Zumhnak le Tuahsernak
Nihin cu September (01), cun zarhkel (22) nak cacawn nihnih ni zong kan phan ṭhan cang. Dawtmi u le nau hna nihin cathiang hrawm ṭi kan duhmi hna, thlarau rawl hrawm ṭi kan duhmi hna cu, “Zumhnak le Tuahsernak” timi kong kha a si lai.
Hi nihin kan relmi cathiang chungah cun aa tel lo nain khan Jeim cakuat chungah Jeim nih, “Tuahsernak aa tel lomi zumhnak cu zumhnak thi a si” tiah khan a kan timi kha kan theih. Nihin ah thawngṭha kan theihmi chungah Bawipa Jesuh Khrih nih mipi kha a cawnpiak hna tikah nawlngeihnak le ṭhawnnak he a cawnpiak hna tikah mipi cu an khuaruah a har ngaingai, timi kha kan hmuh. Cu hleiah Satan kha a ṭhawl i, mipa chungin khan a chuahter tikah Satan nih khan zei a ti, “kanmah hrawh awkah maw na rat. Nangmah cu a thiangmi Pathian na si kha kan hngalh ko, kan zumh ko” tiah a ti. Kha tikah Bawipa Jesuh Khrih nih, “Mipa chungin chuak tuah” tiah khan nawl a pek i, Satan cu a chuak i mipa cu a dam ṭhan. Cu tikah mipi a hmumi pawl cu an khuaruah a har chinchin i, a mang hmuah a bangtuk.
Dawtmi u le nau hna, Satan zong nih khan Bawipa Jesuh kha, “Pathian mi a thiangmi na si kha kan hngalh ko, kan theih ko” tiah a ti ko nain khan annih nih khan Pathian cu a thieh ko, a hngalh ko nain khan Pathian duhnak kha a tuah maw kan ti tikah a tuah lo. Cun a tuah lo hleiah zumtu Khrihfa hna kha hrawhhralnak a petu a si. Mi chungah khan a lut i, anmah nunnak kha a hrawk hna, timi kha kan hmuh. Pathian a zum ko nain, Pathian a hngal ko nain, Pathian hi zeitluk in dah a ṭhawn timi kha a hngal ko nain khan Pathian fialmi, Pathian nawlbia a zul lo, a tuah duh lomi cu zumtu Khrihfa aa timi vialte hna zong hi Satan bantuk kha kan si ko, timi kha nihin ah theihter kan duh hna.
Cu lengah kan Bawipa Jesuh Khrih nih nawlngeihnak le ṭhawnnak in a cawnpiak hna tikah khan na khuaruah a har, timi kha a si.
Cucaah dawtmi u le nau hna kan Bawipa Jesuh Khrih nih hin Pa Pathian fialmi lawngte kha a rak ṭuan tikah kha a ṭuanmi vialte ah khan a chimrelnak le a cawnpiaknak lawng maw a si kan ti tikah a si lo. A cawnpiak pah, cucun harnak a tongmi hna kha a bawmh hna. Cun a thi ciami hna hmanh kha a thawhter hna. Kutzeng kezangmi hna kha a damter hna. Cun thli le ruah le buanchukcho nih harnak a pekmi lamkaltu hna zong kha a chanh hna a khamh hna timi kha kan hmuh. Cu pin ah atu bantukin khan Satan tukforhnak le Satan hnahnawhnak ṭemṭawnnak a tuarmi hna zong kha luatnak a pek hna, timi kha kan hmuh tikah kan Bawipa Jesuh Khrih zong hi Pa Pathian fialmi Pathian bia cawnpiaknak lawng si loin ṭhatnak le mi nunnak khamh ding kha rian a ṭuan, timi kha kan hmuh tikah kan Bawipa Jesuh Khrih hrimhrim hi biachimnak lawng le cawnpiaknak lawng hi a za lo i, ṭhatnak le a harsami, a duhherhmi ca i bawmhnak tuah kha a duhmi a si timi kha kan hmuh.
Mirang phungthluk ah zei a ti a si ahcun, “Action Speaks laughter than words”, rianṭuannak le tuahsernak cu bia le kaa lawngin chimnak in khan hmual ngei deuh in rian a ṭuan, tiah khan ti a si. Cucaah kan Bawipa Jesuh Khrih nih hin a bia, a kaa lawngin cawnpiaknak lawng si loin a rianṭuannak le a zaangfah dawtnak i mi a bawmhmi hna khan rian kha a ṭuan deuh i cuticun a ṭhawnnak le a nawlngeihnak zong kha a lang deuh e, timi kha kan hmuh.
Nihin ah kan relmi cathiang hi (Lk. 4:31-37) tiang kha kan rel tikah hi chungah hin kan Baiwpa Jesuh Khrih nih hin a hmur a kaa in a canwpiaknak lawng si loin khan tuahsernak le zaangfah dawtnak in khan Satan sal ah aa cangmi, Satan kut chungah a ummi kha zalonnak kha a pek, luatnnak kha a pek timi kha kan hmuh tikah kan Bawipa Jesuh Khrih zong nih bia le kaa lawngin chim lawng kha si loin khan tuahsernak hrimhrim in khan Pa Pathian fialmi rian kha a tlinh.
Cucaah nang le kei zong Bawpa Jesuh Khrih a zummi kan si bantukin Pa Pathian a zummi, Pa Pathian duhnak a tuahmi lawnglawng nih khan khamhnak an hmu lai, tiah a ti bantukin Bawipa Jesuh nih a kan cawnpiak bantukin le a kan tuahpiak bantukin nang le kei zumtu aa timi vialte hna zong nih kan chim kan relnak lawng si loin, kan tuahsernak in le zaangfah bawmhnak kan tuahnak thawngin Khrihfa taktak kan sinak le Pathian fa kan sinak kha langhter i zuam usih.
Thazang petu /- Fr. Abraham Hrang Hit