Pope nih November thla chungah thlacam tinhmi: Rumnak le chawva hna kha ningcang tein hmannak

Pope Leo XIV nih November thla caah thlacam a tinhmi a chuah. Catholic Khrihfa hna nih an rumnak le a ngeihchiah chawva hna kha ningcang tein le sullam ngei tein an hman khawhnak hnga thlacam dingi a sawm hna i cucaah rumnak taktak cu thilri chawva i khonnak ah khan si loin siannak he pekchanhnak ah a um ti kan hngalh khawh lai tiah a ti. Pope he thlacamṭinak “Pope’s Worldwide Prayer Network” nih Cawn nihnih ni ah khan video in a chuah. Cu thlacamnak ah, “kan ngeihmi thilri chawva vialte, vawlei ṭha, kan fimthiamnak le kan hlan i a rak nungmi an rak i zuamnak vialte hna hi Pathian sin in a ra mi lawngte an si tiah Pope Leo nih a ti. Kanmah pakhat lawng nih kan i ngeih khawhmi zeihmanh a um lo i zeizong vialte hi Pathian pekmi laksawng an si i kan i hrawm dih tiah a ti. Sihmanhsehlaw, a caan ahcun kan kawl kan hawlmi chawva hna le rumnak hna nih kan thinlung a puarthauter i mah zawn lawng a kan ruahter caah sifak santlailo bawmhchan a herhmi hna kha a kan philhter tawn tiah a chimchap.

Kan ngeihmi thilri chawva hna kha siannak he mi kan hrawm hna lo ruang ah siseh, kan ngeihmi thilri hna kha ṭhatnak rianṭuannak ah hmang lo in nawlngeihnak le mah ṭhawnnak caah kan hman caah kan ngaithiam hram ko, tiah Pope nih thla a cam. A hmaanmi le a dikmi rumnak taktak cu kan i khonmi thiri chawa kha si loin siannak he kan pekmi a si tiah Bawipa Jesuh nih a ti mi kha Pope nih a nolh ṭhan. Vawilei cung thilri nih a uk lo mi nih vawlei caah thlennak a chuahpi khawh zeicah tiah cu bantuk lungput a ngeimi nih a dik a hmaan ning tein rian a ṭuan i sifak mi derthawm hna caah ruahchannak thlaici tuhtu asi tiah a ti. Cucaah kan ngeihmi thilri, tangka, fimthiamnak le kan caanṭha hna cu minung vialte unau kan sinak caah a hmang thiammi kan sinak hnga kan cawnpiak ko tiah Pope nih thla a cam.