PENNAK TAWH
Jesuh nih mi zapi hmaiah nun hram a thawk cangka in mi cheukhat kha amah umṭi ding le amah rian ah i tel ve dingin a thim hna. A milu in pahleihnih an si. (Mk. 3:13-19). Amah nih a nawlngeihnak kha a cheuh hna i Pathian Pennak kong chim awk le mizaw damter awkah a thlah hna. (Lk. 9:2). Annih cu Khrih Pennak ah a bawm zungzaltu ah anni hmu ko i anmah chungin Bupi kha a hruai.
“Ka Pa nih keimah kha uknak nawl a ka pek bantukin keimah zong nih nannih kha ka pennak cabuai ah nan ei nan dinnak hnga le Israel miphun phunhleihnih kha biaceih awkah bawi ṭhutdan cung ṭhutnak nawl kha kan pek ve hna”. (Lk. 22:29-30).
Simon Peter cu pahleihnih hna lakah pakhatnak hmun kha a lak. (Mk. 3:16, 9:2, Lk. 24:34, ICor. 15:5). Jesuh nih amah kha ṭuanvo a dang tein a pek. Pa sinin biaphuan a hmuhnak thawngin Peter nih, “Nangmah cu Khrih, a nungmi Pathian Fap ana si,” tiah a zumhnak kha a phuan. Cu tikah kan Bawipa nih hitin a ti ve, “Nangmah cu Peter na si, Hi lung cungah ka Bupi kha ka sak lai; Hell kutkaa nih a tei lai lo,” (Mt. 16:18). “A nungmi Lung,” Khrih nih Peter cung sakmi Bupi cungah teitu si dingin bia a kamtak. (IPet. 2:4). A phuanmi zumhnak caah Peter cu aa hnin kho lomi Bupi lung in a hmun zungzal. A rianṭuannak cu hi zumhnak a rawhnak hnga lo zohkhenh awk le hi zumhnak chungah a ummi unau hna lung fehter kha a si. (Lk. 22:32).
Jesuh nih Peter kha nawlngeihnak phunkhat a pek. “Keimah nih nangmah kha Vancung Pennak tawh kan pek lai i Vawlei cungah na hrenhmi paoh cu Vancung ah hrenh a si lai; Vawlei cungah na thlahmi paoh cu Vancung ah thlah a si ve lai,” (Mt. 16:19). “Tawh” cu Pathian chungkhar a simi Bupi uknak nawl kha a si. Tuukhal kha Jesuh nih mah nawl a peknak kha a thawhṭhan hnuah a fehter ṭhan. “Ka tuu kha rawl va pe tuah hna…” (Jn. 21:25-17, 10:11). “Hrenhnak le thlahnak” nawl hi Bupi chungah sualthlahnak, cawnpiaknak le ziaza lei biakhiahnak kong ah nawlngeihnak a si. Jesuh nih mah nawlngeihnak kha lamkaltu hna rianṭuannak thawngin Bupi cungah a pek i a bikin Peter cungah a pek. (Mt. 18:18). Zeicahtiah amah sin lawngah pennak tawh cu pek a si.