Mipeem le ralzaam ngakchia hna zohkhenh kilven awk ah Pope nih forhfialnak le nawlnak a tuah
Mipeem le ralzaam Ni (World Day of Migrants and Refugees) a phanh hlante ah Pope Leo nih mipeem hna le ralzaam ngachia hna kha kilven zohkhenh awk ah ṭuanvo lak cio dingin nawlnak a tuah. Vawlei cung huap in a voi112 nak Mipeem le ralzam ni (World Migrants and Refugees Day) cu September thla a hmanungbik Zarh (27) ah tuah asi lai i cu ni caah Pope nih aa thimmi tlangtar / theme cu “Hi ngakchia hna lak ah pakhat hmanh/ Even just one of these children,” ti asi tiah Vatican nih thawngthanhnak a tuah. Mithiang Peter biakinnpi tual ah General Audience a ton hna lio ah Pope nih a chimmi cu, inn le lo chuahtak in kum tlinglo ngakchia hna he a kenkip ah a peemmi hna le ralzaam mi hna hi ka lung ah an um ngai hna. Ngakchia hna kumtlinglo mino hna caah harnak nganpi an tong i, sifah harnak a phunphun, hremnak le namneh hlennak, lungretheihnak, thahnawnnak tiang hmanh lampi ah an tong tiah a ti.
Hi bantuk in mipeem le ralzaam hna kan sin ah an phanh tik ah ahohmanh nih hnu chit loin ṭuanvo laak in bawmhchanh kilven cio awk ah nawlnak a tuah. Kan hnu thla (August) ah Pope nih Vawleicung Ni (World Day) caah biacahnak ca a rak kuatmi ah, mipeem mi le ralzaam mi hna lak ah ngakchia le kumtlinglo mino hna cu zohkhenh awk a herhbikmi le a derthawmmi (the most vulnerable people) an si tiah a rak chim cang. A ruang cu ngakchia le mino ting tampi cu “raltuknak, sifah harnak, thahnawnnak, pawngkam rawhralnak ruangah a chuakmi harnak le a dangdang ṭihphannak ruangah an ram a chuah taaktu an karh chin lengmang mi hi ngaihchia ngai asi tiah a ti. Hi bantukin harnak le ngaihchiatnak kan ton lio caan ah Bawipa Jesuh nih, “Ka min in hi ngakchia pakhat khat a cohlangmi poah nih keimah nan ka cohlan asi,” ti mi bia hi a kan zuamcawhtu asi tiah a ti. UNHCR’s Global Trends nih 2026 June thla ah a chuahmi cazin ning ah cun kan hnu kum (2025) tiang ah vawleicung pumpi ah minung 117.8 million cu hremnak, buainak, thahnawnnak, minung covo buarnak le khua tithlen ruang i a chuakmi harnak ruangah le konglam a phunphun ruang ah mipeem le ralzaam dir hmun ah an um tiah theih asi. Cu mipeem le ralzam minung 117.8 million lakah kum 18 tang ngakchia 45 million an i tel i 39% cu ngakchia an si caah ramkip huhphenhnak a herhmi an si tiah UNHCR a ti.