Lai Nunphung Cheukhat

Roco Phungphai

Pupa rothil comi chungah a comi pa i a tthatnak (a ngeihmi thil conak lei) le a chiatnak (leiba cham ding, fimtawlnak) ding aa tel chih. Cucaah co dingmi nakin cham ding a tam deuh tikah ro co hi an duh tawn lo.

Nu le va nih an kawltti, an ttuan ttinak in an hmuh le an ngeihmi siloin an nu le an pa sinin maw, ka khatkhat in maw, a nupi a comi, an kalhmi nu thil cu amah a thih tikah a vapa thil ah a cang kho lo. Nu thil cu nu nih co phung a si i a fanule rual asiloah a tule le tuchin rual, cu hna an um lo ahcun a chuak tti miunau nupawl nih an co lai. Nu thil cu nu nih co phung a si.

Chin miphun cu nupi kan tthit tikah pa nih man manh a si i thil bantukin kan cawk hna caah nu cu pa thil bantukah an cang i a vapa phun ah aa hrawm. Cucaa rothil a co ahcun a vapa sinah a kalpi lai i phun dang thil ah a can lai kha (va dang a ngeih tikah tinak) kan sian lo ruangah nu nih ro conak phungphai le upadi kan ngeih lo nak hi a si.

Cun nupi tampi ngeih ruangah nutak, nuchun tiin thleidannak a um hleiah mah hrinsor chungchuak fale an si ko nain nutak fa, nuchun fa tiin thleidannak nih a zulh i rothil co khawh lonak dawnkhantu tiang a chuahpi.

Kan upadi zong cu, cu lam hoih deuh in tuah mi a rak si caah nihin kan ram tiluan he aa tlak ti lo tiah ka ruah. Nihin Chin miphun chungin mi tam deuh cu Khrihfa kan si cang i nupi pakhat lawng ngeih a si cang. Nuhrim fa, nutlai fa ti le bawi phun, sal phun tiin thleidannak a um ti lo. Asinain ro a co khotu ding pa an um chung paoh cu nu nih ro an co kho hlei lo. Fapa an si ah, fanu an si ah fale ciocio an si i fanu fapa lakah pakhatkhat nih ro co hna seh ti na duh ahcun asiloah cheu cio hna ning ti na duh ahcun hi ro conak upadi phunglam chungin luatnak, zalonnak lam a um ko. Cucu rovuihnak ca (will) in pek le cheuh a si.

Rovuih va (will) cu Khrihfa lawnglawng nih ttial khawh a si i na ngeihmi na thil kha na duh ning tein fa upa, fa hniang, fa lai, ti lo; nu le pa ti loin na duhmi kha na pek, na cheuh khawh hna.