Kannih Cu Pathian Chungkhar Kan Si

Nihin cu Mithiang Simon le Jude hna puai ni a si caah hi Mithiang hna min a ngeitu nan dihlak in Happy Feast Day tiah nan kut kan tlaih hna. Bawipa Pathian nih nan nunnak ah lam in hruai ko hna seh. Nihin kan rel hnga dingmi kan Bible Cathiang hna; Efesa 2:19-22, Salm 18:2-5, Luke 6:12-16 chungin a si. Hi kan Bible Cathiang hna chungin zeidah kan hmuh khawh ti ahcun; Kannih cu Pathian chungkhar kan sinak, Pathian chungkhar ah aa telmi kan si timi kha kan hmuh khawh mi a si. Chungkhar pakhat ah hruaitu uktu kha bochan zungzal a si bantukin nihin Khrihfa kan sinak ah Pathian kha a kan hruaitu, kan hmai i a kan dirkamhtu, kan hmai in kan zeizong vialte a kan tuahpiaktu, thlarau lei in tthawnnak rawl a kan petu kan i bochan mi si dingin kannih hna zong nih kan cohlan ding kha a si. Mithiang Simon le Jude hna hi mi tampi nihcun Khrihfa kan si ko nain an konglam a theimi kan tlawm kho. Annih hi hodah an si tiah kan Laitlang Khrihfa hna hi i hal hna usihlaw a thei lomi tampi kan um lai. Simon cu a theimi an um men ko lai, nain Jude hi tah, James fapa Judas tiah kan Bible Cathiang chungah cun a ti. A cheu nih Judas Iskariot he khan an palh tawn i a thei lomi hi kan tam deuh tawn. Cucaah nihin puai kan tuahmi Mithiang Jude hi thil kan thlau tikah vawlei thilri lawng si loin thlarau lei thil tlaunak lei zongah bochan mi Mithiang tiah Bupi nih a timi a si. Cucaah nihin i kannih Khrih Pathian chungkhar kan sinak ah kan tling cikcek maw, a caan caan ah a tlaumi kan um tawn. Cun a pial sualmi zong kan um tawn. Vawlei mithmuh in chungkhar kan dirhnak te zong i zoh usih. Aho hmanh hi an tling cikcek e tihi kan um lo. Cut ikan chamhbau ko bute cun chungkhar hi kan dirh cio i khua kan sa cio hna. Pathian dirhmi Bupi chung zongah vawlei kan nun lio ahhin thlarau lei in a tling dih cikcek e timi hi kawl usihlaw kan hmu kho lai lo tiah ka zumh. Zeicahtiah Catholic Bupi chung zongah palhnak tampi he thazaang dernak tampi he khan atu hi Pathian rian a ttuan cuahmah liomi kan si ve. A herhmi cu zeidah a si; Pathian kha i bochan ding le Pathian chungkhar chung i kan umnak ahhin tlau lo ding te kha a herh taktak mi cu a si. Chungkhar pakhat ah fanu fapa sinak in cohlan kan si tikah harsatnak kan ton tik zongah chungkhar mi hna chungin bawmhnak a ra zungzal mi a si. Pakhatnak bik ah nu le pa aiawh in a ummi hna nih kan har caan ah pakhatnak bik khua an kan ruahpiak tawn bantukin Bupi chung zongah Khrihfa kan sinak zongah thlarau leiin thazaang dernak he lam kan pial sual tikah caan ttha caan sunglawi a kan pe i a kan ngang zungzal i ai thleng kai lai ee tiah caan a kan petu hi Pathian a si timi kha philh hlah usih. Nu le pa nih an kan dawt bantukin Pathian dawtnak chinchin cu zungzal nunnak kan conak hnga ding caah caan ttha caan sunglawi tampi a kan petu a si i a lung a sau chinchin. Mah zawnte ahkhan a lung a sau pet ko ee tiin daithlan lo kan herh. Paul nih zeitindah a ti; Efesa 2:20 ah; Nannih zong Lamkaltu hna le Profet hna nih a hram an rak bunh mi cung i sakmi inn nan si ve i a killung cu Khrih Jesuh kha a si tiah a ti. Lamkaltu le Profet hna nihcun zeibantukin dah Bupi hi an rak sak, zei min in dah an rak sak. Jesuh Khrih min in sak a si i Jesuh Khrih in Pathian fanu fapa kan si khawhnak hnga ding caah hi Bupi chungah thawngttha a rak phuan i cohlan mi kan si. Pathian fanu fapa kan sinak, Jesuh zultu hna i cawnpiaknak kha kannih hna zong nih zumhnak he kan zulh ve hrimhrim a herh. Nihin kan relmi kan Bible Cathiang hna zong Lamkaltu hna nih an rak phuanmi tehte chungin Jesuh Khrih an rak phuannak hna kha nihin i kan relmi Cathiang hna kan cohlan mi cu a si. Cucaah kannih hna nih Peter le zultu hna kha an chimmi zei a hau lo e tiah ti hna hlah usih. Zeicaah; Jesuh Khrih in thlennak a hmu i Jesuh Khrih hrimhrim nih a rak thimmi hna an si. Cun Jesuh Khrih caah tehte khaan in an nunnak aa pemi an rak si caah anmah an tuahsernak, an chimphuannak, an chimrelnak hi Pathian thlarau Jesuh Khrih thlarau in a rami a si timi kha kan theih ding a si. Cucaah Lamkaltu hna cawnpiaknak zong hi hlaw hlah usih. Nicaen Greed kan timi Lamkaltu hna cawnpiaknak zong hi hlaw hlah usih. Lamkaltu hna he pehzulh in rak cawnpiakmi nihin n ii Zarhpini i ka zumh tiah kan timi cawnpiaknak hna zong kha ttha tein zum hna usih, a sawhsawh a si lo. Thawngtthabia chungah; Kan Bawipa Jesuh Khrih nih zultu hleihnih thim a timh hna tikah zan khuadei thla a cam e. Bawipa nih a hnuzul hna thim dingin amah he rianttuan tti dingin a timh tikah thla a cam. Pa Pathian he pehtlaihnak a ngei hmasa. Khrihfa nang le kei Bawipa rian kan ttuannak ah thlarau khamhnak dingah rian kan ttuannak ah thla kan cam maw, Jesuh Khrih hnu kan zulhnak Khrihfa kan sinak ah thla kan cam maw, thla kan cam lo a si ahcun kan palh lai. Pathian he i pehtlaih ding a si, thla kan cam ding a herh timi kha Jesuh Khrih hrimhrim nih a kan hmuhsak mi a si. Cucaah thlacam timi le Khrihfa nun timi hi tthen khawh a si lo. Zeicahtiah amah a kan ngeitu he kan i pehtlaih lo a si ahcun a chungkhar sinak in kan tlau sual lai. Cucaah Pathian sin thlacam ding hi daithlang hlah usih. Cun Jesuh Khrih nih zultu hleihnih a rak thim hna lio zongah ca thiamthiam le catang sangsang hna kha a rak thim hna lo, nang le kei bantuk zei santlai lo te hi a rak thim ve i, zultu hna a rak cawnpiak hna i amah nih a thlarau in a thlen hna hi mission rian ah a rak thlah bantukin kannih hna zong kan cathiam lonak, kan hruhnak cung ahkhan lungdernak ngei loin ka thiam lo e, ka thei lo e ti loin a kan auhnak cungah zumhnak he Jesuh Khrih hnu kan zulh ve ding kha a herh taktak mi cu a si. Paul nih; keimah nihcun ka tuh e, Apolo cu ti toihtu a si, Sihmanhsehlaw a tthantertu cu Pathian a si a ti bantukin kannih nih Jesuh Khrih thawngttha, khamhnak thawngttha kan phuannak ah thlennak le thlua a chuahtu cu Pathian a si ti kha kan zumh ding a si. Cucaah Bawipa cu ka lungtum, ka ralhruang le a ka khamhtu a si tiah Salam cattialtu nih a ti bantukin lungpi cu thli zeitluk hmanh in hrang sehlaw fektthup tein a um bantuk tein kannih hna zong thlarau lei rianttuannak ahhin tukforhnak tampi lakah Bawipa cung i hrambunh in sakmi kan si ahcun thlichia, thli ttha lo, pawngkam tukforhnak nih a kan tei kho lai lo. Cu hna nih an kan tei khawh lonak dingah Jesuh Khrih nih thlacam u tiah amah nih a kan hmuhsak mi lam kha philh loin Pathian he pehtlaihnak kan ngeih a herh. Jesuh Khrih zultu Mithiang mi hna bantukin kan nunnak ah Bawipa cungah zumhnak fekte he amah kha tehte a khang khotu kan si khawh cionak hnga ding caah Bawipa nih thlua kan chuah ko seh.