Timhcia tein na um maw?

Bible thiang relding: Wisdom 6:12–16; 1 Thessalonians 4:13–18; Maṭhew 25:1–13

Nihin gospel chungah Jesuh nih ngaknu 10 hna bianabia in a kan cawnpiak. Ngaknu 5 cu an fim i 5 hna cu timhnak zeihmanh a ngei lomi, a dai thlang mi an si a ti. An dih lak in an meiinn cio ken in nupi ṭhi tlangvalpa a rat lai kha an hngak cio hna. An meiinn le an zinaan hi mah tein rawih cio a si fawn. Tlangval pa a ra phanh tikah a cheu hna i an meiinn cu zinaan a dih cang caah a mit. A cheu tu cu nuam tein ṭhitumhnak puai, inn chungah an lut ee tiah Jesuh nih a kan cawnpiak.

Nihin nang le kei zong tipil nak kan in ka ah mei le puan rang kha pek kan si ve. Kan ceunak mih ter lo dingin le kan thianhlimnak hnomhter lo dingin ralril zong pek kan si. Mei inn caah zinaan a herh bangin, Khrihfa pakhat dirhmun le Jesuh hnu zul pakhat sinak dirhmun in kan ceunak caah ṭhatnak (virtues) kan ngeih ve a herh. 

Kan nun caan ah ṭhatnak kan tuah mi hi pakhat le pakhat chawva kan i coih bantukin ni hmanung bik ni ah cun i coih khawh a si lai lo. Nihin cathiang chungah kan hmuh mi hna zong zinaan coih khawh an si lo. Mah le tuah ning cio, i put ning cio, i timh ning cio in Pathian hmai ah kan phaan te hna lai. Ṭhatnak tuah nak in ready tein kan um a herh ko. 

Khrihfa hna kan i dawhnak cu Jesuh nih a kan dawt bantukin pakhat le pakhat cungah dawtnak lungthin kan ngeihmi hi a si. Jesuh nih kan caah ṭhatnak a kan tuahpiak bantukin pakhat le pakhat cungah ṭhatnak kan tuah mi kha a si.

Nihin nang na zinaan(virtues) zeitluk in dah na khon cang i timh cia tein Bawipa a rat lai nak ni kha na hngah ve.

“Cucaah cun, a ni siseh, a caan siseh, nan hngalh ṭung lo caah ralring tein um ko u”(Matt 25:13) tiah Jesuh nih a ti.

Thazaang petu /- Fr. Fidelis Maung Sein