St. Gregory the Great, Pope & Doctor

Audio (aw) zongin ngai khawh a si. 👇

A sangbik Pope hna chungin pakhat a si ve mi St. Gregory cu AD 504 kum ah Rome, Patritcan chungkhar in a chuak. Kum 35 a ti ah a rianṭuannak ṭha ngaiin teinak a hmuh hnu kum 5 a rauh ah a ngeihmi chawva vialte a kaltaak i Siangbawi pakhat a cang ve. AD 509 kum, Deacon sawhsawh te a si lioah mipi nih duh ciomi a si caah Pope ah an thim. Cu khua cun zaamtaak a timh nain St. Peter Biakinnpi ah an auh i ordination an pek.

Cu hnu ahcun Lamkaltu rian kha din lo tein ṭuan hram a thawk i, a sangbik mi degree a hmu. Bupi phaisa chungin a miak tete kha thongtla mi hna tlanhnak le mi sifak bawmhnak caah a hman. Rome uknak (Empire) a rawk hnu ah Barberian miphun hna kutchung in mipi hna khamh awkah ṭuanvo a laak. Biak pumhnak chungah sakmi Gregorian hla kha a hmang hmasabiktu a si i, England ram ah phungchimtu (Missionaries) a thlah hna. A bawi sinak kha i uah loin Pathian rianṭuantu hna i salpa tiah aa ti. A rian changtu hna nih amah bantukin atu tiang lungthin thiang an ngeih rih. Zawtnak ṭhalo a tlaunak hnga, sualngaihchihnak he artlang in lampi ah an vah lioah Hadrian lungkua Biakinn par in Van Ralbawi Michael nih a namkawng chungah nam a sanh liomi in langhnak a pek.

Cu thil cu Pathian dantatnak a dih cang timi langhternak a si. Cucaah thluachuah hmelchunhnak in mah lung biakinn cung ahcun thirhring in tuahmi Vanbawi milem pakhat a ser i a chiah. Tuah tawn ningin Gregory Missa voi (30) cu Mithiang Gregory i Zateik pakhat a simi Justus he aa pehtlaimi a si. Cu Zateik thlarau khamh khawhnak caah Missa voi (30) peh tein a tuahpiak hnu ahcun Justus cu intuarnak fakpi chungin ka luat cang tiah a naupa pakhat sinah langhnak a hmuhsak. St. Gregory cu AD 604 kum ah Rome khua ah a thih le cangka Mithiang sinak an pek colh. St. Gregory cu vawlei cung tuanbia ah a sangbik tiin a hleice in minṭhatnak an pekmi Pope pahnih hna lakah pakhat a si.