Kan Herh taktak mi cu Jesuh a si

Bible relding mi hna: Pht. 11:9-10, 12:1-8 / Ps. 90:3-6, 12,14-17 / Lk. 9:43-45

Nihin RVA in Pathian bia thazaang a latu unau nan dihlak cungah Bawipa nih thluachuah in pe cio ko hna seh. 

Nihin voikhatnak kan relmi chungah: “Pathian ṭhawnnak kha an hmuh tikah mi vialte cu an khuaruah a har dih. Jesuh nih a tuahmi thil kongah mi hna cu khuaruahhar in an um ko lioah khan a zultu hna cu a thawh hna i, “Kan chimh dingmi hna hi philh hlah uh; Mi Fapa hi minung ṭhawnnak ah chanh a si lai,” tiah a ti. Sihmanhsehlaw cucu a sullam zeidah a si ti kha an hngal lo. An hngalhnak hnga lo thuh kanh an si i, cu kong hal cu amah kha an ngamh fawn lo”. Bawipa thawngṭhabia a si. 

Duhtlinnak cu kan duhmi ngeihnak ah a um lo. Khrih nun ngeihnak ah a um timi in thazaang la hna usih. Nihin voikhatnak kan relmi phungchimtu le salm kan relmi hna nih a langhtermi cu Pathian rianṭuannak cu minung nih hngalh khawh a si lo i, zeizong vialte hi pakpalawng lawngte an si dih; timi kha a chim. Amah telpi lomi cu zeizong vialte hi pakpalawng lawngte a si dih, a ti. (Pht. 2:3-26) chungah, “Na fimnak vialte le na thiamnak vialte kha hmangin thil pakhat na tuah lai i cucu zeihmanh a tuah lomi pa caah na kaltak ko lai, rethei le zaangba in mi toi ah na tuahmi vialte zeidah na ngeih. Na tuahmi thil paohpaoh nih hin lungfahnak le lungretheihnak lawng a chuahpi a ti. Slam chung zongah minung kan chan cu a thawituk e, a ti. Kum 70-80 te chung lawng, cu chung hmanhah lungretheihnak le harnak lawng  kha kan in a ti. 

Vawilei nih a chuahpimi cu lungretheihnak le lungfahnak lawng a si. Bawipa telpi lomi a si ahcun nihin na ngeihmi chaw le vaa vialte siseh, na dawt bikmi na fanu le na fapa hna zong hi nikhatkhat ah lungkuainak le mitthli luannak ah a cang khomi a si. Solomon nih hitin a chim, “duhtlinnak timi hi ka kawl tuah lai, a ti. Zuu dinnak ah nuamhnak tling a um a ti i mitsur dum a ser i zu a ding i a zu dinnak nih nuamhnak tling a pe kho lo. Zuu nih nuamhnak tling a pe kho lo timi kha aa fiang. Atu cu nu le vaa sinak ah nuamhnak tling, lawmhnak tling a um a ti i nupi (1000) a lak hna. Nu le va sinak nih lawmhnak tling, nuamhnak tling a pe kho lo timi kha aa fiang. Atu cu chaw le va in siseh a ti i, chaw le va tampi a ngei. Chaw le va nih lawmhnak, nuamhnak a pe kho lo. Hi vialte hi Bawipa dah ti lo ahcun thlitu dawi bantuk a si e, tiah a ti. Vawlei thil ah nuamhnak tling, lawmhnak tling a um lo zia kha a fiang. Duhtlinnak cu kan duhmi ngeihnak ah a um lo. Khrih nun ngeihnak ah a um. (Heb. 7:26) ah kan hmuh. 

“Mi Fapa cu mi kutchung ah chanh ka si lai i nithum hnuah ka thoṭhan lai, a ti. Kan Bawipa Jesuh vawlei a ratnak chan cu mizaw lawngte damter si loin mi vialte khamhnak tuahpiak awkah a ra, mi vialte duhtlinnak pek awkah a ra. Vawlei nih a pek khomi cu lungfahnak le lungretheihnak lawng a si. Lawmhnak tling le nuamhnak tling cu kan Bawipa Jesuh lawnglawng nih a pek khomi a si. 

(Is. 55:1-3), “Ti a halmi paoh ra tuah uh, hika ah hin ti a um. Tangka zeihmanh a ngei lomi hna ra tuah uh, rawl kha ei tuah uh, aman zeihmanh pek a hau lai lo. Rawl a si ṭung lomi ah nan phaisa cu nan hloh dih, rawlṭam tihal in nan um ṭhiamṭhiam ko. Ka bia ngai u law rawl vialte lakah a thawbik nan ei lai. Ka sinah ra u law nunnak nan hmu lai” a ti. Bawipa cu misifak a dawtu le zawnruattu a si. 

(Jn. 4:13-14) chungah Jesuh nih hitin a ti, “hi ti a dingmi paoh cu a ti a hal ṭhan lai, sihmanhsehlaw keimah ka pekmi ti a dingmi paoh cu zeitik hmanh ah an ti a hal ṭhan ti lai lo, a ti. Jesuh nih a pekmi ti a dingmi paoh nih nuamhnak tling, lawmhnak tling an hmuh lai. Duhtlinnak cu kan duhmi ngeihnak ah a um lo. Khrih nun ngeihnak ah a um. A ngaitu nan dihlak cungah Bawipa nih thluachuah in pe ko hna seh.

Thazaang petu /- Saya Francis Khua Pheng