Mithiang Peter le Paul nih an ngeih mi lungput
Nihin Pathian bia, kan Nu Bupi nih a kan thim piakmi (Mt. 16:17) chungah, “Jesuh nih cun, Johan fap Simon mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si”.
Nihin St. Peter le St. Paul puai ah Pathian bia in thazaang i lak ṭi dingah tlangtar ka duhmi cu St. Peter nunnak in siseh, St. Paul nunnak in siseh thazaang i lak ṭi dingah nihin ah chim ka duhmi a si. St. Peter hi Bible chungah kan zoh tikah a konglam hi hmuh awk tampi a um, chim ding tampi a um. St. Paul zong hi cu bantuk ṭhiamṭhiam cung a si i hi hna pahnih hi biakam thar chan ahcun a larbik kan ti hna. St. Peter nunnak hi kan zoh tikah, voikhat cu tiva ah sur an vorh lioah khan Jesuh kha an sinah a va kal i Jesuh nih, “Nan sur kha ti thuhnak leiah va ṭhial uh” tiah a ti i Jesuh bia ningte cun sur cu an cheh tikah nga tampi an tlaih ti kha kan hmuh. Cu hnu cun Jeush ke hram ah khan a bawk i “Bawipa, kei cu misual ka si ka kal tak ko” tiah a ti. Cu hnu ahcun Jesuh hnu i a zulhmi a si. A nunnak ah kan zoh tikah a caan ahcun Jesuh zong kha a rak hlawt i a caan ahcun Jesuh zong nih khan, “Santan hnulei kir” tiah Jesuh zong nih khan a siknak zong kha kan hmuh.
Cun nihin ah kan relmi thawngṭha chung ahcun zultu viate a hawile nih an chim khawh lomi, an phit khawh lomi biahalnak kha Peter nih a phit khawh timi zong kha kan hmuh. Hi nih a langhter mi cu zeidah a si tiah cun Peter hi a kekkuaimi thinlung a ngeitu a si. Zeitik hmanh ah Pathian sinah kir ṭhan dingah hin, sual ngaihchihnak ngeih dingah hin Peter hi a tlai bal lo. A sual le cangka sual ngaihthiamnak a hal ṭhan i cuticun Jesuh hnu a zultu a si i Jesuh nih zultu vialte lakah lutlaitu ah a thim ti kha kan hmuh. Nang le kei zong Peter bantukte hin a kekkuaimi thinlung kan ngeih i toidornak thinlung kan ngeih ahcun Pathian nih hin kan nunnak ah hin a sunpar hi a langhter ko lai timi zong kha theihter kan duh hna.
Cun St. Paul kong zong kha tlawmpalte theihter kan duh hna. St. Paul nih kan theih bantukin Biaknak le phunglam hi a ṭhanh ngaimi a si. Phunglam le biaknak a ṭhanh tuknak ah hin ahohmanh nih an ka tluk kho lai tiah a rak timi pa a si. Voikhat cu khual a tlawng i Khrihfa hrem dingah a kal lioah khan Damuscas hauka ah Jesuh nih ceunak in a kah i mah ni thawk cun a nunnak aa thleng ti kha kan hmuh. Jesuh nih a nunnak a thlen hnu in khan khua zakip ah a kal i, thawngṭha a aupi i cu thawngṭha a aupinak thawng cun Jentel mi an si ah, Judah mi an si ah mi tampi kha Pathian sinah a kir pi hna i thlarau tlau tampi kha Pathian sinah a hruai hna ti kha kan hmuh khawh. Hi nih thazaang a kan pekmi cu zeidah a si tiah cun Jesuh tel loin kanmah kan mihring sinak in Pathian rian kan ṭuanmi hi pakpalawng a sinak kha a langhtermi cu a si.
Peter bantuk in siseh, Paul bantuk in siseh a kekkuaimi thinlung kan ngeih i Pathian thlarau he a khatmi kan si ahcun kan mession rianṭuannak le kan cawlcanghnak, kan tuahsernak vialte hi tlam a tling lai i thlarau tlau vialte hi Pathian sinah a kirpi ṭhan khotu fanu/pa ṭha kan si lai timi zong kha nihin St. Peter le St. Paul puai ah thazaang kan i lakmi cu a si. Nang le kei St. Peter le St. Paul bantuk in a kekkuaimi thinlung a ngei khomi kan si i cuticun missioan rian kan ṭuannak ah thlarau tlau tampi kan tei khawhnak ding caah Pathian nih a thar in thluachuah kan pe hram ko seh.
Thazang petu /- Saya Simon Hram Ling