Kan Pial Sual lo Ding a Herh

September 30 cu kan nu Bupi nih Mithiang Jerome puai ni a kan tuahter. Nihin ah Mithiang Jerome min a pumi Khrihfa nan dihlak Happy Feast Day tiah nan kut kan tlaih hna. Bawipa nih thluachuah in pe ko hna seh. Nihin ni caah kan rel hnga dingmi kan Bible Cathiang hna; Job 9:1-13,14-16; Lk 9:57-62 chung a si. 

Nihin Mithiang Jerome puai ni ah kan relmi Cathiang nih zumhnak kong, nawlngaihnak, tangdornak, Pathian caah i pek tikah lungthin tak tein i pek i a hnu zulh ding timi kong a si. Cucaah voikhat Bible kan relmi Job Bible kan zoh tikah Bawipa Pathian sinah hmunkip kaakip ah a vak va vai i a rak phan ve mi Satan nih Pathian mi a simi Job tukforh ding caah bia a chimnak kan hmuh. Bawipa nih ka salpa, zumhtlak a simi ka salpa Job hi zoh law tiah a thangṭhat tikah Satan nihcun Bawipa, amah hi zeizongte na pek dih caah, harnak na pek lo caah, ngaihchiatnak na pek lo caah, fahnak na pek lo caah atu tiang nangmah cungah zumhtlak in na sinah, na hmai ah zumhnak an ngeihnak a si tiin bia a phunphun in a ṭawnṭok. 

Hmunkip ah vakvai in Pathian hmaika ah a rak phan mi Satan nih chikkhatte kaa din lai a ngei lo, direct bak in Bawipa sinin bia a theih bak in tukforhnak bia a chim. Cucaah kannih zong kan nunnak ah kan i ralrin tuk awk a si. Satan tukforh tu hi zeitik hmanh ah dai tein a um lo. Pathian bia hmanh kha Pathian hmaika ah direct in tukforh dingin a lettu a si. Cucaah nifatin kan nunnak ah Khrihfa, Pathian fanu fapa kan sinak ah kan i ralrin ding a herh. Job zong hi Satan nih a tukforh nain a nunnak cu laa hlah.

Sihmanhsehlaw hneksak tuah tiah Pathian nih nawl a pek tikah fahnak phunhunn Job cungah a phan, fanu fapa an thi an lo, minung sinak in chungkhar ah thih loh nak ton tikah zeitlukin dah lung a kuai, cu lakah Job cu a ngeihchiah chawva vialte an lo dih, an rawk dih, cu liote ahkhan nihin Bible chungah zeitin a ti; Bawipa nih zeizong vialte cungah nawl a ngeih caah keimah nihcun zeiruang ah dah hi thil cannak kong ruang ahhin biahalnak ka tuah lai e, nawlngeitu cu Pathian a si, tiah Pathian cungah zumhnak a ngeihnak, amah le amah tangdor tein a um thiamnak kha kan relmi a si.

Thawngṭhabia chungah aho hmanh leikuang chungah thuantum kha tlaih in hmailei zoh loin hnulei a zoh mi an um lo e, cuti a kal a si ahcun lei a thuan tikah a saṭil an pial sual lai maw, seh mawngtu a si ahcun a seh lu a pial sual lai maw, cucaah hmailei kal tikah zumhnak pakhat in kan kal tikah Khrihfa kan si tikah hnulei zoh ding a si lo, kan hmai i a ummi Jesuh Khrih kha zoh in kan kal a herh. Hnulei kan i mer, chawva lei kan i mer, minthannak lei kan i mer, kanmah duhnak lei kan i mer a si ahcun fahnak kan tong sual lai, kan tlu sual lai, cucaah kan hmai ah a ummi hi zeidah a si, Jesuh Khrih lawng kha zoh in kan kal hrimhrim a herh. 

Cucaah nihin i Mithiang Jerome bantukin Bible Cathiang a lettu; anih hi a nunnak vialte Pathian lawng kha zoh in Jesuh Khrih hmai zoh in a kal tikah nihin ni ah mi tampi caah thlarau leiin cawnpiaktu lam a kan hmuhsaktu a si. 

Nihin ni ah Bible thiang kan rel khawhnak hi Mithiang Jerome thawngin a si tiah ti khawh a si, cucaah Khrihfa kan sinak ah tukforhtu nihcun chun he zan he din loin kan pawngkam ah a um zungzal ko lai, cucaah Jesuh Khrih kha philh hlah usih, amah zoh in hmai nawr ding kha philh hlah usih, pawngkam kan i her sual a si ahcun kan pial sual lai caah Bawipa bochannak he zumhnak lungthin te he hmailei kal i zuam cio hna usih, Pathian sin zongin thluachuah hal peng hna usih. A ngaitu nan dihlak cungah Pathian nih thluachuah in pe ko hna seh.

Thazaang petu /- Fr. Fidelis Maung Sein