawipa Jesuh zong nih lungdong loin thla nan cam zungzal lai a ti. Thlacamnak cu Pathian he hawikomhnak, Pathian he biaruahnak a si. Thlacamnak cu ngakhcia, pitar putar, misifak, mirum, ahopaoh nih tuah khawhmi cam khawhmi a si. Billy Graham nih Thlacamnak cu zinglei innka hunnak a si, zaanglei innka Karnak tawhfung ah hmang tuah a ti. Thlacamnak cu Khrihfa hna kan hriamnam ṭhabik a si.
(Gen. 32:9-21) chungah Esau le a ralkap zali cu anau Jacob thah dingah an rak cang timi kha Jacob nih a theih tikah Bawipa sinah thla a cam. “Ka u Esau kut chung hin ka khamh ko tuah,” tiah thla a cam. Thlacam tikah hin a camtu minung hi kan ṭhawng lo. Asinain kan hei chonhmi Bawipa tu hi a ṭhawngmi lakah a ṭhawngbik Bawipa a si. Jacob nih amah lei a zoh tikah a nupi, a fale rual he raldoh cu chim hlah, thinphan in thlik colh ding a si ko. Cucaah Bawipa cu a fuh. Ral a si cangmi Esau le Jacob unau cu Jacob thlacamnak le a rianṭuannak nih unau taktak an si ṭhan. Thlacamnak cu Khrihfa hna kan hriamnam ṭhabik a si.
(Josuh. 10:12-13) chungah Josuah nih Amon mi hna tei khawhnak caah Bawipa sinah thla a cam i, Israel mithmuh ah ni cu Gibeon ah a dir peng i, thlapa cu Aijalon nelrawn ah a dir. Miphun hna nih an ral hna cu an tei hlan tiang ni cu a dir peng i thlapa zong a dir peng. Lungdong lo tein Bawipa sinah chun he, zaan he bawmhnak a halmi hna an thlacamnak aw cu Bawipa nih a theih piak hna i an duhnak kha a tlinter ko hna. Thlacam nun ngei usih.
Thazaang petu /- Saya Francis Khua Pheng