Pope Leo XIV cu France ah Lamkaltu khual tlawn ding in aa thawh cang
Pope Leo XIV cu Lamkatu khual tlawn ding ah Rome in Paris zuan ding ah vanlong in aa thawh cang i France ram ah nili a rau lai tiah Vatican nih thawng a thanh. Rome’s Fiumicino aiport ah nihin (Cawn ni nga ni) Vatican thawngzamhtu hna le Pope a zulkhattu hna Pope i vanlong ah a kai cang tiah theih asi. ITA Airways A321 cu Rome caan 7:58 AM ah a zuang i Paris Orly Airport ah 10:00 AM ah a ṭum lai tiah theih a si. Atu lio, France a tlawnnak ah Pope nih (motto) ah aa thimmi cu “Vawlei nih nunnak a ngeih khawh nakhnga” ti asi. Vatican i ramdang pehtlaihnak ah Secretary of State asi mi Cardinal Pietro Parolin nih hi motto he pehtlai in a chimmi cu, hi motto nih hin minung nunnak man ngeihnak kha a dirpi. Minung nunnak ti tikah, nu paw chung i nau aa sem le cangka in Pathian nih a nunnak a lak tiang, minung pakhat i covo limhang kha upat, dawt le zohkhenhnak he cohlan,” hi asi a ti.
Pope nih France tlawnnak aa thawh hlan ah, Vatican News nih Cardinal Parolin sin ah biahalnak an tuah lio ah a chimmi cu, hi motto nih hin France ram ah thlarau nunnak a biapitnak kong langhter aa tim, aruang cu France mino tampi hna cu kum fatin Tipil innak Sacrament hmuh awk ah timhtuahnak le Pathian bia cawnnak an ngei tiah a ti. Pope Leo cu France ah ni li chung a caam lai i Paris ah aa ṭhum hmasa lai i, ram uk nawlngeitu hna he i tonnak a ngeih dih hnu ah, UN nunphung le fimcawnnak zungpi asi mi UNESCO innpi zong a va leng lai tiah kan theih. Cupin ah, France ram ummi tlangbawi (siangbawi) hna le mino hna he thlacamṭina, Catholic Bupi nih a hruaimi bawmhnak phu nih an bawmhmi hna sinah thazaang peknak, Tipil innak le Thiang Thlarau tha pekhnak hmuh awkah timhtuahnak a ngeimi hna sin ah thazaang peknak le Missa raithawinak hna a tuah lai.
Pope cu ra laimi Zarte ni ah Lourdes ah a kal lai i, St. Bernadette Soubirous sinah langhnak a hmuhsaktu Bawinu Mary i lungkua (Grotto of the Apparitions) ah thlacam lai. Cu hnu ah France thlanglei khua pakhat ah a kal lai i, cu pawngkam ummi khua le pengkulh Bishop pawl he i tonnak, Missa raithawiṭinak, mizaw zeimawzat va lennak le Rosary thlacamṭinak a ngei lai. A donghnak ni ( Cawinnikhat ni) ahcun cu France nichuah chaklei Metz khuapi ah caan a hmang lai i cu ni chunhnu lei Rome i a kir hlan deuh ah, biaknak dang (interreligious encounter) hruaitu hna he i tonnak, European Union hramthawhnak kong chimnak le Missa raithawinak a ngei lai.