Vancung Pennak Thawngṭha

Nihin caan zongah a biathiang in thazaang i lak ṭi dingah caanṭha caan sunglawi a kan serpiaktu kan Pathian amin thiang ka thangṭhat. RVA a ngaitu zumtu nan dihlak cungah Bawipa nih a thar in thluachuahnak in pe ko hna seh. 

Nihin caan ah kan Bupi nih rel dingah a kan timhpiakmi (Lk. 9:1-6) chung kha a si i, cu chungah a tlangtar in chim ka duhmi cu “Vancung Pennak thawngṭha” timi kha a si lai. Hika chungah zeidah kan hmuh tiah cun; Kan Bawipa Jesuh Khrih nih lamkaltu (12) hna kha hmuhkhatte ah a auh hna i khuachia ṭhawl khawhnak le zawtnak damter khawhnak le nawlngeihnak kha a pek hna. Cu hnuah a thlah hna i mizaw damternak, Pathian Pennak thawngṭha chim dingah khuazakip ah an kal; ti kha hika zawnte ah kan hmuhmi a si. Kan Bawipa Jesuh nih Lamkaltu hna a thlah hna tikah khin mahtin va thlah sawhsawh khi a si lo. 

A pakhatnak ah a tuahmi cu zeidah a si tiah cun, khuachia ṭhawl khawhnak a pek hna. Cun a pahnihnak ah zawtnak damter khawhnak a pek hna. Cun a pathumnak ah nawlngeihnak (aana) a pek hna. Hika zawnte ah thazaang i lak ṭi dingah chim ka duhmi cu, Laimi cu Pathian nih a kan dawt i Khrihfa ram kan si i, cun kanmah zong Pathian rian ah aa pum pemi kan si ti awk hi kan um i Mission rian kan ṭuan cio, Pathian bia kan aupi i thlarau tlau Pathian sinah kan kirpi khawhnak hnga tiin heh! tiah kan i zuam. Hika zawnte ah a bautawn ko rua; tiah ka ruah tawnmi cu zeidah a si tiah cun Khrihfabu pakhat nih maw (asilole) Khrihfabu hruaitu pakhat nih maw Mission rianṭuantu kan thlah tikah hin a caan ah hin cun mahti hin kan thlah sawh i a hnulei in kan kirkamh ti lo, kan zohkhenh kho ti hna lo. Cucaah cun a tawinak in kan chim ahcun kan mission rianṭuannak hi teinak tampi kan hmuh lo caan a um tawn i hihi kan ruah dingmi tampi a um ko rua; tiah ka ruah. 

Jesuh nih cun a thlah hna tikah hin hi thil pathum hi a pektak hna. Khuachia ṭhawl khawhnak a pek hna, zawtnak damter khawhnak a pek hna, nawlngeihnak a pek hna. A caan ah hin cun kanmah nih a hnulei in hri kha kan tlaih i kanmah duhning paoh in kan tuah tawn caah hin kan mission rianṭuannak hi kan awngmin lonak a si ruah tiah keinih cun ka ruah. Cun Jesuh nih Lamkaltu hna a thlah hnawhnak a ruang hi pahnih in hika ah langhter ka duh.

A pakhatnak cu zeidah a si tiah cun, mizaw damter awkah a ti. Pahnihnak cu Vancung Pennak thawngṭha chim awkah a ti. Zei ruangah dah mizaw damternak a pek hna, mizaw damter dingin a thlah hna tiah cun minung hi zawtnak a phunphun a ngeimi kan si. Taksa a dammi kan um i thlarau a zawmi kan um. Taksa a dam ko nain thlarau a dam lomi tampi kan um. Thlarau a dam i taksa a dam lomi tampi kan um. Cucaah cun taksa, thinlung, thlarau damnak kan hmuh khawhnak hnga ding caah hin kan Bawipa Jesuh Khrih nih Lamkaltu hna hi a thlah hna; ti zong kha kan hmuh. Cucaah Pathian rianṭuantu nang le kei, kannih vialte hi Pathian nih mi vialte sinah taksa, thinlung, thlarau damnak an hmuh khawhnak ding caah thlami kan si timi zong kha nihin caan ah chim ka duh. 

Cun a pahnihnak ah a biapi ngaimi nihin ni caan ah chim ka duhmi cu Vancung Pennak thawngṭha chim dingah a thlah hna: timi kha kan hmuh. Kan Bawipa Jesuh Khrih nih thawngṭha a chim i hmasabik a aupi mi cu zeidah a si tiah cun, “Pathian Pennak kha a nai cang, cucaah nan sualnak kha i ngaichih ulaw Pathian sinah kir cang uh” ti kha a si. A hmasabik a chimmi cu Vancung Pennak thawngṭha a si. Cucaah cun nihin Khrihfa tampi hi kan zoh hna tikah Vancung Pennak thawngṭha a fiang rih lomi tampi kan um. Vancung Pennak thawngṭha kan i fian lo i, Vancung Pennak thawngṭha hi zeidah a si i, Vancung Pennak nih a ukmi hna Khrihfa pawl hi zei bantukin dah an cawlcang, zeibantuk in dah an nuncan ziaza hi a si; ti hi kan hngalh lo a si ahcun zeitik hmanh ah a ṭhawngmi Khrihfa kan si kho bal lai lo. Teinak a hmumi Khrihfa kan si kho bal lai lo i teitu kan si kho bal lai lo. 

Cucaah cun Vancung Pennak thawngṭha pemh cangmi nih cun zeitik hmanh ah vawlei nih a tei bal hna lo. An nunnak ah Vancung Pennak a um i Satan nih a tei bal hna lo. Satan nih a kan teinak cu Vancung Pennak thawngṭha kan pemh lo ruangah a si. Vancung Pennak thawngṭha hi kan Bawipa Jesuh Khrih nih a chimmi siseh, biakam thar chungah Mithiang Paul zong nih a chimmi siseh kan zoh tikah hin hmun (71) ah a lang. Hmun (71) ah a lang Vancung Pennak thawngṭha hi. Cu tluk cun a tam. Mah vialte lakah Vancung Pennak thawngṭha a tawibik in chim ka duhmi cu toidornak hi a si. Kan Bawipa Jesuh Khrih nih ngakchia pawl kha a sinah a au hna i, “Nannih zong nan i thlen i hi ngakchia bantukin nan si lo ahcun Vancung Pennak chungah nan lut kho lai lo” a ti. 

Vancung Pennak kan timi cu Toidor nun hi a si. Cucaah cun Vancung Pennak nun kan ngei lo tiin kan in tahnak pakhat cu zeidah a si tiah cun zeitluk in dah toidor nun ka ngeimi in a lang. Khrihfa pakhat zeitluk in dah Vancung Pennak kong a pemh timi kan tah khawhnak cu zeitluk in dah aa toidor timi in hmuh khawh a si. 

Dawtmi zumtu nu le pa, u le nau vialte hna kan Bawipa Jesuh Khrih nih, “vawlei cung khuazakip ah va kal ulaw ka thawngṭha va chim u; a zummi vialte cu Pa le Fapa le Thiang Thlarau min in tipilnak va pe hna uh” a ti. “Kan fialmi vialte an zumh nakhnga, an zulh nakhnga va cawnpiak hna uh” a ti. Pathian nih a kan fialmi cu zeidah a si? Nihin caan ah zumtu kan si i Pathian fanu fapa kan si lawng hi a za lo. Zungzal nunnak kan co lawng hi a za lo. Vawlei kan nun lio hrimhrim ah hin Vancung Pennak a sertu fanu fapa ṭha kan si ding kha Bawipa nih a kan auhmi kan si. Kan Khrihfabu ah siseh, kan innchungkhar ah siseh, kan khua kan ram ah siseh Vancung Pennak a sertu fanu fapa ṭha kan si khawhnak ding caah Bawipa nih thluachuahnak kan pek piak hram ko seh. Amen. 

Thazaang petu /- Saya Simon Hram Ling