Nigeria Bishop phu nih zalonnak le daihnak he thimnak tuah khawhnak dingah nawlnak an tuah
Nigeria ram mee thlaknak (thimnak) tuah tik ah zolong tein le dai tein tuah khawhnak ding ah Nigeria Bishop phu nih nawlnak an tuah i, mee thlak hlan ah Nigeria rammi hna nih ni thum chung thlacamnak le rawl ulhnak an tuah tiah theih asi. Nigeria ram thimnak he peh tlai in Nigeria mipi nih zalong tein an hruaitu an thim kho lai maw ti mi kong ah Nigeria Bishop hna i an lungretheihnak kong, Africa ram i Catholic Secretariat Secretary General a simi Fr.Michael Banjo nih Vatican Media he bia ruahnak an ngeih lio ah a chim. Kan hnu thla October 23 zong ah, Nigeria nichuah chaklei Taraba State, Binnari khua ah hriamtlai phu an lut i khuami hna cu meithal in an kah hna i an dawr thil an fir piak hna. Cu ruang ah tual chungmi cheukhat cu tiva an tan i an zaam nain cheukhat cu tiva kam an phak manh hlanah ti chungah an pil caah minung 62 nunnak a liam pin ah 52 nih hliamhma an tuar. Cu hlan deuh, October 17 ni zong ah khan, nichuah chaklei ummi Cameroon ramri, Gamboru khua ah, ralkap mawtaw aa zulmi hna cu hriamtlai phu hna nih an kah i ralkap mawtaw pakhat nih vawlei chungphummi bom a pah caah, bom buarknak le hriamtlai phu i kahnak ruang ah ralkap 10 le ralkap bawmtu(pituhsit) 5 an thi.
Cu thil a can hlan deuh, October 10 zong ah, Zamfara peng, Gwashi in Nasarawa kar ah khuachung chawdawrmi hna caah thilri phurtu mawtaw hna cu acozah ralkap nih an zul ko hna nain hriamtlai phu nih an rak kah hna caah minung 20 hrawng an thi i cu chung ah 12 cu mi tualchungmi an si. Nigeria cu ramchung ral a thomi (civil war) ram a sinain thimnak(mee thlak) ai tim lio mi ram asi. Official electoral calendar nih cun president le legislative thimnak cu a ra lai mi 2027 January 16 ah tuah ding in timhtuahnak an ngei i ramkulh governor le assembly tharchuahnak cu February thla ah tuah ding in timhlamhnak an ngei. Nigerian thimnak commission nih rampumpi ah thimfung thlatu (mee thla tu) milu 103.4 million an si tiah a langhter. Thimnak phichuak zohfel dingin timhtuahnak an ngeih pin ah Nigeria Thimnak Data Observatory hmangin zohfeltu 4,000 le thimnak konglam felfai tein a hlathlai tu online platform pakhat zong hman asi lai tiah theih asi.