Pathian duhnak a tuah tu si i zuam hna u sih
Dawtmi nu le pa, u le nau hna nihin kan relmi bible kan zoh ahcun ṭhatnak tuahnak ruangah Pathian thluachuah hmuhnak kong kan theih khawh. Nihin bible hmasabik kan relnak ah zeidah kan hmuh tiah cun, Profet Elijah kong kha kan hmuh. Profet Elijah cu chan ah Suman timi minu pakhat a rak um. Mah nu cu mirum a si i Profet Elijah cu an inn a kal paoh ah khan ṭha tein khan a zohkhenh. Nikhat cu a vapa sinah khan a chimh i, “Pathian mi profet pa a umnak le a tlunkalnak ah hin kan inn ah a rak lengmang i kan inn ah innkhan pakhat kan tuah piak lai, mah ka ahcun a duhpoah in khan ra tlung seh law mah ti khan um hna seh” tiah mah nu nih cun a vapa kha a chimh tikah ṭha tein amah a umnak ding caah a khaan kha an tuahpiak.
Nikhat cu Profet Elijah nih cun mah kha a hmuh tikah a lunglawm ngai i mah nu nih a tuahmi kha ṭha tein a theih tikah Pathian thluachuah kha a pek duh. Cucaah a sinum nu, Gahazi an timi nu kha a auh i, “Mah nu kha va au law” tiah a ti. Mah nu nih cun zeidah a chimh, “mah nu nih hin fa zong a ngei kho lo, a vapa zong a tar cang” tiah a ti. “Asiahcun va au law” tiah Elijah nih cun ter i mah nu a rak phanh tikah cun, “nihin thawkin nangmah cu mah caan ah hin fa na pom lai” tiin Profet Elijah nih cun mah Suman nu cu ṭha tein khan a chimh. Cu tikah Suman minu nih cun, “Maw bawipa, hi na sal nu rak ka hleng hlah” tiah a ti. Cu a ti bantukin kha Profet Elijah nih cun thluachuah a pek i mah Suman nu a caan a tlin tikah fapa pakhat an ngei.
Cucaah Pathian nih mah nu kha thluachuah a pek taktak i Profet Elijah umnak le kalnak le a riahnak ding caah ṭha tein khan tluninn a onh tikah Pathian thluachuah a hmu. Cu bantukin kanmah zong hi nihin kan nunnak ah Pathian rianṭuantu pawl, Pathian nih a thlahtu pawl kha ṭha tein kan zohkhen hna ahcun Pathian thluachuah kan hmuh timi kha nihin bible chung kan relnak vialte zong hi kan zoh tikah Pathian nih laksawng tampi a kan pek timi kha kan hmuh. Cucaah nihin ah Pathian nih nunnak a kan pek, kan thaw kan chuahmi vialte zong hi Pathian nih a kan pekmi a si. Pathian thluachuah timi hi kan philh lai lo. Profet hna i rianṭuannak cu Pathian sinin a rami a si.
Cucaah kan nunnak in Pathian thluachuah i lak usih law, Pathian rianṭuantu pawl kha dawt usih. Pathian rianṭuantu pawl caah khan zeizong vialte kha Profet Elijah i thluachuah Suman nu nih a hmuh bantukin kannih hna zong nih mah bantuk nunnak te kha ruahchan in Pathian sin lawng khan thluachuah laknak ding le Pathian sin kan ngah ding, mah thluachuah vialte cu nihin kan sungh sual lonak ding ah Pathian kha taktak in zumh usih. Profet hna le Pathian rianṭuantu pawl kha dawt hna usih. Pathian he khan i komh zungzal i dawtnak le remnak le Pathian duhnak a tuah zungzalmi si i zuam cio usih.
Thazang petu /- Fr. Dominic Kung Tial