Khrihfa Ralkap Ttha

Caan ttha caan sunglawi a kan petu kan biakmi kan Pathian a minthiang thangtthat in um ko seh! Nihin Oct 29, 2026 ni ah kan Nu Bupi nih a kan timhpiakmi voikhatnak Bible Efesa 6:10-20 chungah zeidah kan hmuh ti si ahcun raldoh thuam kong kha kan hmuh mi a si. Hi Bible hna chungin ruahtti le thazaang laaktti kan duh hna. Nihin Pual nih Efesa khuami sin ca a kuat hna tikah hin zumtu nunnak abiapi ngaingai mi ca a kuat hna tikah pakhatnak ah taisawm caah biatak kha i sawmh u timi kan hmuh. Taisawm caah biatak timi hi ralkap pakhat caah a biapi ngaingai mi thil pakhat a si. Taisawm hi tawhrolh renghnak ca lawngah an hmanmi a si lo. Ralkap nihcun zeitin an hman tiah cun an taisawm ah zenkuan hna an chiah i tomlet le datmei te hna zong an chiah tawnnak pakhat a si. Cucaah Paul nih taisawm cu biatak a si e a ti. Cu biatak cu Bible chungah kan zoh tikah biatak cu Jesuh a si, biatak cu thlarau a si, biatak cu Pathian bia a si tiin nihin Bible kan zoh tikah kan hmuh khawh mi a si. Cuve bantukin pahnihnak ah ttangphaw caah dinnak a ti. Ralkap pakhat nih an i ven bikmi cu zeidah a si ti ahcun an ttang hi a si. Zeiruang ah dah an ttang an i ven ti ahcun thinlung a umnak a si caah a si. Hi thinlung hi kan thih fawi bik nak hmun pakhat a si caah ttangphaw caah dinnak hi i ven usih a ti. Cucaan dinnak in kan i ven a hau timi kha nihin ah kan hmuh khawh mi a si. Zei ruang ah ti ahcun motor cycle kan i cit tik zongah hin ttangphaw hi a kan serpiak, cu ttangphaw a kan serpiaknak a ruang cu zei ruang ah dah a si ti ahcun thli kik kan chung i a luh khawh lo nak hnga ding caah hi ttangphaw hi a kan serpiak mi a si. Ttangphaw kan i hruk lo a si ahcun ttangfah zawtnak hna kan ngei kho i, kan khuh lai. Hi ttangphaw kan i hruknak thawngin thli kik kha kan chungah a lut lo i ttangfah zawtnak in kan i khamh kho mi a si. Cuve bantukin Paul zong nihhin ral kan doh tikah ttangphaw caah hman dingmi cu dinnak a si e a ti. Dinnak timi hi kan nun ah i fiang ko hna usih. Cu bangin pathumnak ah kedan caah thawngttha chim timhtuahnak kan ngeih ding a si e a ti. Thawngttha hi zeitik caan paoh ah kan chim ko lai nain timhtuahnak he kan chimmi cu hmual a ngei khun ti kha nihin ah kan hmuh khawh mi a si. Dawtmi nu le pa u le nau hna; Paul nih zumtu hna sinah zei a ti; a caan ah siseh a caan lo zongah siseh chim khawh dingin naa tim zungzal lai e tiah Timothy kha ralrinnak a pek. A caan a si zong a si lo zongah timhcia tein na um peng lai e a ti. Thawngtthabia kha minung sinah na chim khawhnak hnga naa tim peng lai e a ti. Kedan caah thawngttha chim timhtuahnak a ti. Cu kedan cu ralkap caah a herh ngaingai mi a si. Cu bantukin zumtu hna kan nunnak zongah kedan hi a herh ngaingai mi pakhat a si caah Pathian bia chim khawh peng ding timhcia tein na um peng lai a ti. Cuve bantukin phaw caah zumhnak a ti. Phaw ahhin phunhnih in a um. Phawlian le phawte in sermi a si. Phawlian nihcun pum dihlak in a huh khawh, phawte nihcun kan ral hna sinin a rami fei, thal hna bantuk khi a rak khamh khawh ti a si, kut in i put khawh a si. Phaw nihhin Pathian nih a kan vennak a langhter tiah Biakamhlun ah Pathian minung hna nih an rak zumh i an rak chimmi a si. Cucaah phaw in i vennak cu zeidah a si, zumhnak a si e a ti. Zumhnak nihcun thil a ti khawh caah Hebrew 11 chung kan zoh tikah Pathian minung hna zumhnak an rak ngeih caah an thil ti khawhnak kha tampi nang le kei nih kan hmuh khawhmi a si. Cucaah na kaa in nan zumh ahcun nan tuah mi thil kha na tuah khawh ve lai a ti. Cun kan Bawipa Jesuh Khrih nih anttam ci tiate zumhnak nan ngeih ahcun a kan ti fawn. Cucaah dawtmi u le nau hna, nihin Satan ral kan dohnak ahhin zumhnak timi hi a biapi ngaingai mi a si. Cu Satan ral in kan i khamh khawhnak ding caah kan zumhnak a purnak hnga lo dingah phaw caah zumhnak hi nan i hruk ding a si e tiah Paul nih nang le kei nihin ah thazaang a kan pekmi a si. Cuve bantukin luchin caah khamhnak a ti; khamh kan i ruahchan mi hi zeicahdah a si, luchin kan i chinh khawh ding kha a si. Khamh kan i ruahchannak cu luchin ah kan i chinh awk a si a ti. Ralkap nih luchin nih luchin an i chinh hnawh channak cu nilin le ruahsur kham tu ding caah a si. Cu nak hmanh in a biapi deuh mi cu fei le thal nih lu an khennak hnga lo khamhtu ding caah a si. Hi lukhuh hi lukhuh sawhsawh a si lo i, va tluk va rilh sual le fei le nam hriamnam, hriamhma zong a veng khotu a si. A bikin lu cu thluak umnak a si caah thluak vengtu a si. Motor cycle ca zongah luchin an tuah i va tlak sual hmanh ah lu kha fakpi in i khawng hlah seh tinak caah motor cycle lukhu zong hi sermi a si. Fak deuh in kan lu kan i khawn sual ahcun lu khawn hi thih a fawituk timi kha kan theih ciami a si. Thluak chungah thi a lut sual tawn i siibawi te nih an chanh khawh lomi tampi nihin ah kan hmuh khawh. Kan thluak hi thil a tuaktantu ngaingai, lunghrin a hmangmi zong a si caah ven hrimhrim a hau ti kha nihin ah kan hmuh khawhmi a si. Cuve bantukin khamhnak timi kan co khawhnak hnga dingah luchin caah hin khamhnak a si e a ti. Luchin caah khamhnak hi nan i hruk ding a si a ti. Pathian fa kan si ti kan i hngalh mi nihin sualnak chungin tampi kan i ven lai timi hi kan hmuh khawhmi a si. Cun vainam caah Pathian bia a ti. Cucu Khrihfa hna nih nifa kan nunnak ah a biapi ngaingai mi ralthuam pakhat a si. Vainam caah Pathian bia a ti tikah hi Pathian bia hi kan ralpa Satan kan tei khawhnak hriamnam pakhat a si. Pathian bia lawnglawng hi kan nunnak caah kan rawl thaw bik le kan nunnak ah a biapi ngaingai mi a si caah hi vainam caah Pathian bia hi nan i ken ding a si a ti. Cucu Satan ral kan dohnak ah a biapi tukmi kan Bawipa Jesuh Khrih ramcar i ni 40 chung rawl a ulh lioah Satan tukforhnak a teinak cu hi Pathian bia hi a si. Cucaah hi ralthuam tling hi nang le kei i hruk khawh usihlaw nifa kan nunnak ah hman khawh i zuam ko usih. Nifa kan nunnak ah taisawm caah biatak, ttangphaw caah dinnak, kedan caah thawngtthabia chim timhtuahnak, phaw caah zumhnak le luchin caah khamhnak le vainam caah Pathian bia hi kan nunnak ah i ken peng usih. Cutin a si ahcun kan ralpa Satan a kan dotu kha tei khawhnak thazaang kan ngei lai ti kha hrawmh kan duh hna.