JESUH BIATHUK KONGAH AA LOMI
Khrih a nunnak dihlak bia a chimmi thil a tuahmi, dai tein a umnak le a temhinnak, a sining vialte hi Pa a phuannak lawngte an si dih. Jesuh nih, “Keimah a ka hmumi paoh nih ka Pa kha a hmuh,” tiah a ti khawh i, Pa nih, “Mah hi ka Fapa, ka thimmi a si, a bia kha ngai u,” a ti ve. (Jn. 14:9, Lk. 9:35, Mt. 17:5, Mk. 9:7). Ka bawipa cu Pa duhnak tuah awkah a rat caah a hmebikmi biathuk hna hmanh nih “Pathian dawtnak” kanmah lakah a um kha a langhter.
Khrih a nunnak dihlak hi khamhnak biathuk a si. Khamhnak cu vailam thisen thawngin kanmah sinah a rung phan. (Eph. 1:7, Col. 1:13-14, IPet. 1:18-19). Sihmanhsehlaw mah khamhnak biathuk hi Jesuh a nunnak dihlak ah khan rian a ṭuan ko.
-Minung a rak cannak le misifak a rak sinak khan kannih kha a sifahnak in a kan rumter. (IICor. 8:9)
-A thlithup nunnak in nawl a ngaihnak nih kannih bia ngaih lonak kha a kan liam piak. (Lk.2:51)
-A bia nih a theimi hna kha a thianter hna. (Jn. 15:3)
-Mizaw a damhnak hna le khuachia a ṭhawlnak hna ah kan tiatlonak kha a lak i kan zawtnak kha a phawrh. (Mt. 8:17, Is. 53:4)
-A thawhṭhannak in kannih kha a kan dinter. (Rom. 4:5). Khrih a nunnak dihlak nih kan tuanbia kha a chim. Jesuh nih a tuahmi, a chimmi le a mi vialte nih sualnak ah a tlami minung kha hmasa auhnak hmuhter ṭhan awkah aa tim.
Jesuh a biathuk ah kannih kan i telnak
Khrih a rumnak vialte cu minung pakhat cio ca le mi vialte caah a si dih. Khrih cu amah caah a nung lo, kanmah caah a nung; minung a cannak cu kanmah minung le kan khamhnak caah a si. A thih cu kan sualnak caah a si a thawhṭhannak cu kan thiamconak caah a si. (ICor. 15:3, Rom. 4:25). Amah cu Pathian hmai ah a kan bawmtu a si. Kan caah zungzal in a kan nawl piaktu a si. (IJn. 2:1, Heb. 7:25). Amah cu Pathian hmaika ah kanmah can ah a um i zungzal in a kan in paikmi le a kan temh piakmi vialte kha Pathian sinah a pek zungzal. (Heb. 9:24).
A nunnak vialte hi kan i zohchunh awk a si dih. Amah cu “a tlingmi” a si. Kannih kha a zultu si awk le amah kha zulh awkah a kana uh. (Rom. 15:5, Phil. 2:5). Amah le amah aa niamternak in toidornak ziaza kha a kan hmuhsak. A thlacamnak in thlacam awkah a kan hruai i a sifahnak in kan nun chungah kan ton hngami sifah retheihnak vialte hremnak hna kha lungtho tein cohlan awkah a kana uh. (Jn. 13:15, Lk. 11:1, Mt. 5:11-12).
Khrih nih amah chungah a kan nunter kho i amah cu kanmah chungah a nung kho. Minung a cannak in Pathian Fapa nih phun dang tein mikip he aa kawm; Kannih cu amah he pumkhat si awkah auh kan si. Zeicahtiah kan ca i a rak nunnak vialte nih amah pum i cheu bang bantukin a kan hrawmter khawh.