Ahodah na Kawl?

2026 September 25, nihin ni hna zongah RVA program hmang in thawngṭha hrawmṭinak caanṭha a kan petu kan biak kan Pathian a min ka thangṭhat. Nihin ni ah thawngṭha rel dingin Khrihfa Bupi nih a kan timhpiak mi Sirac 3:1-11, Lk 9:18-22 tiang a si. 

Lk thawngṭha chungah; “Voikhat cu Jesuh kha amah lawng tein thla a cam lioah a zultu hna kha a sinah an ra i, mi nih a ho a si an ka ti dah tiah a hal hna. A cheu nih tipil petu Johan a si an in ti, cun a dang nih Elijah a si an in ti, cun a dang nih hlanlio i a rak ummi Profet pakhatkhat kha a nungṭhan an in ti tiah an ti. Cun annih cu a thawh hna i; nannih nih tah a ho a si nan ka ti dah a hal hna. Peter nih a vun leh i; Nangmah cu Pathian, Messiah na si tiah a ti. Cun Jesuh nih; Ka kong cu aho hmanh nan chim hna lai lo tiah fek tein a ti hna i, mi Fapa nihhin temhinnak tampi ka in hrimhrim lai, upa hna le tlangbawi upa hna le phungbia cawnpiaktu Saya hna nih an ka rawi lai, an ka thah lai i, nithumnak ni ah thawhter kan si ṭhan lai tiah a chimh hna.”

Kan Bawipa Jesuh Khrih hi mi tampi nih an zulh i, mi 50000 tiang kha rawldanghnak a tuah. Sihmanhsehlaw Pathian Fapa Messiah taktak a si kha aho hmanh nih an thei lo, cu caah cun mi nih a ho a si an ka ti dah tiah a lamkaltu kha bia a hal hna. Jesuh Khrih cu mi tampi nih an zulh nain an hngal lo, Lamkaltu hna zong nih aho ngaingai a si kha fiang hlang tein an hngal taktak lo. Sihmanhsehlaw Vancung i Thiangthlarau fimchimhnak thawngin Peter nih nang cu Pathian, Messiah na si tiah fianghlang tein a chim. Cuticun Jesuh Khrih nih amah hrimhrim aho a si kha fianghlang tein lamkaltu kha a chimh hna. Kei cu tlangbawi upa hna nih an ka hlawt lai, an ka tlaih lai i an ka thah lai i nithumnak ni ah thawhter ka si lai ti kha fianghlang tein lamkaltu kha a chimh hna. 

Nihin kan relmi Bible pakhatnak ah Sirac 3:1-11; Fale nih hringtu pa le ṭihzah upat ding hi Pathian tinhpiak mi a si. Fale uknak nawl cu Pathian nih hringtu nu le pa kha a pek hna. Pale a ṭihzah a upat tu fale cu an sualnak liamnak can ah Pathian nih a cohlanpiak hna. Nule a upat tu cu chawhlawn tampi aa khonmi a si. Pale a upat tu cu fa an ngeih tikah fale i ṭihzah upatnak kha a co ve lai i a fale thawngin lunglawmhnak a hmu lai. 

Thla a cam tikah Pathian nih a ngaihpiak lai i a chan a sau lai, nule ṭihzah upat cu Pathian nawl a ngaih ti a si ko, nu le pa nawl ngeihnak tangah aa dormi fale nih Pathian an ṭihzah bantukin nu le pa cu an ṭihzah an upat hna, na pa cu na biachim na holhrel le na tuahsernak in upat law a thluachuah cu na co lai, hringtu pale i thluachuah cu fale caah himnak a si, sihmanhsehlaw hringtu nule i chiatserhnak cu rawhralnak a si, na pa nih ningzahnak a ton tikah i lawm hlah, na caah hmaihngalnak a si lo, thangṭhat upat tlak lo nule nih a fale kha ningzahnak a phakter hna tiah nihin kan relmi pakhatnak Bible ah kan hmuh khawh. Cu a si ahcun Khrih ah dawtmi u le nau, nu le pa hna, Jesuh Khrih hi khamhtu pa si dingin kanmah nih kan thim lo i Pathian nih a dawṭuk mi a Fapa kha a rak thlah i cucu kanmah khamhtu a si. Hringtu nu le pa hna hi fale nih kan thimmi hna an si lo i Pathian amah nawl ngeihnak in aa tlak, aa zaa tiah a timi kha fale kan caah nu le pa dirhmun ah a kan thimpiak mi an si. 

Cucaah cun duhdawt mi u le nau nu le pa hna, kan biak kan Pathian kamah khamhtu pa Messiah cu amah sining tein fianghlang tein kan sinah aa phuan ko caah amah cu zumh bu, i bochan bu tein a hnu kan zulh bantukin vawlei minung kan cannak hnga ding caah nu le pa cu Pathian nih a kan thimpiak mi an si i nu le pa an dirhmun cu kanmah nih kan thimmi hna siloin Pathian nih a thimmi hna an si bantukin fale nih kan ṭihzah kan upat hna awk a si i Bible voikhatnak kan rel bantukin nu le pa ṭihzah upat cu fale caah zeitluk in dah thluachuah a si kha fiang tein a kan chimh i cucaah cun Khrih a zummi kannih hna caah cun nu le pa hna hi vawlei cung i mithmuh khuazing an si bantukin an nawl ngaih i an tang ah i dor kha kan i zuam hna ding a si. Cucu Pathian thinlung a tongmi, Pathian thinlung a khengmi Pathian tinhpiak mi Pathian lunglawmhter cu a si. Thawngṭha a rak ngaitu nan dihlak cungah Pathian nih thluachuah in pe ko hna seh!     

Thazaang petu /- Saya Canute Bawi Kam