Venezuela lihnin har tongmi caah Pope nih €100,000 bawmhnak a kuat hna
Venezuela ah fak ngai in lihninhnak voihnih a chuah hnu ah minung 150 leng an thi tiah thawngthannak phu nih an langhter. Hliamtuarmi zong an tam ngaingai tiah zumh a si.
Chanhchuahnak rianṭuannak a pehzulh khawh zok dingin Pope Leo XIV nih Apostolic Almoner’s Office in a hmasa bik emergency bawmhnak euro €100,000 tluk a kuat hna.
Holy See nih Venezuela i Apostolic Nuncio, Archbishop Alberto Ortega Martín le Caracas Archbishop, Archbishop Raúl Biord Castillo he i bawm in bawmhnak cu a hmasa bik karhlan ah an pek hna i, duh sah deuh in hmun um Khrihfabu hruaitu hna tawlrelnak in bawmhnak dang zong pek a si lai tiah an chim.
Ramchung Catholic zumtu hna bawmhnak in Parish chungum biaknak inn cio an on hna i Caritas tawlrelnak hmangin harnak a tong mi hna cu a rannak in bawmhnak an tawlrel piak hna lio a si.
Nithumni zanlei ah 7.2 le 7.5 tluk a ṭhawngmi lihnih nak a can hnu ah chanhchuahnak phu nih a cimmi inn tampi an kawl cuahmah lio zong a si..
Caracas’ Simón Bolívar International Airport zong khar a si rih i khualipi chaklei La Guaira rili kam state nih rawlralnak fakbik a tuar i cu hmun ahcun inn tampi zong an cim.
Nawlngeitu hna nih a tlawmbik minung 164 an thi i minung thongkhat hrawng nih hliamhma an tuar tiah an chim i mah nak tam zong a thimi an um kho lai ti zongin an chim.
President Delcy Rodríguez nih La Guaira cu “rawhral nak hmun” (disaster zone) pakhat a si tiah thanhnak zong a tuah.
Ramchung Vuanci Diosdado Cabello nih: engineer pawl nih inn dirhmun a feh le feh lo zohfelnak an tuah chung paoh cu khuami hna nih lenglei ah um chung ding le a rawkmi inn hna he aa hlat deuh nak ah um dingin ralrin zong a pek hna.
Rawhral nak hi a fak ngaingai. Caracas Cathedral le parish biakinn cheukhat telh in biakinn hmun tampi zongah rawhralnak an tong. Cun seminary le biakinn inn dangdang zong an rawh ve.
Cu hmanh ah, Khrihfabu hruaitu hna nih innlo a ngei lomi hna caah umnak, rawl le thlarau thazang lei zohkhenhnak zong a si khawh chungin an pek peng hna.
Ramkip bawmhnak phu hna le America ram lei zong in bawmhnak phanh hram aa thawk cang. Chanhchuahnak phu hna nih rawhnak tang ah a nungmi tam deuh hmuh dingin ruahchannak he an i zuam cuah mah lio zong a si.