Nunnak petu cu Pathian a si

Nihin kan Bupi nih a kan timhpiakmi Bible cathiang hna cu (1Kor 3:1-9; LK. 4:38-44) chungin an si. 

Nihin kan relmi kan bible cathiang nih kan lungthin a kan lak ngaingai kan ti lai maw (asiloah) fiang ngaiin a kan cawnpiakmi hna cu kannih vialte hna cu Pathian a lo, a dum, a pennnak caah rianṭuan dingin khawhmi lawngte kan si i, kannih vialte hna zong hi amah i a lo chungah, amah i a bupi chungah rianṭuanmi lawngte kan si, timi le cun cu kan rianṭuannak ah a ṭhantertu, a lianhtertu, a nuntertu cu Pathian a sinak kha nihin kan bible cathiang hna nih a langhtermi cu a si. 

A voikhat bible kan relmi (1Kor 3:1-9 chungah, kan zoh tikah Korin khua ah Khrihfa hna chung karlak ah i theihpalhnak cun bu cheunak, “kei cu Paul ih hnuzul ka si, Paul lawng ka cohlan”, “kei cu Apollos hnuzul ka si, Apollos chimmi lawng kha ka cohlan” tiin anmah karlak ah ṭhencheunak a hung um tikah Paul nih zeitindah a ti hna tiah cun, “kei cu nanmah lak ah thingkung a tuhtu lawng ka si, Apolo cu ti a tawihtu lawng a si, a khohter i a nuntertu cu Pathian a si” tiah Paul nih cun a cawnpiak hna. 

Cucaah kannih hna zong Bupi chungah kan Khrihfa cio te zongah hin zeitindah kan nun ve cio, timi kha vun i ruat ṭhan hna usih. ‘Anih cu hi khua ah hin caan cuzat a um cang i, (asiloah) hi bu chungah hin kum zeizat rian a ṭuanmi a si cang caah annih hi cu cohlang usih law, hruaitu ah chia ko usih” timi mithmai peknak le a cheukhat nih “a dang pakhat, amah tu hi kan hruaitu dingah aa tlak deuhmi a si” tiin ruahnak i khah lonak tete hi a um kho tawn. 

“Kan dih lak in Pathian a bu chungah rian a ṭuanmi, a member kan si” timi kha philh riangmang in, pakhat le pakhat i tahchunhnak, thil a ti kho deuhtu le pakhat le pakhat kha tahchunhnak tu ah khan kan buai tawn. A ngaingai tiah cun, kannih cu rianṭuantu menmen kan si, timi te kha theih ding a si. Kan tuahsernak, kan chimphuannak a ṭhantertu, a nuntertu, thluachuah a karhtertu cu Pathian a si kha philh hna hlah usih. Bu chung rian kan ṭuannak zongah, Pathian hnu kan zulh i Pathian phung kan chimnak zongah, kannih cu a rianṭuantu menmen kan si; a nuntertu le a ṭhantertu le a karhtertu cu Pathian a si timi kha philh hna hlah usih. 

Cun Thawngṭhabia chungah, “kan Bawipa Jesuh Khrih le zultu hna pumhnak inn khan an chuak i Simon inn ah an kal. Simon nupi nu cu a rak zaw i a tak a lin ngaingai i cu kong cu Jesuh kha an chimh. Jesuh cu a va kal i a itkhun pawngah khan a dir i a zawtnak cu a sik. A taklin nih cu a thlah i chikkhatte ah a tho i a bultawl hna e” tiah a ti. 

Bawipa nih Simon Peter a nupi a nu a zawtnak in a damter tikah, a thlop tikah mah minu nih zeidah a tuah? Inn ah um sawhsawh loin a bultawl hna e. A lunglawmhnak kha tuahsernak in a langhter e” timi kha kan hmuh. 

Dawtmi u le nau hna nang le kei zong kan nunnak ah, kan zaang dernak ah, kan sungtlaknak ah, Bawipa nih a rak kan tongh tik i a rak kan khamh tikah a thluachuah cungah hin kannih hna nih tah zeitindah lawmhnak bia kan chim ve. Kan um sawhsawh maw, kan i philhter maw (asiloah) amah duh ningin a rianthiang kan ṭuan maw, amah cawnpiak ning tein kan nung maw, pakhat le pakhat cungah i bultawlnak lungthin kan ngei ve maw. 

Nihin ni ah Simon a nupi a nu cu a dam tikah Bawipa le a hnuzul hna kha a bultawl hna e, tiah a ti. Nang le kei zong kan pawng ummi, harsatnak a tongmi hna, a dam lomi hna zong kha kannih hna nih bultawl thiam ve hna usih, theihthiam piak ve hna usih, daw thiam hna usih. 

Cun a pathumnak, kan Bawipa Jesuh Khrih cu chun nitlak in tha baa ngaiin khua khat hnu khua khat khual a tlawng, cun a cawnpiak hna, mizaw hna a damter hna, a tha a baa tuk. Sihmanhsehlaw kan Bawipa Jesuh Khrih cu mah rian lawngte kha aa lak peng i chun he zaan he a ṭuan peng si loin Pa Pathian he caan hmanṭinak a ngei lengmang, thla a cam. 

(LK. 4:42) ah, “Baiwpa nih chun ah thawngṭha a chim, mizaw a damter hna hnuah khuadei kate ah khan Jesuh cu khua chung khan a chuah i hmunking ah a kal.” Hmunking kal cu zei tuah dingah tiah cun, Pathian he pehtlaihnak, Pathian sinin thazaang lak ṭhan ding hei ti ko usih. Pathian he pehtlaihnak a ngei zungzal timi kha kan hmuh. 

Dawtmi u le nau hna nang le kei zong vawlei taksa caah rian fakpi kan ṭuan. Cun Thlarau lei ca zongah heh tiah phungchimnak in, Ministry phunphun in Pathian rian kan ṭuannak ah kan rian lawng hi maw kan rian tiin kan kalpi (asiloah) Bawipa he, Pathian he hmunking ah dai tein thlacamnak caan kan pe ve maw, timi zong kha ruat ṭhan hna usih. Bawipa rian a ṭuanmi kan si caah Bawipa he caan kan hman ti lo, Bawipa he kan i chonh lo, Bawipa caah kan caan kan sian lo a si ahcun kan phuanmi, kan tuahsermi, kan ministry vialte zong kha pakpalawng menmen si ko lai. 

Cuasicaah kannih cu a ṭuantu menmen kan si. Thluachuah petu le a nuntertu, a ṭhantertu cu Bawipa Pathian a si, timi kha thei zungzal hna usih.   

Thazaang petu /- Fr. Fidelis Maung Sein