TANTAKMI MAW KAN SI? KAWH AUHNAK A HMUMI DAH KAN SI?
Nihin ni ah Khrihfa Bupi nih rel dingin a kan timhpiakmi (2Jn. 1:4-9 / Ps. 119 / Lk. 17:26-37) tiang a si. Luke thawngṭha hi a tawinak tein kan rel lai, “Noah nih lawng chungah a lut i buanchukcho kha a tlung i an thih dih ni tiang hrimhrim kha an ei an ding an i ṭhi an i um. Lod chan i a rak si bantuk khan a si ve lai. An ei an ding, an i caw an i zuarh, thlaici an cing, inn an sa. Lot cu Sodom in a chuahni ah khan mei kat cu vancung in a rung sur i a thah dih hna. Cuticun Mi Fapa a langhni ahcun a si ve lai. Amah nunnak khamh aa zuammi cu a nunnak cu a sung lai, a nunnak a sungmi nih cun a nunnak cu a khamh lai.”
Kan relmi thawngṭhabia nih a kan cawnpiakmi cu Mi Fapa kan Bawipa Jesuh Khrih voihnihnak a ratnak ni ah Pathian Pennak a dinh tikah zeibantuk thil dah a cang lai ti kha a chimchung cia. Mi Fapa a rat ni ahcun, Bawipa ni ahcun thinlung timhlamh loin an um lai i, an hna a ngam lai i vawlei khuasak tintuknak lawng an ruat lai i, taksa nuamhnak lawng kha an kawl lai i zeitik caan hmanh ah pumsa duhnak lawng kha an kawl lai i, Thlarau duhnak ah Thlarau ah ralrinnak an ngei lai lo ti kha kan Bawipa Jesuh Khrih nih a kan chimhchung. Duhdawtmi u le nau, nu le pa hna nihin kan relmi thawngṭhabia he pehtlai in (AD kum 2000) a tlin lioah Khrihfabu pakhat hna cu an ni cawnpiak tikah an Pastor pa nih a cawnpiak tikah cun thianglawr a um lai tiah AD (kum 2000) ah a ti i, lo ṭuan ti hlah u, ei ding ti hlah u” tiah zaan khuadei chungnitlak kan Bawipa Jesuh Khrih rat lai kha an hngah.
Nihin ni ah kan relmi thawngṭhabia nih a kan chimh duhmi cu, “lo ṭuan hlah u, thlaici cin hlah u,” ti kha a kan chimhduhnak taktak a si lo i, zeitik caan hmanh ah Thlarau ah ralring tein nan umnak hnga ti kha a kan cawnpiak deuh duhmi cu a si. Duhdawtmi u le nau, nu le pa hna, “sum sumi pahnih lakah pakhat lak a si lai i, lo a kal i rian a ṭuanmi pahnih lakah pakhat lak a si lai i, pahnih a itmi lakah pakhat cu lak a si lai” tiah a ti. Duhdawtmi u le nau, nu le pa hna aho kha dah lak a si lai i aho dah a tangta lai kan ti a si si ahcun, “A nunnak khamh a duhmi nih cun a nunnak a sung lai i, a nunnak a sungmi nih cun a nunnak cu a khamh lai,” tiah a kan ti i Pathian duhning tein kar a hlang i Pathian nawl a zultu (a nawlbia a zultu), Bawipa ṭihzahbu tein kar a hlangmi nih cun a nunnak kha a khamh lai i Thlarau karhlannak ram ah Thlarau duhnak a cuantu, biatak a zultu kha khamh a si ko lai.
Duhdawtmi u le nau, nu le pa hna zeitik caan ah dah pahnih lakah pakhat lak a si lai (thianglawr a si lai) kan timi hi a tikcucaan kanmah nih kan hngal kho lo i, kan Bawipa Jesuh Khrih cu bia an hal tikah, “Bawipa…khuazei ah dah cu bantuk ni cu a can lai,” tiah an hal tikah, “Saruak umnak langta an nip um tawn,” tiah a ti. A chimduhnak cu vawlei cung mi vialte hi nganhtami paoh cu an thi dih lai ti kha a chimduhmi a si. Vawlei cung a rawh dih, Vawlei cung mi vialte kan thih dih caan khi Mi Fapa a rat caan cu a si ko ti kha a chimduhnak a si. Duhdawtmi u le nau, nu le pa hna nihin kan relmi bible pakhatnak ah Mithiang Johan nih ca a kan kuatmi ah cun, “Kan Pa nih a kan fial bantukin na fale cheukhat cu biatak in an nung ti kha ka theih tikah ka lung aa lawmtuk hringhran,” tiah a ti. A chimduhnak cu, na fale cheukhat cu biatak in an nung tiah a timi cu, Khrihfabu chung i a ummi minung hna kha Pathian ah an ni biatak i, biatak nun in kar an hlang, Khrih cawnpiaknak in kar an hlang, Khrih duhning kha an zoh peng, Khrih duhnak kha tuah khawh an i zuam peng, cu thil nih cun ka lung a ka lawmtertuk a ti.
Asiahcun duhdawtmi u le nau, nu le pa hna kannih tah kan chungkhar cio ah hin kan fale hi biatak in an nung ko timi a kan lawmhter tlukmi thil hi vawlei cungah a um ti awk a si lo. Suingun chawva tamtuk an kawl khawh caah nu le pa nih kan i lawmh awk a si ko nain Pathian dawtnak theih in, Pathian ṭihzah bu tein biatak chungah an nun tikah hin kan i lawmh bik awk a si. (2Jn. 1:5) ah, “Cucaah cun kan dawtmi Bawinu, pakhat le pakhat i daw hna usih,” a ti. Ka dawtmi Bawinu a timi cu Khrih nih a dirhmi a Khrihfa Bupi kha, “Ka dawtmi Bawinu” tiah a ti i, cu Khrihfa Bupi chung i amah a zumtu mi hna kha biatak chungah nan nun caah ka lung aa lawm hringhran, tiah Mithiang Johan nih a kan tinak a si. Asiahcun biatak cu zeidah a si kan ti ahcun Khrih cu biatak a si. Khrih nih, “kei cu biatak ka si” tiah a ti. Amah pekmi nawlbia cu biatak a si fawn. Titus chungah kan hmuh khawhmi cu, “Khrihfa Bupi nih a kan cawnpiakmi hi biatak a si,” tiah a ti. Khrihfa Bupi nih a kan cawnpiakmi le Khrih nih a kan cawnpiakmi hi aa khat. Khrih cawnpiaknak cu Khrihfa Bupi nih a kan cawnpiak chin mi a si. Cucaah cun duhdawtmi u le nau, nu le pa hna nihin ni ah kan relmi slam chungah kan hmuh khawhmi cu (Ps. 119:1), “an nunning ah siseh sawi awk zeihmanh a um lo i, Bawipa nawlbia a zulmi mi lunglawm an si. A nawlbia kha a zul i lungthin dihlak in a nawl a ngaimi cu mi lunglawm an si.”
(Ps. 119:10), “Ka lungthin a dihumnak in na rianṭuan kha kaa zuam. Na nawlbia kha zul loin kan umnak hnga lo ka bawm,” tiah a ti. Duhdawtmi u le nau, nu le pa hna cucaah cun Pathian a nawlbia zul khotu, a biatak chungah aa hnim peng khotu kan si khawhnak hnga ding caah kan Bawipa Jesuh Khrih cu bawmhnak hal usih law, Thiang Thlarau Pathian nih a kan umpi a si ahcun Bawipa Jesuh Khrih duh ning tein khar a hlang khomi kan si lai i, cucaah cun nunnak a hmumi kan si lai. Zeitik caan hmanh ah, khoika hmun hmanh ah kan Bawipa Jesuh Khrih ra seh! Ready peng kan si lai i, a tangtami si loin kawh auhnak a tongmi kan si lai.
Thazaang petu /- Saya Canute Bawi Kam